২০১৪ চনৰ ১৭ জুলাইত মালয়েছিয়া এয়াৰলাইন্সৰ এমএইচ-১৭ বিমান পূব ইউক্ৰেইনৰ ডনবাছ অঞ্চলৰ ওপৰেৰে উৰি থকাৰ সময়ত ক্ষেপণাস্ত্ৰৰ আক্ৰমণত ধ্বংস হৈছিল। এই দুৰ্ঘটনাত ২৮৩ জন যাত্ৰী আৰু ১৫ জন ক্ৰু মেম্বাৰৰ মৃত্যু হৈছিল, য’ত ৮০ জন শিশুও আছিল। ইউৰোপৰ শীৰ্ষ মানৱ অধিকাৰ আদালতে বুধবাৰে প্ৰদান কৰা ৰায়দানত ৰাছিয়াক এই ঘটনাৰ বাবে দায়ী বুলি ঘোষণা কৰিছে। কিয়েভ আৰু নেদাৰলেণ্ডৰ দ্বাৰা দাখিল কৰা চাৰিটা গোচৰৰ ৰায় ভ্লাদিমিৰ পুটিনৰ প্ৰশাসনৰ বিৰুদ্ধে গৈছে।
উল্লেখ্য যে বিমানখন আমষ্টাৰডামৰ পৰা কুৱালালামপুৰলৈ যাত্ৰা কৰি আছিল যেতিয়া ৰাছিয়া সমৰ্থিত বিচ্ছিন্নতাবাদী নিয়ন্ত্ৰিত ইউক্ৰেইনৰ অঞ্চলৰ পৰা নিক্ষেপ কৰা ৰাছিয়া নিৰ্মিত ক্ষেপণাস্ত্ৰৰ আঘাতত ধ্বংস হৈছিল। সেই সময়ত ডনবাছত ৰাছিয়া আৰু ইউক্ৰেইনৰ মাজত তীব্ৰ সংঘাত চলি আছিল। ইউৰোপীয় মানৱ অধিকাৰ আদালতে নিশ্চিত কৰিছে যে বিমানখন ক্ষেপণাস্ত্ৰৰ দ্বাৰা আক্ৰমণ কৰা হৈছিল। আদালতৰ সভাপতি মাটিয়াছ গুৱেমাৰে কয়, “প্ৰমাণে স্পষ্টভাৱে দেখুৱাইছে যে এই ক্ষেপণাস্ত্ৰ ইচ্ছাকৃতভাৱে এমএইচ-১৭ বিমানত নিক্ষেপ কৰা হৈছিল, সম্ভৱতঃ সামৰিক বিমান বুলি ভুল ধাৰণাৰে।” আদালতে আৰু কয় যে ৰাছিয়াই এই দুৰ্ঘটনাত জড়িত থকাৰ কথা অস্বীকাৰ কৰি আন্তঃৰাষ্ট্ৰীয় আইন উলংঘা কৰিছে।
ইউক্ৰেইন আৰু নেদাৰলেণ্ডৰ দ্বাৰা ২০১৪ চনৰ পৰা ৰাছিয়াৰ বিচাৰত গোচৰ ৰুজু কৰা চাৰিটা মামলাৰ ৰায় ২০২৫ চনৰ ৯ জুলাইত ঘোষণা কৰা হৈছিল। এইচ ১৭ বিমান গুলীয়াই পেলোৱাৰ বাবে ৰাছিয়াক প্ৰত্যক্ষভাৱে দায়ী কৰা এইটোৱেই প্ৰথম আন্তঃৰাষ্ট্ৰীয় আদালতৰ ৰায়। মে’ মাহত ৰাষ্ট্ৰসংঘৰ বিমান চলাচল সংস্থাইও ৰাছিয়াক এই দুৰ্ঘটনাৰ বাবে দায়ী বুলি ঘোষণা কৰিছিল।
ইউৰোপীয় মানৱ অধিকাৰ আদালতৰ এই সিদ্ধান্তই ৰাছিয়াৰ বিৰুদ্ধে ইউক্ৰেইনত ২০১৪ চনৰ পৰা হোৱা মানৱ অধিকাৰ উলংঘনৰ বাবে প্ৰথমবাৰৰ বাবে জৱাবদিহি কৰিছে।
