দ্বীপৰাষ্ট্ৰ শ্ৰীলংকাত আজি হোৱা ভয়ংকৰ বোমা বিস্ফোৰণৰ ঘটনাক গৰিহণা দিছে মেঘালয় আৰু নাগালেণ্ডৰ মুখ্য মন্ত্ৰীয়ে।
“শ্ৰীলংকাত গীৰ্জা আৰু নিৰীহৰ ওপৰত হোৱা আক্ৰমণক ধিক্কাৰ দিছো”, ২০০জনৰো অধিক লোক নিহত হোৱা বিস্ফোৰণলানিক গৰিহণা দি নিজৰ টুইটাৰ হেণ্ডেলত কয় মেঘালয়ৰ মুখ্য মন্ত্ৰী কনৰাড চাংমাই।
তেওঁ নিহতসকলৰ আত্মীয়ৰ প্ৰতি সমবেদনা জনাই টুইটটোত লগতে কয়, “পৰমেশ্বৰে শোকদগ্ধ পৰিয়ালকেইটাৰ সদস্যসকলক এই ক্ষতি সহ্য কৰিবলৈ সাহস দিয় আৰু নিৰ্দয় আক্ৰমণকাৰীকেইজনক ক্ষমা কৰাৰ শক্তি দিয়ক”।
নাগালেণ্ডৰ মুখ্য মন্ত্ৰী নেইফিঅ’ ৰিঅ’ই ঘটনাটোত হতভম্ভ হৈ পৰা বুলি জনাই টুইটাৰত কয়, “শ্ৰীলংকাৰ হোটেল আৰু গীৰ্জাৰ বোমা বিস্ফোৰাণত মই হতচকিত আৰু দুখিত হৈছো”।
“নিৰীহ আৰু প্ৰাৰ্থনাত ৰত মানুহক লক্ষ্য কৰি লোৱা এই মস্তিষ্কহীন হিংসাৰ নাৰকীয় কাণ্ডক মই গৰিহণা দিছো। সকলো ভুক্তভোগীৰ বাবে মোৰ প্ৰাৰ্থনা।” টুইটটোত ৰিঅ’ই কয়।
উল্লেখযোগ্য যে ৰক্তক্ষয়ী আৰু দীঘলীয়া গৃহযুদ্ধৰ সামৰণিৰ পিছত আটাইতকৈ ডাঙৰ আঘাতটোত আজি দ্বীপৰাষ্ট্ৰখন কঁপি উঠে।
ৰাজধানী কলম্বো আৰু বাট্টিকালোৱাত হোৱা বিস্ফোৰণলানিত অগাপিছাকৈ মুঠ ৮টা বোমাৰ বিস্ফোৰণ হয়। আক্ৰমণবোৰত নিচেই কমেও ২০৭জন নিহত আৰু ৪০০ৰো অধিক আহত হয়।
শেহতীয়া খবৰমতে, আৰক্ষীয়ে বহুতো লোকক আটক কৰিছে যদিও এতিয়াও কোনেও বিস্ফোৰণৰ দায়িত্ব স্বীকাৰ কৰা নাই।
প্ৰায় এক দশক পূৰ্বে সামৰণি পৰা হোৱা গৃহযুদ্ধত ক্ষুদ্ৰ দেশখনত কমেও এক লাখ লোকৰ মৃত্যু হৈছিল।
