নগাঁও আৰক্ষীয়ে এক গোপন সূত্ৰৰ পম খেদি সোমবাৰে নিশা অভিযান চলাই এজন দুৰ্ধৰ্ষ চোৰাং চিকাৰীক গ্ৰেপ্তাৰ কৰিবলৈ সক্ষম হয়। আৰক্ষীয়ে গ্ৰেপ্তাৰ কৰা চোৰাং চিকাৰীজনক মণিপুৰৰ চূড়াচন্দনপূৰৰ জেমছ থাংলুৱাই (৫০) বুলি নগাঁৱৰ আৰক্ষী সূত্ৰই জানিবলৈ দিয়ে।
নগাঁও আৰক্ষীয়ে চোৰাং চিকাৰীজনক যোৱা নিশা নগাঁৱৰ চাপৰমুখ ৰে’লৱে ষ্টেশ্যনৰ ওচৰৰ পৰা ৰহা আৰক্ষীৰ সহযোগত গ্ৰেপ্তাৰ কৰিবলৈ সক্ষম হয়। তেওঁৰ পৰা আৰক্ষীয়ে এ এছ ০২ পি- ৬৭৭৪ মাৰুতি চিলেৰিঅ’ গাড়ী এখন জব্দ কৰে। আৰক্ষীৰ এক সূত্ৰই জনোৱা মতে, চোৰাং চিকাৰীজনে তেওঁৰ কেইজনমান সহযোগীৰ সৈতে দুদিনমান পূৰ্বে ওৰাং বন্যপ্ৰাণী অভয়াৰণ্যত গঁড় হত্যাৰ প্ৰচেষ্টা চলাইছিল যদিও সফল নহ’ল।
পিছত দলটো মণিপুৰলৈ উভটি যোৱাৰ পথত আৰক্ষীয়ে চাপৰমুখ ৰে’ল ষ্টেশ্যনৰ ওচৰত গ্ৰেপ্তাৰ কৰে যদিও তেওঁৰ সহয়োগী কেইজনক গ্ৰেপ্তাৰ কৰিবলৈ সক্ষম হোৱা নাই।
নগাঁও আৰক্ষী অধীক্ষক শংকৰব্ৰত ৰায় মেধিয়ে জনোৱা মতে, জেমছ্ থাংলুৱাই নামৰ দুৰ্ধৰ্ষ চোৰাং চিকাৰীজন মণিপুৰৰ কোনো উগ্ৰপন্থী সংগঠনৰ লগত জড়িত থাকিব পাৰে। তেওঁৰ পৰা উগ্ৰপন্থী সংগঠনসমূহে ব্যৱহাৰ কৰা পোছাক পৰিহিত এখন ফটোও আৰক্ষীয়ে জব্দ কৰে। এই সন্দৰ্ভত অধিক তথ্যৰ বাবে নগাঁও আৰক্ষীয়ে ইতিমধ্যে মণিপুৰ আৰক্ষীৰ লগত যোগাযোগ কৰিছে।
আন এক সূত্ৰৰ মতে,ধৃত চোৰাং চিকাৰীজন দীৰ্ঘদিন ধৰি কাজিৰঙা ৰাষ্ট্ৰীয় উদ্যানত গঁড়ৰ চোৰাং চিকাৰৰ লগত জড়িত আছিল। ইতিমধ্যে তেওঁ কেবাটাও গঁড় হত্যা কৰিছে বুলি আৰক্ষী সূত্ৰত প্ৰকাশ। ইপিনে চোৰাং চিকাৰী গৰাকীৰ সৈতে সম্পৰ্ক থকাৰ অভিযোগত নগাঁও আৰক্ষীয়ে কামপুৰ কচুৱাৰ গাঁওৰক্ষী বাহিনীৰ সম্পাদক চফিৰ উদ্দিনক আটক কৰিছে।
