বিদ্যুৎ চুৰি কৰাসকলক ৰঙা চকু দেখুওৱা স্বয়ং ৰাজ্যৰ DGP ৰ ঘোষণা আছিল “বিদ্যুৎ চুৰি নকৰিব আৰু সময়মতে বিল পৰিশোধ কৰক। অসম আৰক্ষীয়ে নিৰাপত্তা দিব বিদ্যুৎ কৰ্তন কৰিবলৈ যোৱা কৰ্মচাৰীক।”
কিন্তু অসমীয়াত এষাৰ কথা আছে নেচাই দালে গালে ঘাটি….
নৰ্থ ইষ্ট নাওৰ হাতত আহি পৰা তথ্য অনুসৰি স্বয়ং আৰক্ষী সঞ্চালক প্ৰধানৰ কাৰ্য্যালয়ে কোটি কোটি টকাৰ বিদ্যুতৰ বিল পৰিশোধ কৰা নাই। হয়তো আৰক্ষী সঞ্চালক প্ৰধান মহোদয় এই ক্ষেত্ৰত অজ্ঞাত যে ‘আৰক্ষী সঞ্চালক প্ৰধানৰ কাৰ্য্যালয়ে পৰিশোধ কৰা নাই ৩,৭২,০৭৭৭৬ টকা!
তথ্য অনুসৰি ২০২১ চনৰ মাৰ্চ মাহলৈকে পৰিশোধ কৰা নাই এই বিল।
এয়া মাথো এক উদাহৰণহে। ঠিক সেইদৰে আমি লাভ কৰা তথ্য অনুসৰি ৰাজ্যৰ লোক নিৰ্মাণ বিভাগে ৪,২৯,৪৮,৯৭১ টকা, জলসিঞ্চন বিভাগে ৬,৩৯,৯৪,১২৫ টকা, জনস্বাস্থ্য কাৰিকৰী বিভাগে ২৬,৩১,২৫,২৪১ টকা, বন বিভাগে ৪,৯৪,০৮৫৭৩ টকা, IGP বিশেষ শাখাৰ কাৰ্য্যালয়ে ২৮,৯১,৫৮৭ টকা, মাধ্যমিক শিক্ষা সঞ্চালকালয়ে ১,২৬,৭০,৬০৬ কোটি টকা চলিত বৰ্ষৰ মাৰ্চ মাহলৈকে বিদ্যুৎ মাছুল পৰিশোধ কৰা নাই।
ইতিমধ্যে, ছ’চিয়েল মিডিয়াত ভাইৰেল হৈছে এইসমূহ তথ্য আৰু ইয়াক লৈ সৰৱ হৈ পৰিছে কৰদাতা নাগৰিকসকল।
এতিয়া প্ৰশ্ন হৈছে ‘চৰকাৰী কাৰ্য্যালয়ে যদি চৰকাৰক বিদ্যুতৰ মাছুল নিদিয়ে তেন্তে সাধাৰণ ৰাইজৰ ক্ষেত্ৰত কঠোৰ হৈছে কিয় ৰাজ্যৰ বিদ্যুত বিভাগ?
ডিজিপি কাৰ্য্যালয়কে ধৰি ৰাজ্যৰ অন্য বিভাগৰ বিদ্যুত সেৱা কৰ্তন কৰিবলৈ সাহস হ’ব নে?
ইফালে অসম আৰক্ষীৰ সঞ্চালক প্ৰধানৰ কাৰ্য্যালয়ৰ বিদ্যুতৰ বিল পৰিশোধ নকৰাক কেন্দ্ৰ কৰি আমি প্ৰতিক্ৰিয়া বিচাৰিছিলো police Security ৰ ADGP ৰ প্ৰতিক্ৰিয়া ল’বলৈ চেষ্টা কৰিছিলো যদিও তেওঁ প্ৰতিক্ৰিয়া দিয়াৰ পৰা বিৰত থাকে। তাৰোপৰি আমি এই সন্দৰ্ভত DGP ভাস্কৰজ্যোতি মহন্তৰ সৈতে যোগাযোগ কৰিছিলো যদিও তেওঁৰ সৈতে যোগাযোগ সম্ভৱ নহ’ল।
এতিয়া ‘সৰিয়হৰ ডুলিৰ ভূত’টো চৰকাৰৰ বিদ্যুৎ বিভাগে কেনেকৈ আঁতৰাই সেয়া সময়ত লক্ষণীয় হ’ব।
এই তথ্য ছ’চিয়েল মিডিয়া আৰু ডিজিটেল মাধ্যমত প্ৰকাশ পোৱাৰ পাছতে অসম শক্তি বিতৰণ কোম্পানী লিমিটেডৰ মুখ্য প্ৰবন্ধকৰ দায় সৰা প্ৰেছ বিজ্ঞপ্তি।
জলসিঞ্চন, স্বাস্থ্য, সাধাৰণ প্রশাসন, গৃহ আৰু আৰক্ষী বিভাগকে ধৰি নটা চৰকাৰী বিভাগৰ বিদ্যুৎ বিল অসম চৰকাৰৰ সাধাৰণ প্রশাসন বিভাগে কেন্দ্রীয়ভাবে নিয়মীয়াকৈ পৰিশোধ কৰে। আৰক্ষী বিভাগৰ নামত এ পি ডি চি এল-য়ে দিয়া শেহতীয়া বিলখন সাধাৰণ প্রশাসন বিভাগৰ ওচৰতে আছে আৰু যাৱতীয় প্রক্রিয়াৰ পাছত আগৰ দৰেই এ পি ডি চি এল-য়ে এই বিলৰ ধন লাভ কৰিব।