গুৱাহাটীৰ আৱাসিক অঞ্চল গণেশপাৰাৰ চম্পকনগৰত ডকাইতিৰ এক ঘটনাই চাঞ্চল্যৰ সৃষ্টি কৰিছে। সোমবাৰে নিশা ফটাশিল আমবাৰী আৰক্ষী থানাৰ অন্তৰ্গত স্নেহাছৰয় এপাৰ্টমেণ্ট কমপ্লেক্সত এক অস্ত্ৰধাৰী ডকাইতিৰ ঘটনাত এগৰাকী মহিলা আহত হয়।
ঘটনা খবৰ পোৱাৰ পিছতে আৰক্ষীয়ে ঘটনাস্থলীত উপস্থিত হৈ তদন্ত আৰম্ভ কৰিছে। চিচিটিভিৰ ফুটেজৰ পৰা অনুমান কৰা হৈছে যে অভিযুক্তসকল অট্টালিকাটোৰ সৱিশেষ তথা বাসিন্দাসকলৰ গতিবিধিৰ সৈতে পৰিচিত।
আৰক্ষী বিষয়া এজনে কয় যে, ‘চিচিটিভিৰ ফুটেজসমূহ সুক্ষ্ণভাৱে পৰীক্ষা কৰা হৈছে, আৰু অপৰাধত ব্যৱহৃত বাহনখনৰ সন্ধান উলিওৱাৰ প্ৰচেষ্টা অব্যাহত আছে। ঘটনাৰ সময়ত ঘৰত নথকা ব্যৱসায়ী অনিল ডেকাৰ বাসগৃহত নিশা প্ৰায় ৯ বজাত সংঘটিত হয় এই ঘটনা। পৰিয়ালৰ লোকে জনোৱা মতে, বাহিৰত অধ্যয়ন কৰি থকা কন্যাক ড্ৰপ কৰিবলৈ গৈছিল ডেকাই।
ভুক্তভোগীৰ বক্তব্য আৰু চিচিটিভি ফুটেজ অনুসৰি, মুখত আংশিকভাৱে ক’লা মাস্কেৰে ঢাকি ৰখা চাৰিজন অচিনাক্ত লোকে এপাৰ্টমেণ্টটোত সোমাই দুৱাৰৰ বেল বজায়। অনিল ডেকাৰ পত্নী কৰবী ডেকাই দুৱাৰখন খুলি দিয়াৰ লগে লগে লোককেইজন বলপূৰ্বকভাৱে ঘৰৰ ভিতৰলৈ সোমাই পৰে।
কৰবী ডেকাই কয়, ‘তেওঁলোকে লগে লগে পিষ্টল আৰু চোকা অস্ত্ৰ দেখুৱাই টকা নিদিলে হত্যা কৰাৰ ভাবুকি দিয়ে।‘
আৰক্ষীক জনোৱা মতে, অভিযুক্তই হিন্দীতে ২ লাখ টকা দাবী কৰিছিল। যেতিয়া তেওঁ তেওঁৰ হাতত সেই ধন নাই বুলি কয় তেতিয়া লোককেইজনে তেওঁক আক্ৰমণ কৰিবলৈ আৰম্ভ কৰে বুলি অভিযোগ উঠিছে।
তেওঁ কয়, ‘মই প্ৰথমে তেওঁলোকক ঘৰত ৰখা ৫০ হাজাৰ টকা দিছিলো।পিছত ভয়ত ছচাইটিৰ সম্পৰ্কীয় পুঁজিৰ পৰা আৰু এক লাখ টকা দিলোঁ। তেওঁলোকে মোৰ পিন্ধা সোণৰ খাৰু আৰু তিনিটা আঙঠিও কাঢ়ি লৈ গ’ল।’
ডকাইতকেইটা প্ৰায় ৪০ মিনিট ধৰি এপাৰ্টমেণ্টটোৰ ভিতৰতে থকা বুলি জানিব পৰা গৈছে। এই সময়ছোৱাত অধিক ধন দিব নোৱাৰাৰ বাবে কৰবী ডেকাক বাৰে বাৰে ঘুচা আৰু লাথ মাৰিছিল। তলৰ মহলাত কুকুৰটোৰ বাবে খাদ্য সাজু কৰি থকা পৰিয়ালটোৰ চালকজনে তেওঁৰ চিঞৰ শুনি ওপৰলৈ লৰালৰিকৈ উঠি আহে। তেওঁকে ভাবুকি আৰু আক্ৰমণ কৰাৰ অভিযোগ উত্থাপন কৰা হৈছে।
আৰক্ষীয়ে জনায় যে দোষীক চিনাক্ত কৰি গ্ৰেপ্তাৰ কৰিবলৈ একাধিক টিম গঠন কৰা হৈছে।
