অষ্ট্ৰেলিয়া নিজৰ কঠোৰ জৈৱ সুৰক্ষা নীতি আৰু বন্যপ্ৰাণী সংৰক্ষণ আইনৰ বাবে সমগ্ৰ বিশ্বতে পৰিচিত। কৃষি, পৰিৱেশ আৰু স্থানীয় প্ৰজাতিসমূহক ক্ষতিৰ পৰা ৰক্ষা কৰিবলৈ দেশখনে দীৰ্ঘদিন ধৰি বিদেশী জীৱ-জন্তু, পোক-পৰুৱা আৰু উদ্ভিদৰ অবৈধ প্ৰৱেশ ৰোধ কৰাৰ বাবে কঠোৰ নিয়ম প্ৰযোজ্য কৰি আহিছে। ইয়াৰ মাজতে নিউ চাউথ ৱেলছ ৰাজ্যৰ বাথাৰ্ষ্ট চহৰত বিষয়াসকলে এতিয়ালৈকে আটাইতকৈ ডাঙৰ অভিযান চলাই ১ লাখৰো অধিক জীৱন্ত পঁইতাচোৰা জব্দ কৰিছে। এই অবৈধ পোকবোৰৰ আনুমানিক মূল্য প্ৰায় ২ লাখ অষ্ট্ৰেলিয়ান ডলাৰ বুলি কোৱা হৈছে, যিয়ে দেশখনত অবৈধ বিদেশী পোক-পৰুৱাৰ ব্যৱসায়ৰ ওপৰত এক নতুন তৰ্কৰ সৃষ্টি কৰিছে।
অষ্ট্ৰেলিয়াৰ জলবায়ু পৰিৱৰ্তন, শক্তি, পৰিৱেশ আৰু জল বিভাগৰ মতে, মে’ মাহত এজন বাণিজ্যিক ব্যৱসায়ীৰ তাত অভিযান চলাই মাদাগাস্কাৰ হিচিং পঁইতাচোৰা আৰু ডুবিয়া পঁইতাচোৰাৰ এক বৃহৎ পৰিমাণ জব্দ কৰা হয়। মাদাগাস্কাৰ হিচিং পঁইতাচোৰাক পৃথিৱীৰ আটাইতকৈ ডাঙৰ পঁইতাচোৰা প্ৰজাতিৰ ভিতৰত গণ্য কৰা হয় আৰু ইয়াৰ দৈৰ্ঘ্য ৫ ৰ পৰা ৮ চেণ্টিমিটাৰলৈকে হয়। বিভাগটোৱে প্ৰকাশ কৰা ছবিত এই জিলিকি থকা মুগা ৰঙৰ বিশাল পোকবোৰ মানুহৰ আঙুলিতকৈও ডাঙৰ দেখা গৈছিল। বিষয়াসকলে স্পষ্ট কৰি দিছে যে এই দুয়োটা বিদেশী প্ৰজাতিৰ আমদানি, পালন, প্ৰজনন আৰু বিক্ৰী অষ্ট্ৰেলিয়াত সম্পূৰ্ণৰূপে অবৈধ।
স্থানীয় সাপ ধৰা বিশেষজ্ঞ ষ্টেফানী লেচাৰে অষ্ট্ৰেলিয়ান ব্ৰডকাষ্টিং কৰ্পোৰেচনক জনাইছে যে এই ডাঙৰ আকাৰৰ পঁইতাচোৰাবোৰ সম্ভৱতঃ সৰীসৃপ বা বগাই ফুৰা জীৱ-জন্তুৰ খাদ্য হিচাপে ব্যৱহাৰ কৰা হৈছিল। তেওঁ কয় যে আকাৰত ডাঙৰ হোৱাৰ বাবে কম পোকতেই জেঠী আৰু আন সৰীসৃপৰ পেট ভৰি যায়, সেয়েহে এই ব্যৱসায়টো সস্তীয়া হয়। বিষয়াসকলে পোহনীয়া সৰীসৃপ ৰখা লোকসকলক অনুৰোধ কৰিছে যে তেওঁলোকে খাদ্যৰ বাবে ক্ৰিকেট বা উড ৰোচৰ দৰে আইনী প্ৰজাতিসমূহ ব্যৱহাৰ কৰে। বিভাগটোৱে সতৰ্ক কৰি দিছে যে বিদেশী পঁইতাচোৰাই বেমাৰ বিয়পাব পাৰে আৰু স্থানীয় বন্যপ্ৰাণীৰ বাবে গুৰুতৰ ভাবুকি কঢ়িয়াই আনিব পাৰে।
অষ্ট্ৰেলিয়াই দীৰ্ঘদিন ধৰি সীমান্ত সুৰক্ষা আৰু জৈৱ সুৰক্ষা নিয়ন্ত্ৰণক অতি গুৰুত্বসহকাৰে প্ৰণয়ন কৰি আহিছে। দেশখনে বিশ্বাস কৰে যে বাহিৰা পোক-পৰুৱা আৰু জীৱ-জন্তুৱে কৃষি তথা উদ্যান শস্য উদ্যোগৰ ব্যাপক ক্ষতি কৰিব পাৰে। বিভাগটোৱে কয় যে জব্দ কৰা পঁইতাচোৰাবোৰে পৰিৱেশগত বিপদাশংকা মূল্যায়নৰ মাজেৰে পাৰ হোৱা নাছিল, সেয়েহে এইবোৰৰ প্ৰভাৱক লৈ অনিশ্চয়তা আছিল। বিষয়াসকলে জনাইছে যে এই গোচৰত বৰ্তমানলৈকে কাৰো ওপৰত অভিযোগ উত্থাপন কৰা হোৱা নাই, কিন্তু জব্দ কৰা আটাইবোৰ পঁইতাচোৰা ধ্বংস কৰা হ’ব। লগতে বিভাগটোৱে এইটোও জনাইছে যে অবৈধ বিদেশী জীৱৰ সৈতে ধৰা পৰিলে লোকসকলৰ ওপৰত হাজাৰ হাজাৰ ডলাৰৰ জৰিমনা বিহা হ’ব পাৰে।
