শীতকালীন অধিবেশনৰ প্ৰথম দিনা কংগ্ৰেছ সাংসদ ৰেণুকা চৌধুৰীয়ে এটা কুকুৰক সংসদলৈ লৈ যোৱাক লৈ বিতৰ্কৰ সৃষ্টি হৈছিল। ইয়াৰ মাজতে বিহাৰৰ বিজেপি বিধায়ক প্ৰমোদ কুমাৰৰ এটা ভিডিঅ’ ভাইৰেল হৈ পৰিছে। সেই ভিডিঅ’টোত প্ৰমোদ কুমাৰে নাৰীৰ বিষয়ে বিতৰ্কিত মন্তব্য কৰা শুনা যায়।
প্ৰমোদ কুমাৰে কৈছিল, “বহু মহিলাই আত্ম-তৃপ্তিৰ বাবে কুকুৰৰ সৈতে শোৱে।” অৱশ্যে পিছত তেওঁ নিজৰ বক্তব্যৰ ব্যাখ্যা দি কয় যে তেওঁ মহিলাসকলক অপমান কৰা নাই, কিন্তু পশ্চিমীয়া সংস্কৃতিয়ে কেনেকৈ ভাৰতীয় সভ্যতাৰ ওপৰত আধিপত্য বিস্তাৰ কৰিছে তাৰ এক উদাহৰণহে দাঙি ধৰিছিল।
শেহতীয়াকৈ বিহাৰ বিধানসভাৰ অধিৱেশন চলি থকাৰ সময়ত বিজেপি বিধায়ক প্ৰমোদ কুমাৰে এজন ইউটিউবাৰৰ সৈতে কথা পাতিছিল। সেই সময়তে তেওঁ এই বিতৰ্কিত মন্তব্যটো কৰিছিল। পিছত ভিডিঅ’টো ভাইৰেল হৈ পৰে।
৬ বাৰৰ বিধায়ক আৰু প্ৰাক্তন মন্ত্ৰী প্ৰমোদ কুমাৰে কংগ্ৰেছ সাংসদ ৰেণুকা চৌধুৰীক লৈ প্ৰতিক্ৰিয়া ব্যক্ত কৰি কয়, “বহুতৰে কুকুৰৰ সৈতে শোৱাৰ অভ্যাস আছে। ম’বাইলত চাব, বহু মহিলাই কুকুৰৰ সৈতে শোৱে। কুকুৰেই তেওঁলোকৰ জীৱনৰ কেন্দ্ৰবিন্দু। সেয়েহে তেওঁ কুকুৰটোক লগত সংসদলৈ লৈ গৈছিল।”
বিহাৰৰ প্ৰধান বিৰোধী দল আৰজেডিৰ ৰাষ্ট্ৰীয় মুখপাত্ৰ প্ৰিয়ংকা ভাৰতীয়ে ছ’চিয়েল মিডিয়াত প্ৰমোদ কুমাৰৰ ভিডিঅ’ শ্বেয়াৰ কৰি বিজেপিৰ ওপৰত কটাক্ষ কৰে। প্ৰিয়ংকাই প্ৰশ্ন কৰে যে ‘পালতু নেতা’সকলে যেতিয়া মহিলাসকলক লৈ এনে অপমানজনক মন্তব্য কৰে, তেতিয়াই প্ৰধানমন্ত্ৰী নৰেন্দ্ৰ মোদী সন্তুষ্ট হয়নে?ইফালে প্ৰমোদ কুমাৰে কয় যে তেওঁৰ বক্তব্য বিকৃত কৰা হৈছে। তেওঁ কেৱল পশ্চিমীয়া সভ্যতাৰ পটভূমিত বৰ্তমানৰ সমাজৰ ছবিখন তুলি ধৰিছে। তেওঁৰ মতে, পশ্চিমীয়া সংস্কৃতিয়ে যেন ভাৰতীয় সভ্যতাৰ ওপৰত আধিপত্য বিস্তাৰ নকৰে। বিজেপি বিধায়কগৰাকীয়ে লগতে কয় যে তেওঁ কোনো মহিলাক অপমান কৰা নাই আৰু তেওঁৰ মনত কাৰো প্ৰতি অসন্মান নাছিল। তেওঁৰ মতে, সংসদ হৈছে গণতন্ত্ৰৰ মন্দিৰ, আৰু যদি কোনোবাই তাত কুকুৰ এটা লৈ যায়, সেয়া অপমানজনক।
