অসমৰ প্ৰবীন সাংবাদিক, ধীৰেন্দ্ৰ নাথ চক্ৰবৰ্তীয়ে যোৱা ১ জানুৱাৰীত মুখ্য মন্ত্ৰীয়ে আয়োজন কৰা সাংবাদিকৰ সৈতে বাৰ্তালাপ অনুষ্ঠানত অসমৰ মায়ামৰা সম্প্ৰদায়ৰ লোকসকলৰ প্ৰতি কৰা এক মন্তব্যত তীব্ৰ প্ৰতিক্ৰিয়া প্ৰকাশ কৰিছে মায়ামৰা সমাজৰ বিভিন্ন সংগঠনে।
অসমৰ অন্যতম বৃহৎ ধমীয় অনুষ্ঠান শ্ৰীশ্ৰী অষ্টভূজ দেৱৰ বৰভেটি উন্নয়ন সমিতিৰ আইন উপদেষ্টা তথা শ্ৰীশ্ৰী গোপাল দেৱ সেৱক সমাজৰ প্ৰধান সম্পাদক মনু বৰুৱাই প্ৰেৰণ কৰা এক বিবৃতিত চক্ৰবৰ্তীয়ে মায়ামৰা সকলৰ প্ৰতি কটু মন্তব্য আগবঢ়োৱা বুলি উল্লেখ কৰি তেওঁৰ এনে কাৰ্য্যই মায়ামৰা সমাজক ক্ষুভিত কৰি তোলা বুলি দাবী কৰিছে।
বিবৃতিটোত উল্লেখ কৰা মতে সাংবাদিক গৰাকীয়ে মায়ামৰা বিদ্ৰোহে আহোমৰ ৰাজত্ব শেষ কৰি অসমীয়া জাতিক দুৰ্বল কৰা বুলি মন্তব্য কৰাৰ লগতে আলফাৰ প্ৰসংগত মায়ামৰাসকলক অযথা টানি আনি তাচ্চিল্য কৰিছে।
তেওঁ ইয়াৰ পূৰ্বেও একাধিকবাৰ মায়ামৰা সমাজক অযথা বিতৰ্কলৈ টানি আনি তাচ্চিল্যসুচক মন্তব্য কৰা বুলি বিবৃতিটোত উল্লেখ কৰি কোৱা হয় যে দুবছৰৰ পূৰ্বে ধীৰেন্দ্ৰ নাথ চক্ৰবৰ্তীয়ে মায়ামৰা বিপ্লৱীসকল অসমৰ কুলাংগাৰ আছিল বুলি বিতৰ্কিত মন্তব্য কৰিছিল।
এনে মন্তব্য মায়ামৰা সমাজৰ বাবে কেতিয়াও গ্ৰহণযোগ্য নহয় বুলি মনু বৰুৱাই উল্লেখ কৰি কয় যে মায়ামৰা বিপ্লৱ ৰজাৰ ধৰ্মীয় নিৰ্যাতন আৰু শোষনৰ বিৰুদ্ধে এক বিপ্লৱ আছিল ।
মায়ামৰা সমাজখনক বাৰে বাৰে অপমান কৰা কাৰ্য ক্ষমাৰ অযোগ্য বুলি মায়ামৰা সমাজে বিবেচনা কৰে আৰু এনেধৰণৰ মন্তব্যৰে মায়ামৰা সমাজ খনক এঘৰীয়া কৰাৰ এক কুটিল চক্ৰান্তত জড়়িত আছে বুলি অনুমান কৰি বিবৃতিটোত সাংবাদিক গৰাকীৰ এনে মন্তব্যই মায়ামৰা সমাজৰ ভক্ত সকলৰ ধৰ্মীয় অনুভূতিত আঘাত হনা বুলি কয়।
অষ্টভূজ দেৱৰ বৰভেটি আৰু যোৰহাট জিলাৰ কেন্দ্ৰীয় মায়ামৰা নামঘৰতো বিষয়টোৰ ওপৰত পৰ্যালোচনা ক্ৰমে ব্যৱস্থা লোৱা হ’ব বুলি বৰভেটি উন্নয়ন সমিতিৰ আইন উপদেষ্টা মনু বৰুৱাই জানিবলৈ দিছে।
