মণিপুৰ জনজাতি মঞ্চই অসমৰ প্ৰাক্তন ডিজিপি হৰেকৃষ্ণ ডেকাৰ নেতৃত্বত বিশেষ তদন্তকাৰী দলৰ দ্বাৰা হিংসাত্মক ঘটনাৰ তদন্ত বিচাৰিছে।
তদন্ত বিচাৰি উচ্চতম ন্যায়ালয়ত জনস্বাৰ্থৰ গোচৰ (পিআইএল) দাখিল কৰিছে জনজাতীয় মঞ্চই।
পিআইএলত ফ’ৰামে অভিযোগ কৰে যে মণিপুৰত জনজাতীয় লোকৰ ওপৰত হোৱা আক্ৰমণত সম্পূৰ্ণ সমৰ্থন আছে ৰাজ্যৰ লগতে কেন্দ্ৰতো ক্ষমতাত থকা ভাৰতীয় জনতা পাৰ্টিৰ।
পিআইএলে অভিযোগ কৰে যে প্ৰভাৱশালী সম্প্ৰদায়ে ৩০ জন জনজাতীয় ব্যক্তিক হত্যা কৰাৰ লগতে ১৩২ জন আহত হয় যদিও ইয়াৰে কোনো এটাৰ সম্পৰ্কত এতিয়ালৈকে কোনো এফ আই আৰ পঞ্জীয়ন কৰা হোৱা নাই।
দাখিল কৰা হৈছে যে, ‘আৰক্ষী নিজেই প্ৰভাৱশালী সম্প্ৰদায়ৰ পক্ষত থকাৰ বাবে এফ আই আৰ পঞ্জীয়ন হোৱা নাই আৰু কোনো তদন্তও হোৱা নাই।’
সেয়ে আবেদনকাৰীয়ে অসমৰ প্ৰাক্তন আৰক্ষী সঞ্চালক প্ৰধান হৰেকৃষ্ণ ডেকাৰ নেতৃত্বত আৰু মেঘালয় ৰাজ্যিক মানৱ অধিকাৰ আয়োগৰ প্ৰাক্তন অধ্যক্ষ মুখ্য ন্যায়াধীশ তিনলিয়ানথাং বৈফেইৰ নিৰীক্ষণত এটা বিশেষ তদন্তকাৰী দল গঠন কৰিবলৈ প্ৰাৰ্থনা কৰে যাতে জনজাতীয় লোকক আক্ৰমণ কৰা অভিযুক্তই উচিত শাস্তি লাভ কৰে।
