বড়োলেণ্ড আন্দোলনৰ শ্বহীদক সাহাৰ্য্য প্ৰদান; অসম চৰকাৰক ধন্যবাদ বিটিচি প্ৰধানৰ
কোকৰাঝাৰৰ বডৌফা সাংস্কৃতিক প্ৰকল্পত আজি অনুষ্ঠিত হোৱা এক গাম্ভীৰ্য্যপূৰ্ণ অনুষ্ঠানত বড়োলেণ্ড আন্দোলনত প্ৰাণ আহুতি দিয়া শ্বহীদৰ পৰিয়ালৰ আত্মীয়সকললৈ পাঁচ লাখ টকাকৈ আৰ্থিক সাহাৰ্য্য প্ৰদান কৰা হয়।
অসম চৰকাৰে শ্বদীদৰ পৰিয়াললৈ আগবঢ়োৱা অনুদান আজি বিটিচি পৰিষদে আনুষ্ঠানিকভাবে বড়োলেণ্ড আন্দোলনত আত্মবলিদান দিয়া শ্বহীদৰ পৰিয়ালৰ লোকৰ হাতত চেক যোগে তুলি দিয়ে।
বডৌফা সাংস্কৃতিক প্ৰকল্পত অনুষ্ঠিত হোৱা অনুষ্ঠানটোত বিটিএডি অঞ্চলৰ ২৮০ টা শ্বহীদ পৰিয়ালৰ আত্মীয়ই অংশগ্ৰহণ কৰি চৰকাৰে আগবঢ়োৱা অনুদান গ্ৰহণ কৰে।
অনুষ্ঠানত অংশগ্ৰহণ কৰে বি টি চি প্ৰধান হাগ্ৰামা মহিলাৰী, প্ৰমীলা ৰাণী ব্ৰহ্ম, সাংসদ বিশ্বজিৎ দৈমাৰী, ৰিহন দৈমাৰীকে ধৰি বি পি এফৰ বহু নেতা আৰু কৰ্মীয়ে।
আনহাতে, অনুষ্ঠানত উপস্থিত থাকি বি টি চি প্ৰধান হাগ্ৰামা মহিলাৰীয়ে অসম চৰকাৰ আৰু মুখ্য মন্ত্ৰী সৰ্বানন্দ সোণোৱালক স্বহীদৰ পৰিয়ালক দিয়া স্বীকৃতিৰ বাবে কৃতজ্ঞতা জ্ঞাপন কৰে। তেওঁ কয় যে ধন ডাঙৰ কথা নহয় কিন্তু আজি শ্বহীদসকলৰ পৰিয়ালে যি সন্মান লাভ কৰিলে সেয়া সচাকৈ প্ৰশংসাৰ যোগ্য।
সাংবাদিকে লোকসভা নিৰ্বাচনত বি পি এফৰ প্ৰদৰ্শন সম্বন্ধে সোধা প্ৰশ্নৰ উত্তৰ দিয়াৰ পৰা মহিলাৰী বিৰত থাকি কয় আজি এটা পবিত্ৰ দিন আজি ৰাজনীতিৰ কথা নাপাতো।
প্ৰমীলা ৰাণী ব্ৰহ্ম আৰু ৰাজ্যসভাৰ সাংসদ বিশ্বজিৎ দৈমাৰীয়েও সভাত ভাষণ দি শ্বহীদৰ ত্যাগক স্মৰণ কৰি বড়োলেণ্ডৰ উন্নতিৰ হকে তেওঁলোক কাম কৰি যোৱাৰ ক্ষেত্ৰত বদ্ধপৰিকৰ বুলি মন্তব্য কৰে।