উৎপাদন বন্ধ হৈ থকাৰ লগতে এক চৰম অনিশ্চয়তাত থকা উত্তৰ-পূব কয়লা ক্ষেত্ৰৰ সম্পৰ্কে অসম চৰকাৰে অতি শীঘ্ৰে স্থিতি স্পষ্ট কৰিবলৈ দাবী জনাইছে মাৰ্ঘেৰিটা সাংবাদিক সংস্থাই।
আজি লিডু কেন্দ্ৰীয় ৰঙ্গমঞ্চৰ জিৰণি চ’ৰাত অনুষ্ঠিত সংস্থাৰ এখনি বিশেষ সাধাৰণ সভাত কয়লা উদ্যোগটোৰ ভৱিষ্যতকলৈ আলোচনা কৰাৰ লগতে চৰকাৰে উদ্যোগটোৰ সম্পৰ্কে কোনো কথা স্পষ্ট নক’ৰাত উদ্বেগ প্ৰকাশ কৰে।
মাৰ্ঘেৰিটা মহকুমাৰ অৰ্থনীতি নিৰ্ভৰশীল জাতীয় উদ্যোগটোৰ অচলাৱস্থা অতি শীঘ্ৰে দূৰ কৰিবলৈ সভাই দাবী জনাই প্ৰস্তাৱ গ্ৰহণ কৰে।
সংস্থাৰ সভাপতি ৰাম প্ৰসাদ আম্বেদকাৰৰ সভাপতিত্বত অনুষ্ঠিত সভাৰ উদ্দেশ্য ব্যাখ্যা কৰে সাধাৰণ সম্পাদক ৰাণাজ্যোতি নেওগে। সভাত সৰ্বসন্মতিক্ৰমে সংস্থাৰ সংশোধিত সংবিধানখন গ্ৰহণ কৰা হয়।
উক্ত সভাতে সমীৰণ বৰঠাকুৰক সভাপতি মানস প্ৰতিম গগৈক সাধাৰণ সম্পাদক হিচাপে লৈ পাঁচজনীয়া এখন ন্যাস সমিতি গঠন কৰি আৰম্ভণিতে পাঁচ লাখ টকাৰ এক ন্যাস পুঁজি গঠনৰ সিদ্ধান্ত গ্ৰহণ কৰা হয়।
সভাত মাৰ্ঘেৰিটা সাংবাদিক সংস্থাৰ নাম একাংশ সদস্য নোহোৱা সাংবাদিকে অপকৰ্মত ব্যৱহাৰ কৰা পৰিলক্ষিত হোৱা বুলি প্ৰকাশ কৰে সাধাৰণ সম্পাদক নেওগে।
সভাই সংস্থাৰ নাম ব্যৱহাৰ নকৰিবলৈ সংশ্লিষ্ট সকলক সকীয়াই দিয়াৰ লগতে ভৱিষ্যত সময়ত এনে সাংবাদিকৰ বিৰুদ্ধে আইনগত ব্যৱস্থা ল’ব বুলি সভাই সকীয়াই দিয়ে।
সংস্থাৰ উপ সভাপতি সমীৰণ বৰঠাকুৰ, মুখপাত্ৰ মানস প্ৰতিম গগৈ, অনলাইনত উপ-সভাপতি পাৰ্থপ্ৰতীম গোস্বামী, যুটীয়া সম্পাদক তপন দে, খিলানাথ অধিকাৰী, শ্যামল নেওগ, মিঠুন বৰুৱা আদি প্ৰায় সংখ্যক বিষয়ববীয়া উপস্থিত থকা সভাখনত এখন বাৰ্ষিক কৰ্মসূচী গ্ৰহণ কৰা হয়।
কৰ্মসূচী অনুযায়ী- জানুৱাৰিত সংস্থাৰ অধিবেশন, এপ্ৰিলত বহাগৰ আদৰণি, মে’ত পৰাগ কুমাৰ দাস স্মৃতি দিৱস, জুনত ৰাভা দিৱস, আগষ্টত বিশ্ব ফটোগ্ৰাফী দিৱস, নবেম্বৰত প্ৰতিষ্ঠা দিৱস আৰু ৰাষ্ট্ৰীয় প্ৰেছ দিৱস উদযাপনৰ সিদ্ধান্ত গ্ৰহণ কৰা হয়।
সভাই নতুন সদস্য ভৰ্তিৰ সিদ্ধান্ত গ্ৰহণ কৰি লেখাপানী আৰু মাৰ্ঘেৰিটা আৰক্ষী থানাৰ অন্তৰ্গত ইচ্ছুক সাংবাদিকক সংস্থাৰ সদস্য পদৰ বাবে আবেদন কৰিবলৈ আহ্বান জনায়।
সভাই এতিয়াৰ পৰা সংস্থাৰ কোনো সদস্যই অনুশাসন ভংগ কৰিলে শাস্তুিমূলক ব্যৱস্থাৰ সন্মুখীন হ’ব বুলি স্পষ্ট কৰি দিয়ে।
