পুনৰ মাজ আকাশতে কাৰিকৰী বিজুতি এয়াৰ ইণ্ডিয়াৰ বিমানত। সাংসদসহ বহু যাত্রীক কঢ়িয়াই নিয়াৰ এয়াৰ ইণ্ডিয়াৰ বিমানখনত হঠাতে কাৰিকৰী বিজুতিয়ে দেখা দিয়ে। দেওবাৰে নিশা সংঘটিত হয় ঘটনাটো। জনিব পৰা মতে এয়াৰ ইণ্ডিয়াৰ AI2455 নম্বৰৰ বিমানখন তিৰুৱনন্তপুৰমৰ পৰা দিল্লী অভিমুখে ৰাওনা হৈছিল।
কংগ্ৰেছৰ সাধাৰণ সম্পাদক কে চি বেণুগোপালে জনোৱা মতে, বিমানখনত ৰাডাৰৰ সমস্যা দেখা দিয়াৰ পিছতে জৰুৰীকালীন অৱতৰণৰ সিদ্ধান্ত লোৱা হয়। শেষত বিমানখনৰ পথ সলনি কৰি নিৰাপদে চেন্নাই বিমানবন্দৰত অৱতৰণ কৰোৱা হয়।
ফ্লাইট ট্রেকিং ৱেবছাইট Flightradar24ৰ তথ্য অনুসৰি, এয়াৰবাছ এ৩২০ মডেলৰ বিমানখন দুঘণ্টাৰো অধিক সময় আকাশত আছিল। বিমান সংস্থাটোৱে এক বিবৃতিত কয়, ক্ৰুৱে কাৰিকৰী সমস্যাৰ সন্দেহ আৰু বেয়া বতৰৰ বাবে সতৰ্কতামূলক ব্যৱস্থা হিচাপে চেন্নাইলৈ পথ পৰিবৰ্তন কৰে।
বিমানখনত কে চি বেণুগোপাল, আদূৰ প্ৰকাশ, কোডিকুন্নিল সুৰেশ, কে ৰাধাকৃষ্ণন আৰু ৰবাৰ্ট ব্ৰুচো আদি পাঁচজন সাংসদসহ বহু যাত্ৰী আছিল। অৱতৰণৰ পিছত সাংসদ বেণুগোপালে এক বৃহৎ দুৰ্ঘটনাৰ পৰা ৰক্ষা পোৱাৰ কথা প্ৰকাশ কৰে। তেওঁ লগতে কয় যে এই ঘটনাৰ বিষয়ে ইতিমধ্যে অসামৰিক বিমান পৰিবহন সঞ্চালক প্ৰধানক অৱগত কৰা হৈছে। এয়াৰ ইণ্ডিয়াৰ মুখপাত্ৰজনৰ তথ্য অনুসৰি, বিমানখন নিৰাপদে চেন্নাইত অৱতৰণ কৰে আৰু বিমানবন্দৰত প্ৰয়োজনীয় তদন্ত সম্পন্ন কৰা হয়।
বিমানখন চেন্নাইত অৱতৰণ কৰাৰ পিছত প্ৰয়োজনীয় পৰীক্ষা-নিৰীক্ষা কৰা হয় আৰু যাত্ৰীসকলক গন্তব্য স্থানলৈ পঠিয়াবলৈ বিকল্প ব্যৱস্থা কৰা হয়। Flightradar24 ৰ তথ্য অনুসৰি, বিমানখন নিশা ৮ বজাৰ পিছত তিৰুৱনন্তপুৰমৰ পৰা উৰা মাৰিছিল আৰু প্ৰায় ১০.৩৫ বজাত চেন্নাইত অৱতৰণ কৰে।
