‘‘প্ৰধান মন্ত্ৰী কিষাণ সন্মান নিধিৰ নামত চলা ব্যাপক দুৰ্নীতিয়ে সোণোৱাল চৰকাৰৰ শূণ্য সহনশীল নীতিক এক প্ৰহসনত পৰিণত কৰিছে ৷ ৰাজ্যৰ প্ৰতিখন পঞ্চয়তত প্ৰধান মন্ত্ৰী কিষাণ সন্মান নিধি আচনিত হোৱা মুকলি দূৰ্নীতি আৰু চূড়ান্ত অনিয়মে শাসক দলটোৰ তৃণমূল পৰ্যায়ত চলা দূৰ্নীতিৰ তালিকাখনত এক নতুন নজিৰ সৃষ্টি কৰিলে,’’ মনজিৎ মহন্তই এখন সংবাদমেল সম্বোধন কৰি আজি এইদৰে কয়।
নৱ নিৰ্বাচিত ৰাজ্যসভাৰ সাংসদ অজিত কুমাৰ ভূঞাৰ নেতৃত্বত কেইগৰাকী মান সক্ৰিয় ৰাজহুৱা কৰ্মীয়ে ৰাজ্য চৰকাৰৰ বিৰুদ্ধে এই সম্পৰ্কত গুৰুতৰ অভিযোগ উত্থাপন কৰিছে বুলি মহন্তই সংবাদমেলত উল্লেখ কৰে।
‘‘কৃষি মন্ত্ৰীজনৰ গৃহ সমষ্টি বোকাখাটত হাজাৰৰো অধিক ভুৱা কৃষকে এই আচনিৰ নামত ইতিমধ্যে ৰাজহুৱা ধন সৰকাই নিছে ৷ ইফালে খুমটাই সমষ্টিতো ব্যপক অনিয়ম সংঘটিত হৈছে ৷ ৩০ বছৰ পূৰ্বে মৃত্যুবৰণ কৰা ব্যক্তিয়েও প্ৰধান মন্ত্ৰী কিষাণ সন্মান নিধিৰ ধন লাভ কৰিছে ৷ ২৫ বছৰ আগেয়ে মৃত্যুবৰণ কৰা গৌৰী শংকৰ চাহু, ১৫ বছৰ আগেয়ে মৃত্যুবৰণ কৰা তুলসী কৰ্মকাৰৰ নামটো কিষাণ সন্মান নিধিৰ ধন দুষ্ট চক্ৰই মুকলি কৰিছে ৷ পাটাছাৰকুছি সমষ্টিটো কেইবাখনো পঞ্চায়তত চৰকাৰী কৰ্মচাৰী তথা অঢ্যবন্ত পৰিয়ালৰ লোকৰ নাম সাহায্য তালিকাত ওলাইছে,’’ সংবাদমেলত এইদৰে অভিযোগ দাঙি ধৰে মহন্তই।
অধিবক্তা শান্তনু বৰঠাকুৰে প্ৰধান মন্ত্ৰী সন্মান নিধি আচনি সন্দৰ্ভত ন্যায়িক তদন্তৰ দাবী জনাই ৷
ইপিনে, অসমৰ ৮ খন তৈলক্ষেত্ৰক ব্যক্তিগত খণ্ডৰ হাতত তুলি দিয়া কাৰ্যক তীব্ৰ ভাষাৰে গৰিহা দি মনজিৎ মহন্তই নৰেন্দ্ৰ মোডীৰ চৰকাৰখন বনিয়াৰ স্বাৰ্থত উৎসৰ্গিত এখন চৰকাৰ বুলি বাৰে বাৰে প্ৰমাণ হৈছে বুলি কয়।
‘’সকলো ৰাজহুৱা খণ্ডৰ প্ৰতিষ্ঠান, সেৱা সমূহ এটা এটা কৈ আদানী, আম্বানীৰ দৰে বৃহৎ ব্যক্তিগত খণ্ডৰ হাতত তুলি দি চৰকাৰে দেশখনকে ব্যক্তিগত খণ্ডৰ হাতত বিক্ৰী কৰাৰ দিশে আগবাঢ়ি গৈছে ৷ অমি অসমৰ ৰাইজক তৈলক্ষেত্ৰ ব্যক্তিগত খণ্ডৰ হাতত তুলি দিয়াৰ বিৰুদ্ধে তীব্ৰ প্ৰতিবাদ গঢ়ি তুলিবলৈ আহ্বান জনাইছো,’’ মনজিৎ মহন্তই লগতে কয়।
আনহাতে, জ্যেষ্ঠ সাংবাদিক গৰাকীয়ে শ্ৰম আইনৰ সংশোধনী প্ৰত্যাহাৰ কৰা আৰু বিদ্যুৎ আইন সংশোধন কৰি শক্তিখণ্ডত থকা ৰাজ্যৰ সকলো ক্ষমতা দিল্লীয়ে কুক্ষিগত কৰিবলৈ কৰা চক্ৰান্ত শীঘ্ৰে বন্ধ নকৰিলে ইয়াৰ বিৰুদ্ধে তীব্ৰ প্ৰতিবাদ গঢ়ি তোলা হ’ব বুলি চৰকাৰক সতৰ্ক কৰি দিয়ে ৷
সংবাদমেলত অধিবক্তা শান্তনু বৰঠাকুৰ আৰু প্ৰাক্তন বিজেপিৰ নেত্ৰী তথা সমাজকৰ্মী মীৰা বৰঠাকুৰো উপস্থিত আছিল ৷
