মুম্বাইৰ দাদৰ অঞ্চলস্থিত এখন বিদ্যালয়ৰ পাকঘৰত আজি পুৱা সংঘটিত ভয়াৱহ অগ্নিকাণ্ডই তীব্ৰ চাঞ্চল্যৰ সৃষ্টি কৰিছে। এই অগ্নিকাণ্ডত তিনিগৰাকী লোক আহত হৈছে বুলি জানিব পৰা গৈছে।
প্ৰকাশিত খবৰ অনুসৰি পুৱা ৫.২১ বজাত ‘লেভেল -১’ পৰ্যায়ৰ জুই জ্বলি উঠে। প্ৰথম অৱস্থাত এই জুই বিদ্যালয় ভৱনৰ দ্বিতীয় মহলাত থকা এটা প্ৰ’গ্ৰাম হলৰ পাকঘৰত সীমাবদ্ধ আছিল।
পিছত ক্ৰমে বিয়পি পৰা জুয়ে ভয়াৱহ ৰূপ লয়। অগ্নিকাণ্ডৰ ফলত দ্বিতীয় মহলাৰ চালৰ কিছু অংশ খহি পৰাৰ লগতে বিদ্যালয় চৌহদত ৰখাই থোৱা দুখন গাড়ী ক্ষতিগ্ৰস্ত হয়।
স্থানীয় প্ৰশাসনৰ কৰ্মচাৰী এগৰাকীয়ে এই অগ্নিকাণ্ড সন্দৰ্ভত জানিবলৈ দিয়া মতে অগ্নিকাণ্ডৰ বিষয়ে জানিব পৰাৰ পিছতে বৈদ্যুতিক যোগান বন্ধ কৰা হয়।
পিছত দুটা ফায়াৰ এক্সটিংগুইচাৰ আৰু দুটা মটৰ পাম্পৰ এটা সৰু হোচ লাইন ব্যৱহাৰ কৰি জুই নুমুওৱা হয় বুলি তেওঁ লগতে উল্লেখ কৰে।
বিষয়াগৰাকীয়ে লগতে উল্লেখ কৰা মতে দুটা অগ্নি নিৰ্বাপক ইঞ্জিন, এখন টেংকাৰ আৰু এখন এম্বুলেন্স ঘটনাস্থলীলৈ তৎকালীনভাৱে প্ৰেৰণ কৰা কৰা হৈছিল।
অগ্নিকাণ্ডত আঘাতপ্ৰাপ্ত তিনিগৰাকী ব্যক্তিক স্থানীয় চিয়ান চিকিৎসালয়লৈ লৈ যোৱা হয়। তিনিওগৰাকী আহত লোক বৰ্তমান চিকিৎসাধীন হৈ আছে বুলি জানিব পৰা গৈছে।
ইফালে অগ্নিকাণ্ড সংঘটিত হোৱাৰ প্ৰকৃত কাৰণ এতিয়ালৈকে জানিব পৰা হোৱা নাই বুলি কৰ্তৃপক্ষই সদৰী কৰিছে। ইতিমধ্যে এই সন্দৰ্ভত তদন্ত আৰম্ভ কৰা হৈছে বুলি কৰ্তৃপক্ষই উল্লেখ কৰে।
