ধীৰ-স্থিৰ, ধৈৰ্য্যশীল আৰু মৌন ব্যক্তি হিচাপে প্ৰাক্তন প্ৰধানমন্ত্ৰী মনমোহন সিঙৰ এক বিশেষ সুনাম আছে। ধাৰাল বাক্যবাণেৰে মুখৰ হৈ পৰা মনমোহন সিঙৰ ছবি তেনেই বিৰল। কিন্তু কেন্দ্ৰৰ মোদী চৰকাৰৰ মিথ্যাচাৰিতা, অবিবেচকী আৰু টোঘলকী কাণ্ডৰ বিৰুদ্ধে সোচ্চাৰ হৈ পৰিছে এইগৰাকী মৌন ব্যক্তি।
আজি প্ৰধানমন্ত্ৰী নৰেন্দ্ৰ মোদী আৰু তেওঁৰ চৰকাৰৰ ওপৰত এক বিৰল অথচ তীব্ৰ সমালোচনা কৰে প্ৰাক্তন প্ৰধানমন্ত্ৰী গৰাকী।
মোদী তথা কেন্দ্ৰীয় চৰকাৰখনে সন্মুখীন হোৱা প্ৰতিটো সমস্যাৰ বাবে জৱাহৰলাল নেহৰুক দোষাৰোপ কৰাৰ স্বভাৱসিদ্ধ প্ৰৱণতাক ভৎসৰ্না কৰি মনমোহন সিঙে মোদীক প্ৰধানমন্ত্ৰীৰ পদ মৰ্যাদা সোঁৱৰাই দিয়ে।
প্ৰাক্তন প্ৰধানমন্ত্ৰী সিঙে কয় যে কংগ্ৰেছে কেতিয়াও ৰাজনৈতিক লাভালাভৰ বাবে দেশখনক বিভক্ত কৰা নাই বা সত্য লুকুৱাই ৰখা নাই।
“এফালে, মানুহে মুদ্ৰাস্ফীতি আৰু নিবনুৱা সমস্যাৰ সন্মুখীন হৈছে, আনহাতে, বৰ্তমানৰ চৰকাৰে তেওঁলোকৰ ভুল স্বীকাৰ কৰা আৰু সেইবোৰ সংশোধন কৰাৰ সলনি যোৱা চাৰে সাত বছৰ ধৰি শাসনত থকাৰ পাছত এতিয়াও প্ৰথম প্ৰধানমন্ত্ৰী জৱাহৰলাল নেহৰুক জনতাৰ সমস্যাৰ বাবে দোষাৰোপ কৰি আছে।” ড০ সিঙে কয়।
“মই অনুভৱ কৰোঁ যে প্ৰধানমন্ত্ৰীৰ পদমৰ্যাদাৰ এক বিশেষ গুৰুত্ব আছে। প্ৰধানমন্ত্ৰীয়ে নিজা ব্যৰ্থতা ঢাকিবলৈ ইতিহাসক দোষাৰোপ কৰাৰ সলনি মৰ্যাদা বজাই ৰখা উচিত। যেতিয়া মই ১০ বছৰ প্ৰধানমন্ত্ৰী আছিলো, মই কথাৰ পৰিৱৰ্তে কামত গুৰুত্ব দিছিলো। মই কেতিয়াও দেশক বিশ্বৰ সন্মুখত সন্মান হেৰুৱাবলৈ নিদিওঁ।মই কেতিয়াও ভাৰতৰ গৌৰৱক ভূলণ্ঠিত কৰা নাছিলো।” তেওঁ কয়।
“মোৰ বিৰুদ্ধে দুৰ্বল, নিমাত আৰু দুৰ্নীতিগ্ৰস্ততাৰ মিছা অভিযোগ উত্থাপন কৰা বিজেপি আৰু ইয়াৰ সাঙ্গো-পাঙ্গোৰ প্ৰকৃত স্বৰূপ আজি দেশৰ সন্মুখত উন্মোচিত হৈছে।”
সমগ্ৰ বিশ্বজুৰি অৰ্থনীতিবিদ হিচাপে অগাধ ব্যুৎপত্তি থকা ড৹ সিঙে চৰকাৰৰ অৰ্থনৈতিক আৰু বৈদেশিক নীতিৰো তীব্ৰ সমালোচনা কৰে।
“বিজেপি নেতৃত্বাধীন চৰকাৰখনৰ অৰ্থনৈতিক নীতিৰ কোনো জ্ঞান নাই। এই বিষয়টো কেৱল ৰাষ্ট্ৰৰ মাজত সীমাবদ্ধ নহয়। চৰকাৰখন বৈদেশিক নীতিৰ ক্ষেত্ৰতো ব্যৰ্থ হৈছে। আমাৰ সীমান্তত চীনৰ আগ্ৰাসনৰ পাছতো চৰকাৰে ইয়াক অস্বীকাৰ কৰাৰ চেষ্টা কৰিছে।” ড০ সিঙে কয়।
