মেঘালয়ত প্ৰৱেশৰ পূৰ্বে বহিৰাগত লোকে এতিয়াৰে পৰা সুৰক্ষা আৰু নিৰাপত্তাৰ বাবে চৰকাৰৰ ঘৰত নাম-ঠিকনা পঞ্জীয়ন কৰিব লাগিব।
শুকুৰবাৰে কনৰাড চাংমা নেতৃত্বাধীন মেঘালয় চৰকাৰৰ কেবিনেটে ৰেছিডেণ্টছ ছেফটী এণ্ড ছিকিউৰিটী এক্ট ২০১৬ৰ সংশোধনীৰ জৰিয়তে বহিৰাগতসকলে ৰাজ্যৰ কৰ্তৃপক্ষৰ সৈতে পঞ্জীয়নৰ বাবে পঞ্জীয়ন প্ৰক্ৰিয়াৰ ৰূপায়নৰ সিদ্ধান্তটো গ্ৰহণ কৰে।
ৰাজ্য চৰকাৰে প্ৰস্তাৱিত সংশোধনীক এখন অধ্যাদেশৰ ৰূপত অনুমোদন জনায়। এই অধ্যাদেশৰ আওতাৰ পৰা স্থায়ী বাসিন্দাসকলৰ লগতে কেন্দ্ৰ আৰু ৰাজ্য চৰকাৰৰ কৰ্মচাৰীক আঁতৰাই ৰখা হৈছে।
উপ মুখ্য মন্ত্ৰী প্ৰেষ্ট’ন টাইছঙে কয়, ‘’বৰ্তমানৰ আইনখন সংশোধন কৰি বাহিৰৰ পৰা অহা ভাড়াতীয়া, শ্ৰমিক, পৰ্যটক আৰু অন্য কোনো উদ্দেশ্যত ৰাজ্যখনলৈ ভ্ৰমণ কৰা বা থকা লোকসকলে তেওঁলোকৰ নিজৰ স্বাৰ্থৰ লগতে মেঘালয়ৰ স্বাৰ্থত পঞ্জীয়ন কৰিব লাগিব।‘’
‘’২০১৬ চনত যেতিয়া এই আইনখন অনা হৈছিল, তেতিয়া কেৱল ভাড়াতীয়া লোকসকলৰ দিশটো লক্ষ্য কৰা হৈছিল,’’-কেবিনেট বৈঠকৰ পাছতে প্ৰেষ্টনে সাংবাদিকক জানিবলৈ দিয়ে।
‘’মাটিৰ গৰাকীসকলক কাগজ পত্ৰ জমা কৰাটো নিশ্চিত কৰিবলৈ নিৰ্দেশ দিয়া হৈছে আৰু তেওঁলোকে সেয়া পৰম্পৰাগত মুৰব্বীসকলক জনোৱা উচিত,’’-তেওঁ লগতে কয়।
সংশোধিত আইনখন সৰ্বাত্মক তথা সুৰক্ষিত বুলি প্ৰকাশ কৰি টাইছঙে কয় যে পঞ্জীয়নৰ বাবে লোকসকলে নিৰ্দিষ্ট কিছু নিয়ম মানিব লাগিব।
‘’পঞ্জীয়নৰ বাবে প্ৰক্ৰিয়াটো উজু হোৱাটো নিশ্চিত কৰিবলৈ আমি বৰ্তমানৰ নিয়মৰো পুনৰ খচৰা প্ৰস্তুত কৰিম আৰু আমি লগতে পঞ্জীয়ন অনলাইন কৰাৰ ব্যৱস্থা কৰিম,’’-তেওঁ কয়।
‘’তোনো ব্যক্তিয়ে তথ্য যোগান ধৰিবলৈ ব্যৰ্থ হ’লে ভাৰতীয় দণ্ডবিধিৰ ১৭৬/১৭৭ ধাৰাৰ অধীনত শাস্তিৰ সন্মুখীন হ’ব লাগিব,’’-টাইছঙে জনায়।
তেওঁ লগতে জানিবলৈ দিয়ে যে এই ব্যৱস্থাটো আন্ত:ৰাজ্যিক পাৰপত্ৰৰ সৈতে জড়িত নহয় কিয়নো সংশোধনীটো বৰ্তমানৰ আইনখনক অধিক শক্তিশালী কৰাৰ বাবে অনা হৈছিল।
টাইছঙে লগতে কয়,’’ৰাজ্যখনৰ স্থায়ী বাসিন্দা অজনজাতীয় লোকসকলে চিন্তা কৰাৰ কাৰণ নাই কিয়নো পঞ্জীয়ন প্ৰক্ৰিয়াটো বাহিৰৰ পৰা যিসকল আহে তেওঁলোকৰ বাবেহে প্ৰযোজ্য হ’ব।‘’
