দিল্লীৰ কলকাজী মন্দিৰৰ সমীপত এগৰাকী কিশোৰীক আৰক্ষীৰ পৰিচয় দি তিনিজন যুৱকে ধৰ্ষণ কৰাৰ অভিযোগ উঠিছে। আৰক্ষীয়ে জনোৱা মতে, সোমবাৰে সন্ধিয়া দক্ষিণ দিল্লীৰ আস্থা কুঞ্জ পাৰ্কত সংঘটিত হয় এই ঘটনা।
অভিযোগ লাভ কৰাৰ পিছতে দিল্লী আৰক্ষীয়ে তৎক্ষণাত তদন্ত আৰম্ভ কৰে। মঙলবাৰে পুৱা এনকাউণ্টাৰৰ অন্তত এজন অভিযুক্তক গ্ৰেপ্তাৰ কৰা হয়। ধৃত ব্যক্তিজনৰ নাম আছিফ। বাকী দুজনক বিচাৰি উলিয়াবলৈ অভিযান অব্যাহত আছে।
আৰক্ষীৰ প্ৰাৰম্ভিক তথ্য অনুসৰি সোমবাৰে ১৭ বছৰীয়া কিশোৰীগৰাকী কলকাজী মন্দিৰলৈ গৈছিল। পিছত আস্থা কুঞ্জ পাৰ্কত বন্ধু এজনৰ লগত বহিছিল। সন্ধিয়া প্ৰায় ৭:৩০ বজাত তালৈ আহিছিল তিনিজন যুৱক। দিল্লী আৰক্ষীৰ জোৱান বুলি পৰিচয় দিয়ে। ইয়াৰ পিছতে ছোৱালীজনী আৰু তাইৰ বন্ধুক ভয় খুৱাই বিভিন্ন ধৰণৰ ব্যৱস্থা গ্ৰহণৰ ভাবুকি দিয়াৰ অভিযোগ উত্থাপন হৈছে৷
তিনিজন যুৱকৰ ভিতৰত এজনে তাইৰ বন্ধুক বন্দী কৰি ৰখাৰ অভিযোগ উত্থাপন কৰিছে কিশোৰীগৰাকীয়ে। বাকী দুজনে তাইক যৌন নিৰ্যাতন চলাইছিল। ঘটনাৰ পিছতে তাৰ পৰা পলায়ন কৰে তিনিওজন অভিযুক্ত। পিছত নিশা প্ৰায় ৯:৪৫ বজাত আৰক্ষীয়ে ঘটনা সন্দৰ্ভত তথ্য লাভ কৰে। তথ্য লাভ কৰাৰ পিছতে কলকাজী আৰক্ষী থানাই ক্ষীপ্ৰতাৰে সেই স্থানত উপস্থিত হয়।
আৰক্ষীয়ে জনোৱা মতে, ছোৱালীজনীৰ অভিযোগৰ ভিত্তিত এফআইআৰ দাখিল কৰা হৈছে। তাইৰ চিকিৎসা পৰীক্ষাও কৰা হৈছে। তদন্তৰ অংশ হিচাপে ঘটনাস্থলী আৰু ইয়াৰ আশে-পাশে থকা অঞ্চলৰ চিচিটিভি ফুটেজ পৰীক্ষা কৰা হৈছে। সেই সময়ত অঞ্চলটোত সক্ৰিয় মোবাইল নম্বৰৰ তথ্যও সংগ্ৰহ কৰা হৈছে। ইয়াৰ জৰিয়তে অভিযুক্তৰ গতিবিধি আৰু পৰিচয় সম্পৰ্কে অধিক তথ্য আহৰণৰ প্ৰচেষ্টা চলোৱা হৈছে।
আৰক্ষীয়ে জনোৱা মতে, মঙলবাৰে পুৱা এজন অভিযুক্তক গ্ৰেপ্তাৰ কৰিবলৈ যাওঁতে আৰক্ষীৰ সৈতে সংঘৰ্ষত লিপ্ত হয়। সেই ঘটনাৰ পিছতে আছিফক গ্ৰেপ্তাৰ কৰা হয়। এতিয়া তদন্তকাৰীৰ মূল লক্ষ্য হৈছে শীঘ্ৰে বাকী দুজন অভিযুক্তক চিনাক্ত কৰি গ্ৰেপ্তাৰ কৰা। তেওঁলোকৰ বিষয়ে অধিক তথ্য সংগ্ৰহ কৰা হৈছে।
ঘটনা পোহৰলৈ অহাৰ পাছত পুনৰ দিল্লীত নিৰাপত্তা আৰু মহিলাৰ সুৰক্ষাক লৈ প্ৰশ্ন উত্থাপন হৈছে। বিশেষকৈ আৰক্ষীৰ পৰিচয় ব্যৱহাৰ কৰি সাধাৰণ জনতাক ভয় দেখোৱাৰ অভিযোগৰ ওপৰত গুৰুত্ব ৰাখিছে তদন্তকাৰী সংস্থাটোৱে। এতিয়া আৰক্ষীয়ে অভিযুক্তই সঁচাকৈ নিজকে আৰক্ষী জোৱান বুলি পৰিচয় দিছিল নেকি আৰু ইয়াৰ পূৰ্বেও এনে কোনো কাণ্ডৰ সৈতে জড়িত আছিল নেকি তাৰ তদন্ত আৰম্ভ কৰিছে।
তদন্তকাৰীয়ে চিচিটিভি ফুটেজ, মোবাইল ডাটা আৰু অন্যান্য প্ৰমাণৰ সহায়ত সমগ্ৰ ঘটনাৰ ক্ৰম প্ৰতিষ্ঠা কৰিবলৈ চেষ্টা চলাইছে। একে সময়তে বাকী অভিযুক্তক বিচাৰি উলিয়াবলৈ তালাচী অভিযান অব্যাহত আছে।
আৰক্ষীয়ে জনোৱা মতে, তদন্ত অগ্ৰগতিৰ লগে লগে এই ঘটনা সন্দৰ্ভত অধিক তথ্য পোহৰলৈ আহিব পাৰে। বৰ্তমান এই গোচৰত এজন অভিযুক্তক গ্ৰেপ্তাৰ কৰা হৈছে আৰু বাকী দুজনক গ্ৰেপ্তাৰ কৰাৰ প্ৰচেষ্টা অব্যাহত আছে।
