ক’ল ইণ্ডিয়া লিমিটেডৰ নিৰ্দেশৰ পিছতে মাৰ্ঘেৰিটা সাংবাদিক সংস্থাৰ গণ আন্দোলনৰ হুংকাৰ

ক’ল ইণ্ডিয়া লিমিটেডে উত্তৰ-পূব কয়লাক্ষেত্ৰ, মাৰ্ঘেৰিটাত সকলো খনন কাৰ্য্য অনিদিষ্ট কাললৈ বন্ধ কৰি দিয়াৰ পিছতে বিষয়টোক লৈ মাৰ্ঘেৰিটা সাংবাদিক সংস্থাই প্ৰতিক্ৰিয়া প্ৰকাশ কৰিছে।

এক প্ৰেছ বাৰ্তাৰ জৰিয়তে মাৰ্ঘেৰিটা সাংবাদিক সংস্থা তথা তিনিচুকীয়া জিলা সাংবাদিক সন্থাৰ সাধাৰণ সম্পাদক ৰাণাজ্যোতি নেওগে এই সম্পৰ্কত ‘অসম চৰকাৰক দৃঢ় স্থিতি গ্ৰহণ কৰি ৰাজহুৱা খণ্ডৰ প্ৰতিষ্ঠানটো যাতে কোনো পধ্যে বন্ধ নহয় সেইয়া এসপ্তাহৰ ভিতৰত নিশ্চিত কৰিবলৈ’ দাবী জনায়।

ইয়াৰ অন্যথা ‘প্ৰতিষ্ঠানটোৰ স্বাৰ্থত’ ৰাইজ আৰু দল সংগঠনকলৈ তীব্ৰ গণ আন্দোলন গঢ়ি তুলিব বুলিও নেওগৰ লগতে সংস্থাৰ সভাপতি ৰামপ্ৰসাদ আম্বেদকাৰ আৰু মুখপাত্ৰ মানস প্ৰতিম গগৈয়ে মন্তব্য কৰে৷

উল্লেখযোগ্য্ যে শেহতীয়াকৈ দিহিং-পাটকাইত কয়লা খননক লৈ বিতৰ্ক আৰু প্ৰতিবাদ চলি থকাৰ মাজতে  উত্তৰ-পূব কয়লাক্ষেত্ৰ, মাৰ্ঘেৰিটাৰ মহাপ্ৰবন্ধকে উপযুক্ত কৰ্তৃপক্ষৰ অনুমোদন মৰ্মে সকলো খনন অভিযান সাময়িকভাৱে বাতিল কৰা হয় বুলি যোৱা ৩ জুনত এক নিৰ্দেশ জাৰি কৰিছিল।

লগতে পঢ়ক প্ৰতিবাদ-বিতৰ্কৰ মাজতে উঃপূঃ কয়লাক্ষেত্ৰত সকলো খনন বাতিলৰ নিৰ্দেশ ক’ল ইণ্ডিয়া লিমিটেডৰ

NEC/GM/2020/34-I নং পত্ৰ যোগে জাৰি কৰা একেটা নিৰ্দেশতে ইতিমধ্যে খনন কৰি জমা ৰখা কয়লা সৰবৰাহৰ ক্ষেত্ৰত অনুমতি দিয়া হৈছে৷

প্ৰতিষ্ঠানটোৰ কলিকতাস্থ মুখ্য কাৰ্যালয়ৰ নিদেৰ্শ মৰ্মে মহাপ্ৰবন্ধকে জাৰি এই নিৰ্দেশৰ পিছতে টিৰাপ কলিয়ৰীত কয়লা খনন চলাই অহা মাইনিং কোম্পানীটোৰ পৰিচালক কৰ্ণেল গগৈয়ে কয় যে বহুপূৰ্বেই প্ৰতিষ্ঠানটোৰ শ্ৰমিকসকলক যিকোনো মুহূৰ্ততে উৎপাদন বন্ধ হ’ব বুলি আশংকা কৰি জাননী জাৰি কৰি ৰখা হৈছিল।

কিছুদিন পূৰ্বে তিনিচুকীয়া জিলা সাংবাদিক সন্থাৰ উপ সভাপতি পৰাগ ভূঞা আৰু সাধাৰণ সম্পাদক ৰাণাজ্যোতি নেওগৰ নেতৃত্বত ক্ষেত্ৰভিত্তিক পৰ্যবেক্ষণৰ বাবে এটা প্ৰতিনিধি দল আহোতে মহাপ্ৰবন্ধক যুগল কুমাৰ বৰা, শ্ৰমিকনেতা ভাৰতভূষণ বৰঠাকুৰ, মন্তোষ তায়ে আদিয়ে প্ৰতিষ্ঠানটোৰ শীৰ্ষমহলে একপ্ৰকাৰে বন্ধ কৰাৰ ইংগিত দিয়াৰ কথা ব্যক্ত কৰিছিল৷

উজনি অসমৰ বিশেষকৈ তিনিচুকীয়া জিলাৰ মাৰ্ঘেৰিটাৰ পৰা জাগুনলৈকে অৰ্থনৈতিক ভেটি হিচাবে পৰিগণিত হৈ আহিছে উত্তৰ পূৱ কয়লা ক্ষেত্ৰ মাৰ্ঘেৰিটা৷ উদ্যোগটোত প্ৰত্যক্ষ ভাবে ৪ হেজাৰৰো অধিক স্থায়ী আৰু অংশকালীন কৰ্মচাৰী জড়িত হৈ আছে৷

উদ্যোগটোৰ বছৰি Turnover প্ৰায় ৪৫০ কোটি টকা, বছৰি প্ৰায় ১০০ কোটি টকা চৰকাৰী ৰাজহ যেনে District Mineral Fund,  Royalty আৰু অন্যান্য কৰৰ বাবদ আদায় দি আহিছে বুলি ক’ল ইণ্ডিয়াৰ সূত্ৰত প্ৰকাশ৷

‘ৰাষ্ট্ৰীয় পৰ্যায়ত শ্ৰেষ্ঠ মুখ্যমন্ত্ৰীৰ সন্মান লাভ কৰা সৰ্বানন্দ সোণোৱালৰ কাৰ্যকালত বৃটিছৰ আমোলত স্থাপিত প্ৰতিষ্ঠানটো ইতিহাস হ’ব লগা হ’লে কাললৈ কুখ্যাতি ৰৈ যাব বুলি প্ৰেছ বাৰ্তাৰ জৰিয়তে মাৰ্ঘেৰিটা সাংবাদিক সন্থাৰ সাধাৰণ সম্পাদক ৰাণাজ্যোতি নেওগে মন্তব্য কৰে।