ভাৰতীয় অলিম্পিক সন্থাৰ (ইণ্ডিয়ান অলিম্পিক এছ’চিয়েশ্যন) গুৰুত্বপূৰ্ণ পদৰ পৰা পদত্যাগ কৰিছে মেৰী কমে। দেওবাৰে তেওঁ পদত্যাগৰ কথা ঘোষণা কৰে। অৱশ্যে বক্সিং কিংবদন্তিগৰাকীয়ে পদত্যাগৰ কাৰণ স্পষ্ট কৰা নাই।
ভাৰতীয় অলিম্পিক সন্থাৰ এথলিটসকলৰ কমিছনৰ মুৰব্বী আছিল মেৰী কম। ক্ৰীড়া বিভাগৰ কাৰ্যনিৰ্বাহক সমিতিতো তেওঁ আছিল। ২০১২ চনৰ অলিম্পিকৰ ব্ৰঞ্জ বিজয়ী বক্সাৰগৰাকীয়ে দুয়োটা পদৰ পৰা পদত্যাগ কৰিছে।
সৰ্বভাৰতীয় সংবাদ মাধ্যমৰ বাতৰি অনুসৰি তেওঁ এথলীটছসকলৰ কমিছনৰ নিজা হোৱাটছএপ গ্ৰুপলৈ বিদায় বাৰ্তা প্ৰেৰণ কৰে। য’ত তেওঁ লিখিছে, ‘’ইণ্ডিয়ান অলিম্পিক এছ’চিয়েচনত মোৰ বহুত ভাল সময় পাৰ হৈছে। যিটো মোৰ জীৱনৰ এটা গুৰুত্বপূৰ্ণ অধ্যায়। কিন্তু দুখৰ সৈতে ঘোষণা কৰিছো যে মই অলিম্পিক সন্থাৰ দায়িত্ব পৰা পদত্যাগ কৰাৰ সিদ্ধান্ত লৈছো। মই পদত্যাগ কৰিছো। সকলোলৈ শুভেচ্ছা থাকিল।‘’
কিন্তু পদত্যাগ কৰাৰ কাৰণক লৈ বিভ্ৰান্তিৰ সৃষ্টি হৈছে। মেৰী কমে পদত্যাগ পত্ৰও প্ৰেৰণ কৰা নাই। ফলত অলিম্পিক সংগঠনটোৱে এতিয়া অপেক্ষা কৰি আছে। তাৰপিছত বাকী সিদ্ধান্ত লোৱা হ’ব।
এই আয়োগত আছে শৰথ কমল, গগন নাৰং, পি ভি সিন্ধু, ৰাণী ৰামপাল আদি কেইবাজনো তাৰকা খেলুৱৈ। অভিনৱ বিন্দ্ৰাও এই সংগঠনত আছিল। ২০২২ চনত পি টি উষা ইণ্ডিয়ান অলিম্পিক এছ’চিয়েশ্যনৰ মুৰব্বী হোৱাৰ পাছত এই দহজনীয়া আয়োগ গঠন হৈছিল। এই আয়োগৰ মূল দায়িত্ব খেলুৱৈসকলৰ হৈ কথা কোৱা।
কিন্তু সত্যটো হ’ল অলিম্পিক সংগঠনটোৰ এথলিটসকলৰ সংগঠনটো দীৰ্ঘদিন ধৰি নিষ্ক্ৰিয় হৈ আছে। প্ৰথম অৱস্থাত কেইখনমান সভা হৈছিল যদিও পিছলৈ সেই কাম কমিবলৈ ধৰিলে। অভিনৱ বিন্দ্ৰাই এই বিষয়ে একাধিকবাৰ মাত মাতিছে। শেহতীয়াকৈ পিটি উষা আৰু আন সদস্যসকলৰ মাজত মতানৈক্যৰ খবৰ পোহৰলৈ আহিছে। তাত এই আয়োগৰ গুৰুত্ব আৰু কমি গৈছে। প্ৰশ্ন উঠিছে, মেৰী কমৰ পদত্যাগৰ কাৰণ সেইটোৱেই নেকি? উল্লেখ্য যে তেওঁ অলিম্পিকৰ পূৰ্বে চেফ দ্য মিছনৰ দায়িত্বও এৰিছিল।
