টকিঅ’ অলিম্পিকলৈ যোগ্যতা অৰ্জন মেৰীকমৰ
টকিঅ’ অলিম্পিকলৈ যোগ্যতা অৰ্জন কৰিলে মণিপুৰী বক্সাৰ এম চি মেৰীকমে। জৰ্দানৰ ৰাজধানী আমানত অনুষ্ঠিত অলিম্পিকৰ যোগ্যতা অৰ্জন মেচৰ ছেমি ফাইনেলত প্ৰৱেশ কৰি তেওঁ অলিম্পিকৰ বাবে যোগ্যতা অৰ্জন কৰে।
ছবাৰৰ বিশ্ব চেম্পিয়ন মেৰি কমে কোৱাৰ্টাৰ ফাইনেলত ফিলিপাইনছৰ আইৰিছ মেগনোৰ বিৰুদ্ধে খেলি সহজ বিজয় সাব্যস্ত কৰে।
মেচখন ৫-০ৰ ব্যৱধানত জয়ী হয় মেৰীকম।
৩৭ বছৰীয়া মেৰীকমে প্ৰতিযোগিতাৰ ছেমি ফাইনেলত চীনৰ য়ুৱান চাঙৰ বিৰুদ্ধে অৱতীৰ্ণ হ’ব।
ভাৰতৰ মহান বক্সাৰ গৰাকীৰ এয়া হ’ব দ্বিতীয় অলিম্পিক। ইয়াৰ পূৰ্বৰ অৰ্থাৎ ২০১৬ ৰিঅ’ অলিম্পিকত যোগ্যতা অৰ্জনত ব্যৰ্থ হৈছিল মেৰীকম।
উল্লেখ্য যে মেৰীকমে প্ৰথমবাৰৰ বাবে অলিম্পিকত অংশ লৈছিল ২০১২ত। লণ্ডনত অনুষ্ঠিত হোৱা প্ৰতিযোগিতাখনত মেৰীয়ে ব্ৰঞ্জৰ পদক অৰ্জন কৰিবলৈ সক্ষম হৈছিল।
মেৰীকমৰ পূৰ্বে অসমৰ লাভলিনা বৰগোহাঁই, পূজা ৰাণী আৰু বিকাশ কৃষ্ণনেও টকিঅ’ অলিম্পিকৰ বাবে যোগ্যতা অৰ্জন কৰিছে।