বিগত সপ্তাহত নেৰানেপেৰা বৰষুণৰ ফলত উত্তৰ ছিকিমত উদ্ভৱ হোৱা ব্যাপক ভূমিস্খলনৰ পৰিস্থিতিৰ অৱশেষত দেওবাৰৰ পৰা বতৰ ফৰকাল হৈ পৰাৰ পিছত কিছু উন্নত হৈছে।
জিলা প্ৰশাসনে জিলাখনত অত্যাৱশ্যকীয় সামগ্ৰীৰ সৰবৰাহ স্বাভাৱিক কৰাৰ বাবে প্ৰচেষ্টা অব্যাহত ৰখা হৈছে। জিলাখনত বিচ্ছিন্ন হৈ পৰা বিদ্যুৎ সংযোগৰ কামো সম্পন্ন কৰি তুলিছে।
বিভাগৰ অভিযন্তা তথা ক্ষেত্ৰ কৰ্মীসকলে তৎপৰতাৰে যোগান প্ৰক্ৰিয়া কাৰ্যকৰী তুলিছে। মাংগানৰ বেছিভাগ অঞ্চলতে জনস্বাস্থ্য কাৰিকৰী বিভাগে পানী যোগানৰ কাম পুনৰ মুকলি কৰি তুলিছে।
জৰুৰীকালীন সেৱাৰ দল তথা বন বিভাগে মাংগান চহৰখনৰ বিপদজনকভাৱে পৰি থকা গছবোৰ মুকলি কৰাৰ কাম সম্পূৰ্ণ কৰিছে।
উত্তৰ ছিকিমত নিয়োজিত ভাৰতীয় সেনা তথা ভাৰতীয় বায়ুসেনাই আৱদ্ধ হৈ পৰা পৰ্যটক আৰু স্থানীয় ৰাইজক উদ্ধাৰৰ বাবে হেলিকপ্টাৰ সেৱা মুকলি কৰিছে। হেলিকপ্টাৰেৰে উদ্ধাৰ কৰিবলগীয়া আৱদ্ধ হৈ পৰা লোকসকলৰ ভিতৰত আছে বয়স্ক ব্যক্তি, মহিলা তথা শিশু।
এগৰাকী গৰ্ভৱতী মহিলা আৰু তেওঁৰ স্বামীকো উদ্ধাৰ কৰা হৈছে। তদুপৰি, হেলিপ্টাৰেৰে উদ্ধাৰ কৰাৰ পূৰ্বে চিকিৎসাজনিত সমস্যা হোৱাসকলক চিকিৎসা সাহায্যও প্ৰদান কৰা হয়।
সোমবাৰে পুৱা ৬-৩০ বজাৰ পৰা পাঁচখন হেলিকপ্টাৰেৰে আৰম্ভ কৰা উদ্ধাৰ অভিযানত উত্তৰ ছিকিমত আৱদ্ধ হৈ পৰা ৩০ জন পৰ্যটকক উদ্ধাৰ কৰা হৈছে।
মুঠতে, ৪২ জন লোকক চাংথাঙৰ পৰা গেংটকলৈ আৰু ২২ জনক বাগডোগ্ৰালৈ, ১১ জন লোকক মাংগানৰ পৰা গেংটকলৈ আৰু সাতজনক চাংথাঙলৈ হেলিকপ্টাৰেৰে স্থানান্তৰ কৰা হৈছে।
মন্ত্ৰী তথা লাচেন মাংগানৰ বিধায়ক টি ডব্লিউ লেপচা, জংগুৰ বিধায়ক তথা উপাধ্যক্ষ ছনাম গ্যাষ্টো লেপচা আৰু ৰাজ্যসভাৰ সাংসদ হিসে লাচুংগাপাই বিষয়াসকলৰ সৈতে জিলাখনৰ ক্ষতিগ্ৰস্ত স্থানসমূহ ভ্ৰমণ কৰি ক্ষয় ক্ষতিৰ বুজ লয়।
