আমি ক’বলৈ উলাইছোঁ এটা বিশেষ প্ৰেমৰ সম্পৰ্কৰ কথা। এগৰাকী তৃতীয় লিংগৰ ব্যক্তিৰ লগত বিবাহপাশাত আৱদ্ধ হোৱাই হ’ল কাল, যাৰ বাবে হত্যাৰ ভাবুকি দিলে পৰিয়ালে।
ইনষ্টাগ্ৰামত চিনাকী হৈ পাছত প্ৰেমত পৰিছিল দুয়ো। তাৰপিছতেই বিবাহ পাশত আৱদ্ধ হ’ল এজন যুৱক আৰু তৃতীয় লিংগৰ ব্যক্তি । পিছে বিয়া পাতি সুখী হ’ব পৰা নাই তেওঁলোক । কিয়নো তৃতীয় লিংগৰ ব্যক্তি হোৱাৰ বাবেই পৰিয়ালৰ অত্যাচাৰৰ সন্মুখীন দম্পতীহাল।
বিহাৰত সংঘটিত হৈছে এই চাঞ্চল্যকৰ ঘটনা । ৰাজধানী চহৰ পাটনাত সংঘটিত হৈছে এই ঘটনা । তৃতীয় লিংগৰ ব্যক্তিৰ সৈতে বিয়া পাতি বিপদত পৰিছে এজন যুৱক । বিবাহৰ পাছতে তৃতীয় লিংগৰ ব্যক্তি আৰু যুৱকজনক হত্যাৰ ভাবুকি দিছে পৰিয়ালে । আনহাতে তৃতীয় লিংগৰ বোৱাৰীৰ পৰা ৬০ লাখ টকাৰ যৌতুকো বিচাৰিছে যুৱকজনৰ পৰিয়ালৰ লোকে ।
উপায়হীন হৈ নিজৰ পৰিয়ালৰ বিৰুদ্ধে আৰক্ষীৰ কাষ চাপিছে তেওঁলোকে। অভিযোগ অনুসৰি বিয়াৰ পাছতে পৰিয়ালৰ লোকসকলে তেওঁক প্ৰহাৰ কৰিছে আৰু তেওঁক ঘৰৰ পৰা বাহিৰ কৰি দিছে । একে সময়তে, যুৱকজনক হত্যা কৰাৰ ভাবুকিও দিছে পৰিয়ালৰ লোকে ।
ভুক্তভোগী ৰবি কুমাৰ নামৰ যুৱকজনে তেওঁৰ পিতৃ-মাতৃ আৰু জ্যেষ্ঠ ভাতৃৰ বিৰুদ্ধে স্থানীয় আৰক্ষী থানাত লিখিত অভিযোগ দাখিল কৰিছে আৰু ন্যায় বিচাৰিছে ।
উল্লেখ্য যে তেওঁলোকে ২০২৩ চনৰ ২৫ জুনত এটা মন্দিৰত বিবাহ পাশত আৱদ্ধ হয় । বিবাহৰ পাছত পত্নীক ঘৰলৈ লৈ যোৱাৰ পিছত পিতৃ, মাতৃ আৰু জ্যেষ্ঠ ভাতৃয়ে যুৱকজনক প্ৰহাৰ কৰাৰ অভিযোগ কৰিছে । লগতে তেওঁলোকক ঘৰৰ পৰা বাহিৰ কৰি দিয়া বুলিও যুৱকজনে অভিযোগ উত্থাপন কৰে ।
দম্পতীহালে অভিযোগ কৰা মতে যোৱা ১৩ জুলাইত বাইকত অহা দুৰ্বৃত্তই তেওঁলোকক হত্যাৰ চেষ্টা কৰিছিল । অৱশ্যে কোনোমতে তেওঁলোকে প্ৰাণ ৰক্ষা কৰি পলায়ন কৰিছে । যুৱকজনে অভিযোগ কৰা মতে তেওঁ পৰিয়ালৰ লোকসকলে পত্নীক কিন্নৰ বুলি কৈও বাৰে বাৰে অপমানিত কৰিছে । দানাপুৰ আৰক্ষীয়ে জনোৱা মতে ঘটনা সন্দৰ্ভত গোচৰ ৰুজু কৰি তদন্ত চলাই থকা হৈছে ।
