দুৰ্যোগৰ জোকাৰণি এতিয়াও চম্ভালি উঠিব পৰা নাই নেপালে। ইফালে ভাৰতৰ ছিকিম ৰাজ্যত এক বৃহৎ দুৰ্যোগ সংঘটিত হৈছে। মাজনিশা পাহাৰ ভাঙি তীস্তা নদীত ভূমিস্খলন। ফলত হঠাতে পানীৰ সোঁত বন্ধ হৈ পৰিছে, সেয়ে যিকোনো মুহূৰ্ততে ভৈয়ামত বৃহৎ দুৰ্যোগৰ সৃষ্টি হ’ব পাৰে বুলি আশংকা কৰা হৈছে।
উত্তৰ ছিকিম পুনৰ এক বৃহৎ দুৰ্যোগৰ সন্মুখীন হৈছে। এই ভয়ংকৰ ভূমিস্খলন সংঘটিত হৈছে তীস্তা আৰু চিয়াকুং নদীৰ সংগমস্থলীত। প্ৰকাণ্ড প্ৰকাণ্ড শিল আৰু মাটি খহি পৰাৰ বাবে নদী দুখনৰ স্বাভাৱিক প্ৰবাহ সাময়িকভাৱে বন্ধ হৈ পৰিছে। পুনৰ তীস্তাত পানী জমা হোৱাৰ লগে লগে বিপদৰ আশংকা বাঢ়ি গৈছে। ছিকিমৰ মংগন জিলা প্ৰশাসনে পাহাৰৰ পৰা ভৈয়ামলৈকে হাই এলাৰ্ট জাৰি কৰিছে।
মংগন জিলা প্ৰশাসনে জনোৱা মতে, ৫ ছেপ্টেম্বৰ শনিবাৰে গভীৰ নিশাৰ পৰা ৬ ছেপ্টেম্বৰৰ পুৱাৰ ভিতৰত চিয়াকুং নদীৰ ওপৰৰ অৱবাহিকাত সংঘটিত হোৱা ভূমিস্খলনৰ ফলত নগা বনাঞ্চলৰ নতুনকৈ নিৰ্মাণ কৰা নগা টোছা পথৰ এটা বৃহৎ অংশ হঠাতে ভাঙি পৰে।
থেং সুৰংগৰ ঠিক বিপৰীতে থকা তীস্তা আৰু চিয়াকুং নদীৰ সংগমস্থলীত বিপুল পৰিমাণৰ শিল আৰু মাটি জমা হৈ নদীখনৰ গতিপথ আংশিকভাৱে বন্ধ কৰি পেলায়। হঠাতে পানীৰ সোঁত বন্ধ হৈ পৰাত স্বাভাৱিকতে স্থানীয় ৰাইজৰ মাজত আতংক বিয়পি পৰে। অৱশ্যে সকাহৰ কথাটো হ’ল এই ঘটনাত এতিয়ালৈকে কোনো লোকৰ প্ৰাণহানি বা বৃহৎ ক্ষতিৰ খবৰ পোৱা নাই।
ছিকিমৰ স্থানীয় তথ্য অনুসৰি মংগন জিলা প্ৰশাসনে ইতিমধ্যে উল্লেখ কৰিছে যে ভূমিস্খলনৰ বাবে নদীৰ পানী অতি ঘোলা হৈ পৰিছে যদিও তীস্তাৰ সোঁত সম্পূৰ্ণৰূপে বন্ধ হোৱা নাই। বিকল্প অংশৰ মাজেৰে আংশিকভাৱে পানী বৈ যাবলৈ আৰম্ভ হোৱাত বৰ্তমান পৰিস্থিতি নিয়ন্ত্ৰণত আছে। ভূমিস্খলনৰ পিছত চুংথাং আৰক্ষী থানাৰ বিষয়াসকলে ক্ষীপ্ৰতাৰে সেই স্থানত উপস্থিত হয়। সম্প্ৰতি সাংকালাং আৰু ফিদাং আউটপোষ্ট এলেকাত জলপৃষ্ঠৰ ওপৰতো দৃষ্টি ৰখা হৈছে।
কিন্তু নদীৰ সোঁতত কিবা অস্বাভাৱিকতা লক্ষ্য কৰিলে তৎক্ষণাত নিয়ন্ত্ৰণ কক্ষক অৱগত কৰাৰ নিৰ্দেশ দিয়া হৈছে। ইয়াৰ সমান্তৰালকৈ তীস্তা নদীৰ পাৰৰ সমতল আৰু নিম্ন পাহাৰীয়া অঞ্চলত থকা দুৰ্বল বসতিৰ বিষয়ে প্ৰশাসনে সকীয়াই দিছে।
পথসমূহৰ ক্ষতিৰ পৰিসৰৰ মূল্যায়ন আৰু ধ্বংসাৱশেষসমূহ কেনেকৈ দ্ৰুতভাৱে আঁতৰাই পথসমূহ যাতায়তযোগ্য কৰি তুলিব পাৰি সেইটো নিৰ্ণয় কৰিবলৈ বিশেষ বিশেষজ্ঞৰ এটা উচ্চ পৰ্যায়ৰ দল স্থানলৈ প্ৰেৰণ কৰা হৈছে।
