চলিত আইপিএল- ৰ দ্বিতীয় পৰ্বত অৱশেষত জয়ৰ সোৱাদ পালে ডিফেণ্ডিং চেম্পিয়ন মুম্বাই ইণ্ডিয়াঞ্চে।
কালি আবু ঢাবিৰ শ্বেখ জায়েদ ষ্টেডিয়ামত অনুষ্ঠিত পঞ্জাৱ কিংছৰ বিৰুদ্ধে অনুষ্ঠিত হোৱা খেলখনত মুম্বাই ইণ্ডিয়াঞ্চে ৬ উইকেটত বিজয় সাব্যস্ত কৰে।
টছত জয়ী হৈ খেলখনত মুম্বাই ইণ্ডিয়াঞ্চে প্ৰথমে ফিল্ডিং কৰাৰ সিদ্ধান্ত লয় আৰু পঞ্জাৱক বেটিং কৰিবলৈ আমন্ত্ৰণ জনায়।
প্ৰথমে বেটিং কৰিবলৈ আহি পঞ্জাৱে প্ৰথম উইকেটত ৩৬ ৰানৰ যুটি বান্ধে যদিও তাৰ পিছতে ১২ ৰানৰ ব্যৱধানত ৪ টা উইকেট হেৰুৱাই।
অৱশ্যে তাৰ পাছতে এইডেন মাৰ্ক্ৰাম আৰু দীপক হুদাই পঞ্চম উইকেটৰ যুটিত ৬১ ৰান সংগ্ৰহ কৰি দলক কিছু মজবুত স্থিতিলৈ নিয়ে।
অৱশ্যে সঘন উইকেট পতন আৰু মন্থৰ বেটিঙৰ ফলত পঞ্জাৱে ২০ অভাৰত ১৩৫ ৰানহে সংগ্ৰহ কৰিবলৈ সক্ষম হয়।
দলৰ হৈ মাৰ্ক্ৰামে সৰ্বাধিক ৪২ ৰান সংগ্ৰহ কৰে। ২৮ ৰানৰ বৰঙণি আহে হুদাৰ বেটৰ পৰা।
মুম্বাইৰ হৈ বুমৰাহ আৰু পোলাৰ্ডে দুটাকৈ উইকেট দখল কৰে। এটাকৈ উইকেট পায় ক্ৰুনাল পাণ্ডিয়া আৰু ৰাহুল চাহাৰে।
আনহাতে বলাৰৰ বাবে সহায়ক হৈ পৰা মন্থৰ উইকেটত ১৩৬ ৰানৰ লক্ষ্য অতিক্ৰম কৰিবলৈ মুম্বাই ইণ্ডিয়াঞ্চেও সংগ্ৰাম কৰিবলগীয়া হয়। দলে ১৬ ৰানতে হেৰুৱাই অধিনায়ক ৰোহিত শৰ্মা আৰু সূৰ্য কুমাৰ যাদৱৰ উইকেট। অৱশ্যে ডে ক’ক, সৌৰভ তিৱাৰী, পাণ্ডিয়াৰ ধৈৰ্যশীল বেটিঙৰ সহায়েৰে জয়ৰ লক্ষ্যত উপনীত হয় মুম্বাই।
ডে ক’কে ২৭ ৰান কৰাৰ লগতে সৌৰভ তিৱাৰীৰ বেটৰ পৰা আহে সৰ্বাধিক ৪৫ ৰান ।
ইনিংছৰ ১৯ অভাৰৰ অন্তিমটো বলত ছামিৰ বলত ছয় কোবাই পাণ্ডিয়াই মুম্বাই ইণ্ডিয়াঞ্চৰ বাবে আকাঙ্খিত জয় আনি দিয়ে।
পাণ্ডিয়াই ৪০ ৰান আৰু পোলাৰ্ডে ১৫ ৰান কৰি অপৰাজিত থাকে।
পঞ্জাৱৰ হৈ ৰবি বিষ্ণৈয়ে দুটা উইকেট দখল কৰে। এটাকৈ উইকেট পায় ছামি আৰু এলিছে।
খেলখনত দুটা উইকেট দখল কৰাৰ লগতে ১৫ ৰান সংগ্ৰহ কৰা পোলাৰ্ড মেচৰ শ্ৰেষ্ঠ খেলুৱৈ হিচাপে বিবেচিত হয় ।
আজিৰ জয়েৰে মুম্বাই ইণ্ডিয়াঞ্চে পইন্ট তালিকাৰ পঞ্চম স্থানলৈ উন্নীত হয়। আনহাতে পঞ্জাৱ কিংছে তালিকাৰ ষষ্ঠ স্থানত অৱস্থান কৰিছে।
আজি আইপিএল- ৰ আন এখন খেলত ৰাজস্থান ৰয়েলছ আৰু ৰয়েল চেলেঞ্জাৰ্চ বাঙ্গালোৰ মুখামুখি হ’ব ।