দেশৰ গাড়ীৰ বজাৰত সুদীৰ্ঘ সময় ধৰি মন্দাৱস্থা অব্যাহত থকাৰ বাবে গভীৰ সংকটৰ সন্মুখীন হ’ব লগীয়া হৈছে ভাৰতৰ গাড়ী নিৰ্মাতা প্ৰতিষ্ঠান সমূহ।
যোৱা ৭ মাহৰ পৰা ভাৰতত যাত্ৰীবাহী গাড়ীৰ লগতে দুচকীয়া বাহনৰ বিক্ৰী অভাৱনীয়ভাৱে হ্ৰাস পাইছে। সেয়ে ভাৰতীয় গাড়ী নিৰ্মাতা কোম্পানী সমূহে এনেবোৰ গাড়ীৰ উৎপাদন বন্ধ কৰিব বুলি জানিব পৰা গৈছে।
শেহতীয়া এক সমীক্ষা অনুসৰি জুন মাহৰ আৰম্ভণিলৈকে কোম্পানীৰ ডিলাৰত ৩৫ হাজাৰ কোটি টকাৰ যাত্ৰীবাহী গাড়ী বিক্ৰী নোহোৱাকৈ ৰৈ গৈছে।
ইয়াৰ বিপৰীতে দুচকীয়া বাহনৰ ওপৰত চলোৱা সমীক্ষা অনুসৰি বিক্ৰী নোহোৱাকৈ ৰৈ গৈছে তিনি মিলিয়ন গাড়ী যাৰ মূল্য ১৭ হাজাৰ কোটি টকা।
এনেবোৰ কাৰণৰ বাবেই চাৰিচকীয়া আৰু দুচকীয়া বাহন উৎপাদনকাৰী কোম্পানী সমূহে ইয়াৰ উৎপাদন বন্ধ কৰাৰ সিদ্ধান্ত লয়। ইতিমধ্যে মাৰুতি ছুজুকি, মহিন্দ্ৰা আৰু টাটা মটৰ্ছৰ দৰে কোম্পানী সমূহে প্ৰথমবাৰৰ বাবে মে’ মাহত উৎপাদন বন্ধ কৰি দিছিল।
মাৰুতি ছুজুকিয়ে দ্বিতীয়বাৰৰ বাবে ২৩-৩০ জুনলৈ বন্ধ ৰাখিছিল উৎপাদন। আনহাতে টাটা মটৰ্ছে ২৭ মে’ৰ পৰা ৩ জুনলৈ আৰু হোণ্ডাই ৫ৰ পৰা ৮ জুনলৈকে বন্ধ ৰাখিছিল।
আনহাতে ৰেন’ল্ট নিছান আৰু স্কোডা অট’ৱেও যোৱা জুন মাহত ৪ৰ পৰা ১০ দিন পৰ্যন্ত গাড়ীৰ উৎপাদন বন্ধ ৰখা বুলি জানিব পৰা গৈছে।
উল্লেখ্য যে গাড়ী উৎপাদন বন্ধ কৰি দিয়াৰ ফলত মে’-জুন মাহৰ সময়ছোৱাত ইণ্ডাষ্ট্ৰি সমূহৰ আউটপুট ২০-২৫ শতাংশ কমি যোৱা পৰিলক্ষিত হয়।
মন কৰিব লগীয়া যে গাড়ীৰ বজাৰত সুদীৰ্ঘ সময় ধৰি মন্দাৱস্থা অব্যাহত থকাৰ ফলত আগন্তুক দিনত প্ৰায় দহ লাখ লোকে চাকৰি হেৰুৱাব বুলি আশংকা ব্যক্ত কৰিছে গাড়ী নিৰ্মাতা প্ৰতিষ্ঠানসমূহে।
