চলিত বৰ্ষৰ জানুৱাৰী মাহৰ ৬ তাৰিখে কাজিৰঙাৰ অগৰাতলি বনাঞ্চলত কৰ্মৰত অৱস্থাত নিহত হোৱা দিলীপ বৰুৱা নামৰ বনকৰ্মী গৰাকীৰ পৰিয়াললৈ আজি ৫ লাখ টকাৰ এককালীন সাহায্য প্ৰদান কৰা হয় ৷
কাজিৰঙাৰ ডি এফ অ ৰোহিনী বল্লভ শইকীয়াৰ কাৰ্যালয়ত আয়োজিত এক বিশেষ অনুষ্ঠানত প্ৰয়াত বনকৰ্মী গৰাকীৰ পৰিবাৰ অঞ্জলি বৰুৱাৰ হাতত ডি এফ অ’ শইকীয়াই বিশ্ব প্ৰকৃতি নিধি চমুকৈ ডাব্লিউ ডাব্লিউ এফ আৰু আই চি আই চি আই প্ৰডেঞ্চিয়েলৰ এক যৌথ আঁচনিৰ আধাৰত তিনি লাখ টকা আৰু ৰাষ্ট্ৰীয় বাঘ সংৰক্ষণ প্ৰাধিকাৰীৰ তৰফৰ পৰা দুই লাখ টকাৰ দুখন চেক প্ৰদান কৰে ৷
এই উপলক্ষে আয়োজিত অনুষ্ঠানত ডি এফ অ’ৰ উপৰিও বিশ্ব প্ৰকৃতি নিধিৰ জ্যেষ্ঠ সমন্বয়ক প্ৰনৱ জ্যোতি বৰা, ত্ৰিদিপ শৰ্মা, দিপান্দিতা ভট্টচাৰ্য, কাজিৰঙাৰ সাংবাদিক স্বপন নাথ, গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন উত্তম শইকীয়া, অগৰাতলিৰ বনাঞ্চলিক বিষয়া ধৰণী বৰা আৰু কাৰ্য্যালয়ৰ বৰবাবু অজিত শইকীয়া উপস্থিত থাকে।
উল্লেখযোগ্য যে ইয়াৰ পূৰ্বেও বিশ্ব প্ৰকৃতি নিধিৰ উদ্যোগত কাজিৰঙাত কৰ্মৰত অৱস্থাত ২০১৭ চনৰ ফেব্ৰুৱাৰিত নিহত হোৱা গৌতম বৰুৱা, ২০১৮ চনৰ এপ্ৰিল আৰু আগষ্টত নিহত ক্ৰমে জয়কান্ত পেগু আৰু গনেশ নেৱাৰকো তিনি লাখকৈ এককালীন সাহায্য প্ৰদান কৰা হৈছিল।
ইয়াৰ উপৰিও কৰ্মৰত অৱস্থাতে গুৰুতৰভাৱে আহত প্ৰবীন গগৈ, হাসমত আলি আৰু প্ৰনৱ জ্যোতি কলিতাক বিশ্ব প্ৰকৃতি নিধিৰ উদ্যোগতে গুৱাহাটীৰ এপ’ল চিকিৎসালয়ত চিকিৎসা প্ৰদান কৰা হৈছিল।