লিয়ংগেটৰ দ্বাৰা নিৰ্মিত মাইকেল জেকচনৰ জীৱনৰ ওপৰত আধাৰিত চলচ্চিত্ৰ মাইকেল এতিয়া বিশ্বজুৰি বক্স অফিচত এক বৃহৎ সফলতাৰ দিশে অগ্ৰসৰ হৈছে। ছবিখনে ইতিমধ্যে বিশ্বজুৰি ৩০০ মিলিয়ন ডলাৰৰ ব্যৱসায় অতিক্ৰম কৰি এক নতুন অভিলেখ গঢ়িবলৈ সক্ষম হৈছে। এই বৃহৎ উপাৰ্জনৰ সৈতে ছবিখনে ৱাৰ্নাৰ ব্ৰাদাৰ্ছৰ আঠটা অস্কাৰ মনোনয়ন লাভ কৰা জনপ্ৰিয় ছবি এলভিছক পিছ পেলাইছে। এলভিছৰ মুঠ উপাৰ্জন আছিল ২৮৮.৬ মিলিয়ন ডলাৰ। বৰ্তমান মাইকেল বিশ্বৰ ভিতৰতে দ্বিতীয় সৰ্বাধিক উপাৰ্জনকাৰী মিউজিকেল বায়’পিক হিচাপে পৰিগণিত হৈছে। উল্লেখযোগ্য যে, এই তালিকাত ৯১১ মিলিয়ন ডলাৰৰ ব্যৱসায়েৰে শীৰ্ষ স্থানত থকা বোহেমিয়ান ৰেপছ’ডি নামৰ ছবিখনৰ প্ৰযোজক গ্ৰেহাম কিঙেই এই নতুন ছবিখনো প্ৰযোজনা কৰিছে।
এণ্টোৱাইন ফুকুৱা পৰিচালিত এই ছবিখনত জাফৰ জেকচন, নিয়া লং, কলমেন ডমিংগো আৰু মাইলছ টেলাৰে গুৰুত্বপূৰ্প চৰিত্ৰত অভিনয় কৰিছে। ইউনিভাৰ্চেলৰ দ্বাৰা আন্তৰ্জাতিক বজাৰত মুক্তি দিয়া এই ছবিখনে সোমবাৰৰ পৰা বৃহস্পতিবাৰৰ ভিতৰত বিদেশৰ ৮২টা অঞ্চলত প্ৰায় ৪৭.৫ মিলিয়ন ডলাৰ সংগ্ৰহ কৰে। ইয়াৰ ফলত ছবিখনৰ মুঠ আন্তৰ্জাতিক উপাৰ্জন ১৬৯.৩ মিলিয়ন ডলাৰলৈ বৃদ্ধি পাইছে। ইফালে আমেৰিকাৰ ঘৰুৱা বজাৰত ছবিখনে ১২৯.৮ মিলিয়ন ডলাৰ সংগ্ৰহ কৰিছে। সকলো দিশ মিলাই কালিৰ হিচাপত ছবিখনৰ মুঠ গোলকীয় উপাৰ্জন ২৯৯ মিলিয়ন ডলাৰত উপনীত হৈছে। আশা কৰা হৈছে যে দ্বিতীয় সপ্তাহৰ শেষৰ ফালে অৰ্থাৎ দেওবাৰৰ ভিতৰত ছবিখনে কেৱল আমেৰিকাৰ বজাৰতে ১৭৪.৮ মিলিয়ন ডলাৰৰ ব্যৱসায় সম্পূৰ্ণ কৰিব।
বিভিন্ন দেশৰ পৰা অহা তথ্য অনুসৰি ছবিখনে সকলোতে যথেষ্ট সঁহাৰি লাভ কৰিছে। যুক্তৰাজ্য আৰু আয়াৰলেণ্ডত ছবিখনে এতিয়ালৈকে ২১.৮ মিলিয়ন ডলাৰৰ ব্যৱসায় কৰিছে। একেদৰে ফ্ৰান্সত বৃহস্পতিবাৰে ১.৩ মিলিয়ন ডলাৰ উপাৰ্জন কৰি ছবিখনে দৰ্শকৰ সংখ্যাৰ ফালৰ পৰা প্ৰথম স্থান পুনৰ দখল কৰিছে। আনকি দ্য ডেভিল ৱেয়াৰ্ছ প্ৰাডা ২ নামৰ নতুন ছবিখনৰ সৈতে প্ৰতিযোগিতা থকা সত্ত্বেও মাইকেলৰ জনপ্ৰিয়তা অটুট আছে। মেক্সিকোতো ছবিখনে ১২.৯ মিলিয়ন ডলাৰৰ সীমা অতিক্ৰম কৰিছে। ইউৰোপৰ বজাৰত বিশেষকৈ ইটালী, জাৰ্মানী আৰু স্পেইনত ছবিখনে যোৱা সপ্তাহতকৈও অধিক উপাৰ্জন কৰা দেখা গৈছে।
ইউৰোপৰ দেশসমূহৰ লগতে মধ্যপ্ৰাচ্যৰ বজাৰতো ছবিখনে এক চমকপ্ৰদ ফলাফল দেখুৱাইছে। ইটালীত যোৱা সপ্তাহৰ তুলনাত ছবিখনৰ উপাৰ্জন ৭ শতাংশ বৃদ্ধি পাইছে আৰু এতিয়ালৈকে মুঠ ১১.১ মিলিয়ন ডলাৰ সংগ্ৰহ কৰিছে। আনহাতে জাৰ্মানী আৰু স্পেইনত ক্ৰমে ২৫ শতাংশ আৰু ৩৪ শতাংশ উপাৰ্জন বৃদ্ধি পাইছে। মধ্যপ্ৰাচ্যৰ দেশসমূহতো যোৱা সপ্তাহৰ তুলনাত ছবিখনৰ উপাৰ্জন ৩৬ শতাংশ বৃদ্ধি পাইছে, যিটো এক ডাঙৰ কৃতিত্ব বুলি গণ্য কৰা হৈছে। অঞ্চলটোত চলি থকা বিভিন্ন যুদ্ধ বিগ্ৰহৰ মাজতো ছবিখনে এনে সফলতা লাভ কৰাটোৱে মাইকেল জেকচনৰ বিশ্বজোৰা আবেদনকে পুনৰ প্ৰমাণ কৰিছে। বৰ্তমানলৈকে মধ্যপ্ৰাচ্যত ছবিখনৰ মুঠ উপাৰ্জন ৮ মিলিয়ন ডলাৰ হৈছে।