তেওঁ লগতে কয়, “মই আশা কৰোঁ যে প্ৰধানমন্ত্ৰীয়ে বুজি পাইছে যে নেতাসকলক বলপূৰ্বক আলিঙ্গন কৰি বা তেওঁলোকক বিৰিয়ানী খুৱাই বৈদেশিক নীতি পৰিচালনা কৰিব নোৱাৰি।”
ড০ সিঙে বিজেপি নেতৃত্বাধীন চৰকাৰক ভুৱা ৰাষ্ট্ৰীয়তাবাদী আখ্যা দিয়াৰ লগতে বিভাজনমূলক নীতি গ্ৰহণ কৰা বুলি অভিযোগ কৰে।
“আমি কেতিয়াও ৰাজনৈতিক লাভালাভৰ বাবে দেশখনক বিভক্ত কৰা নাছিলো। আমি কেতিয়াও সত্যক গাপ দিবলৈ চেষ্টা কৰা নাছিলো। আমি কেতিয়াও দেশৰ সন্মান বা প্ৰধানমন্ত্ৰীৰ পদমৰ্যাদা কলুষিত কৰা নাছিলো। আজিৰ জনসাধাৰণ বিভক্ত হৈ আছে। এই চৰকাৰৰ ভুৱা ৰাষ্ট্ৰীয়তাবাদ ফোঁপোলা আৰু বিপদজনক। তেওঁলোকৰ জাতীয়তাবাদ ব্ৰিটিছৰ বিভাজন আৰু শাসন নীতিৰ ওপৰত আধাৰিত। সাংবিধানিক প্ৰতিষ্ঠানসমূহ এই চৰকাৰৰ আমোলত দুৰ্বল হৈ পৰিছে।” তেওঁ কয়।
আনহাতে বিজেপি চৰকাৰৰ অৰ্থনৈতিক নীতিত স্বাৰ্থপৰতা আৰু লোভৰ নীতি সোমাই আছে বুলিও সমালোচনা কৰে প্ৰাক্তন প্ৰধানমন্ত্ৰীগৰাকীয়ে। তেওঁ কয়, “তেওঁলোকৰ স্বাৰ্থৰ বাবে তেওঁলোকে মানুহক বিভক্ত কৰিছে আৰু মানুহক নিজৰ মাজতে যুঁজত লিপ্ত কৰাইছে।”
তদুপৰি যোৱা বৰ্ষৰ শেষৰ ফালে প্ৰধানমন্ত্ৰী মোদীৰ পঞ্জাৱ ভ্ৰমণৰ সময়ত কৃষকৰ প্ৰতিবাদৰ পিছতে ‘প্ৰধানমন্ত্ৰীৰ নিৰাপত্তা উলংঘন’ হোৱা বুলি যি অভিযোগ উত্থাপন হৈছিল, সেই সন্দৰ্ভতো মত পোষণ কৰে ড৹ সিঙে।
তেওঁ কয়, “কিছুদিন পূৰ্বে প্ৰধানমন্ত্ৰীৰ নিৰাপত্তা উলংঘনৰ নামত পঞ্জাৱৰ মুখ্যমন্ত্ৰী চৰণজিৎ সিং চন্নী আৰু ৰাজ্যখনৰ জনসাধাৰণক বদনাম কৰাৰ চেষ্টা কৰা হৈছিল। কৃষক আন্দোলনৰ সময়তো পঞ্জাৱ আৰু পঞ্জাৱৰ জনসাধাৰণক বদনাম কৰাৰ চেষ্টা কৰা হৈছিল। বিশ্বই পাঞ্জাৱীসকলৰ সাহসিকতা, দেশপ্ৰেম আৰু ত্যাগক অভিবাদন জনাইছে, কিন্তু এন ডি এ চৰকাৰে এই বিষয়ে কোনো শব্দ উচ্চাৰণ নকৰে।”
পঞ্জাৱৰ এজন ব্যক্তি হিচাপে, এজন প্ৰকৃত ভাৰতীয় হিচাপে চৰকাৰৰ এই অবিবেচকী কাণ্ডই তেওঁক গভীৰভাৱে আঘাত দিছে বুলি ক্ষোভ উজাৰে মনমোহন সিঙে।
