দেওবাৰে তামিলনাডুৰ কইম্বাটুৰ বিমানবন্দৰৰ সমীপত সংঘটিত হয় এক ভয়ানক ঘটনা। এগৰাকী এম বি এ ছাত্ৰীক গাড়ীৰ পৰা বলপূৰ্বকভাৱে নমাই নিয়াৰ পিছতে তিনিজন ব্যক্তিয়ে দলবদ্ধ ধৰ্ষণ কৰাৰ অভিযোগ উত্থাপন হৈছে।
ইয়াৰ লগতে ছোৱালীজনীৰ লগত থকা প্ৰেমিকক মাৰপিট কৰাৰো অভিযোগ। দেওবাৰে নিশা প্ৰায় ১১:৩০ বজাত সংঘটিত হয় এই ঘটনা।
আৰক্ষীৰ সূত্ৰৰ পৰা জানিব পৰা মতে, ৰাতি বিমানবন্দৰৰ সমীপত এখন গাড়ীত নিজৰ পুৰুষ বন্ধুৰ সৈতে কথা পাতি আছিল ছাত্ৰীগৰাকী। সেই সময়ত বাইকত উঠি তালৈ আহিছিল তিনিজন দুস্কৃতিকাৰী। ছোৱালীজনীক দেখি তেওঁলোকে তেওঁক গালি-গালাজ কৰিবলৈ ধৰিলে আৰু গাড়ীখনত আক্ৰমণ চলায়।
তাৰপিছত ছোৱালীজনীৰ বন্ধুক জোৰকৈ গাড়ীৰ পৰা নমাই প্ৰহাৰ কৰে। ইয়াৰ পিছত দুস্কৃতিকাৰীয়ে তেওঁক তেনেকৈয়ে পেলাই থৈ বলপূৰ্বকভাৱে ছোৱালীজনীক উঠাই লৈ গুচি যায়।
জানিব পৰা মতে, দুৰ্বৃত্তই ছাত্ৰীগৰাকীক ঘটনাস্থলীৰ পৰা প্ৰায় এক কিলোমিটাৰ দূৰৈৰ ব্যক্তিগত মহাবিদ্যালয়ৰ সমীপৰ নিৰ্জন স্থানলৈ লৈ যায় আৰু তাতেই দলবদ্ধ ধৰ্ষণ কৰাৰ অভিযোগ উত্থাপন হৈছে। নৃশংস নিৰ্যাতনৰ পিছত দুস্কৃতিকাৰীয়ে তাতেই ছোৱালীজনীক বিবস্ত্ৰ কৰি এৰি থৈ যায়।
ছাত্ৰীগৰাকীৰ আহত বন্ধুৱে আৰক্ষীক খবৰ দিয়ে আৰু অনুসন্ধান আৰম্ভ হয়। ইয়াৰ পিছত আৰক্ষীয়ে অচেতন অৱস্থাত ছাত্ৰীগৰাকীক উদ্ধাৰ কৰি চিকিৎসালয়লৈ লৈ যায়। সম্প্ৰতি ছাত্ৰীগৰাকী চিকিৎসালয়ত চিকিৎসাধীন হৈ আছে।
ভুক্তভোগীৰ বন্ধুৰ অভিযোগৰ ভিত্তিত এটা গোচৰ ৰুজু কৰা হৈছে। আৰক্ষীৰ ৭টা দলে অভিযুক্তক বিচাৰি অভিযান অব্যাহত ৰাখিছে। চিচিটিভিৰ ফুটেজো পৰীক্ষা কৰা হৈছে।
তামিলনাডুৰ এই ঘটনাক লৈ বিজেপিয়ে ষ্টেলিন চৰকাৰক সমালোচনা কৰিছে। গেৰুৱা শিবিৰৰ নেতা কে আন্নামলাই কয়, “তামিলনাডুত ডি এম কে চৰকাৰ ক্ষমতালৈ অহাৰ পিছৰে পৰা মহিলাৰ বিৰুদ্ধে এনে অপৰাধ বাৰে বাৰে সংঘটিত হৈ আহিছে। সমাজবিৰোধীসকলৰ আইন বা আৰক্ষীৰ প্ৰতি কোনো ভয় নাই। ডি এম কেৰ মন্ত্ৰীৰ পৰা আৰম্ভ কৰি আৰক্ষী প্ৰশাসনৰ সৈতে জড়িত লোকসকলৰ অপৰাধীক বচোৱাৰ প্ৰৱণতা আছে।”
ডি এম কেৰ মুখপাত্ৰ ডাঃ চৈয়দ হাফিজুল্লাই কয় যে, “কইম্বাটুৰৰ ঘটনাটো দুৰ্ভাগ্যজনক। তামিলনাডুৱে অপৰাধীৰ বিৰুদ্ধে কঠোৰ ব্যৱস্থা গ্ৰহণ কৰিছে। অপৰাধীক শাস্তি দিবলৈ গোচৰসমূহ ক্ষিপ্ৰতাৰে নিষ্পত্তি কৰা হৈছে। এই ক্ষেত্ৰতো আইনে নিজৰ পথ ল’ব।’’
