উত্তৰ প্ৰদেশৰ মহম্মদ আখলাকৰ পৰিয়ালে গুজৰাটৰ বিলকিছ বানোৰ দৰে এক তিক্ত অভিজ্ঞতাৰ সন্মুখীন হৈছে। প্ৰায় এক দশক পূৰ্বে, নিজৰ ঘৰত গো-মাংস ৰখাৰ মিছা অভিযোগত যোগী ৰাজ্যৰ গৌতম বুদ্ধ নগৰৰ বাসিন্দা মহম্মদ আখলাকক উগ্ৰ হিন্দুত্ববাদীসকলে মৰিয়াই মৰিয়াই হত্যা কৰিছিল। সেই আক্ৰমণত গুৰুতৰভাৱে আহত হৈছিল তেওঁৰ পুত্ৰ ডানিছ, যিয়ে এতিয়াও চিকিৎসা গ্ৰহণ কৰি আছে।
কিন্তু যোগী আদিত্যনাথৰ প্ৰশাসনে এই ঘটনাত ধৃত ১৯ জন অভিযুক্তক নিৰ্দোষী বুলি দাবী কৰি গৌতম বুদ্ধ নগৰ জিলা উচ্চ ন্যায়ালয়ত এখন আপিল দাখিল কৰিছে।
গৌতম বুদ্ধ নগৰ জিলাৰ সহকাৰী চৰকাৰী উকীল ভাগ সিঙে আদালতত চৰকাৰী নিৰ্দেশৰ বিষয়ে অৱগত কৰে। আবেদনখনত উত্তৰ প্ৰদেশ আৰক্ষীৰ অতিৰিক্ত সঞ্চালক ব্ৰিজেছ কুমাৰ মিশ্ৰৰ এখন চিঠিও সংলগ্ন কৰা হৈছে। তাত উল্লেখ কৰা হৈছে যে নিহত আখলাকৰ পত্নী ইক্ৰামন বিবি আৰু পুত্ৰ-কন্যাই আদালতত সঘনাই নিজৰ বক্তব্য সলাইছিল আৰু তেওঁলোকৰ কথাত বহুতো অসংগতি পোৱা গৈছে।
৫২ বছৰীয়া আখলাকক হত্যা কৰাৰ সময়ত উত্তৰ প্ৰদেশত অখিলেশ যাদৱৰ চৰকাৰ ক্ষমতাত আছিল। তেতিয়া আৰক্ষীয়ে তৎক্ষণাৎ অভিযান চলাই অভিযুক্তসকলক গ্ৰেপ্তাৰ কৰিছিল।
আৰম্ভণিৰ তদন্তত পোহৰলৈ আহিছিল যে আখলাকৰ পৰিয়ালৰ ফ্ৰীজৰ ভিতৰত গো-মাংস পোৱাৰ অভিযোগটো সম্পূৰ্ণ ভিত্তিহীন আছিল। উত্তৰ প্ৰদেশ আৰক্ষীৰ ফৰেনছিক লেবৰেটৰীয়েও জনাইছিল যে ফ্ৰীজত ছাগলীৰ মাংস পোৱা গৈছিল।
কিন্তু পিছত মথুৰাত থকা ভাৰত চৰকাৰৰ লেবৰেটৰীয়ে উত্তৰ প্ৰদেশ আৰক্ষীৰ ফৰেনছিক ৰিপোৰ্টটো লৈ সংশয় প্ৰকাশ কৰে আৰু কয় যে ফ্ৰীজত থকা মাংসৰ মাজত কিছু গো-মাংসও আছিল। সেই ৰিপোৰ্টৰ ভিত্তিত যোগী আদিত্যনাথৰ প্ৰশাসনে আখলাকৰ পৰিয়ালৰ বিৰুদ্ধে গোচৰ ৰুজু কৰে।
বৰ্তমান এই গোচৰৰ অভিযুক্ত সকলোৱেই জামিনত মুক্ত। অভিযুক্তসকলৰ মাজৰ এজনৰ ইতিমধ্যে মৃত্যু হৈছে।
আখলাকৰ পত্নী আৰু পৰিয়ালৰ আন সদস্যসকলে স্থানীয় সংবাদ মাধ্যমৰ আগত কৈছে যে গোচৰটো লৈ তেওঁলোকৰ আৰম্ভণিৰ পৰাই সংশয় আছিল। তেওঁলোকৰ মতে, আদালতত চৰকাৰ পক্ষই দোষীসকলৰ বিৰুদ্ধে দৃঢ়তাৰে প্ৰশ্ন কৰা নাছিল।
এক দশক পূৰ্বে আখলাকক হত্যা কৰা ঘটনাক লৈ সমগ্ৰ দেশত তীব্ৰ আলোড়নৰ সৃষ্টি হৈছিল। বৰ্তমান এই হত্যাকাণ্ডক লৈ উত্তৰ প্ৰদেশ চৰকাৰৰ ভূমিকাক লৈ হোৱা আলোচনাৰ মাজতে গুজৰাটৰ বিলকিছ বানোৰ প্ৰসংগটো আহি পৰিছে।
গুজৰাট দাঙ্গাৰ সময়ত বিলকিছৰ পৰিয়ালৰ ১১ জনক হত্যা কৰা হৈছিল আৰু অন্তঃসত্ত্বা বিলকিছ গণধৰ্ষণৰ বলি হৈছিল। নিম্ন আদালতত অভিযুক্তসকলৰ কেইজনমানৰ যাৱজ্জীৱন কাৰাদণ্ড হৈছিল।
২০২২ চনত গুজৰাট চৰকাৰে বিশেষ ক্ষমতা প্ৰয়োগ কৰি অপৰাধীসকলক মুক্তি দিছিল। পিছত অৱশ্যে উচ্চতম ন্যায়ালয়ৰ নিৰ্দেশত অপৰাধীসকলক পুনৰ জে’ললৈ ঘূৰি যাবলগীয়া হয়।
উত্তৰ প্ৰদেশৰ বিজেপি চৰকাৰৰ দৰেই গুজৰাট চৰকাৰেও আদালতে অপৰাধী বুলি সাব্যস্ত কৰা লোকসকলক নিৰ্দোষী বুলি দাবী কৰিছিল।
