অসমত ক’ৰ’না আক্ৰান্তৰ সংখ্যা উদ্বেগজনকভাৱে বৃদ্ধি পোৱাৰ পাছত মেঘালয় চৰকাৰে গুৱাহাটীৰ সীমামুৰীয়া ৰাজ্যখনৰ অঞ্চলসমূহত ল’কডাউন ঘোষণা কৰাৰ সিদ্ধান্ত গ্ৰহণ কৰিছে।
দেওবাৰৰ দিনটোত অসমত নতুনকৈ ৩২৭ গৰাকী লোক ক’ৰ’না আক্ৰান্ত হৈছিল আৰু ইয়াৰে ভিতৰত ১৯৫ গৰাকী গুৱাহাটী মহানগৰীৰ।
বৰ্তমানলৈ অসমত ৭,৪৯২ গৰাকী লোক ক’ৰ’না ভাইৰাছৰ দ্বাৰা সংক্ৰমিত হোৱাৰ বিপৰীতে ৫,০৮৮ গৰাকী লোক চিকিৎসাৰ অন্তত সুস্থ হৈ উঠিছে।
অসমৰ বিভিন্ন চিকিৎসালয়ত বৰ্তমান ২,৩৯০ গৰাকী লোক চিকিৎসাধীন হৈ আছে।
গুৱাহাটীৰ সৈতে সংযুক্ত হৈ থকা অঞ্চলসমূহত ল’কডাউন ঘোষণা কৰাৰ বিষয়ে টুইটাৰত উল্লেখ কৰি মেঘালয়ৰ মুখ্য মন্ত্ৰী কনৰাড চাংমাই কয় যে, বৰ্ণিহাট, যোৰাবাট আদি অঞ্চলসমূহ ল’কডাউনৰ ফলত বন্ধ থাকিব।
”আন্তঃৰাজ্যিক পৰিবহন বন্ধ থাকিব। জিলা উপায়ুক্ত সমূহে প্ৰয়োজন অনুসাৰে সিদ্ধান্ত গ্ৰহণ কৰিব,” কনৰাড চাংমাই কয়।
উল্লেখযোগ্য যে, অলপতে মণিপুৰ আৰু নতুন দিল্লী ভ্ৰমণৰ পৰা উভতি অহা মুখ্য মন্ত্ৰী চাংমা বৰ্মান হোম কোৱাৰেণ্টাইনত আছে।
২২ জুন আৰু ২৮ জুনত কৰা ক’ৰ’নাৰ পৰীক্ষাত তেওঁৰ ফলাফল নিগেটিভ আহে।
