সন্ত্ৰাসবাদ নিৰ্মূলৰ লক্ষ্যৰে জম্মু-কাশ্মীৰত নিৰাপত্তাৰক্ষীয়ে অব্যাহত ৰখা অভিযানৰ মাজতে উপত্যকাটোত পুনৰ তিনিগৰাকী সন্দেহযুক্ত সন্ত্ৰাসবাদীক গ্ৰেপ্তাৰ কৰিছৈ আৰক্ষীয়ে। জম্মু-কাশ্মীৰ আৰক্ষীয়ে বুধবাৰে নিশা জম্মুৰ ৰাষ্ট্ৰীয় ঘাইপথৰ পৰা সন্দেহজনক তিনিগৰাকী লোকক গ্ৰেপ্তাৰ কৰে।
ধৃত তিনিগৰাকীৰে দুগৰাকীয়ে উগ্ৰপন্থী সংগঠনৰ সহযোগী হিচাপে কাম কৰিছে বুলি অভিযোগ কৰিছে। আৰক্ষীয়ে তিনিওৰে পৰা বহু অস্ত্ৰ-শস্ত্ৰ আৰু গোলাবাৰুদো উদ্ধাৰ কৰিছে।
জম্মু-কাশ্মীৰ আৰক্ষীৰ সূত্ৰ অনুসৰি, বুধবাৰে নিশা জম্মুৰ ৰাষ্ট্ৰীয় ঘাইপথৰ ত্ৰিকুটা নগৰ আৰক্ষী থানাৰ দ্বাৰা নিয়মীয়া তালাচী চলোৱা হৈছিল। তালাচীৰ সময়ত এখন তেলৰ টেংকাৰত আৰক্ষীৰ সন্দেহ উপজিছিল।
তিনিগৰাকী ব্যক্তি থকা টেংকাৰখনে যান-বাহনৰ নিয়ম উলংঘা কৰিছিল যদিও সতৰ্কবাণীৰে মুকলি কৰি দিছিল আৰক্ষীয়ে। কিন্তু কিছু দূৰলৈ যোৱাৰ পিছতে টেংকাৰখনে পুনৰ যান-বাহনৰ নিয়ম ভংগ কৰিছিল।
কিন্তু আৰক্ষীয়ে এইবাৰ টেংকাৰখনক বাধা দিয়ে আৰু টেংকাৰখন পৰীক্ষা কৰিবলৈ বিচৰাত টেংকাৰখনত থকা ব্যক্তি তিনিগৰাকীয়ে আৰক্ষীৰ সৈতে তৰ্ক আৰম্ভ কৰে। এনে পৰিস্থিতিত আৰক্ষীয়ে সন্দেহৰ ভিত্তিত বাহনখনত তালাচী চলায়।
তালাচীৰ সময়ত আৰক্ষীয়ে হহু অস্ত্ৰ-শস্ত্ৰ আৰু গোলাবাৰুদ উদ্ধাৰ কৰে। আনহাতে গাড়ীখনত থকা পুলৱামাৰ বাসিন্দা মহম্মদ য়াছিন, ফাৰহান ফাৰুক আৰু ফাৰুক আহমেদ নামৰ তিনিজন লোকক গ্ৰেপ্তাৰ কৰা হয়।
ধৃত তিনিগৰাকী অভিযুক্তৰ দুগৰাকীয়ে উগ্ৰপন্থীৰ সহযোগী হিচাপে কাম কৰি আছিল বুলি আৰক্ষীয়ে জানিবলৈ দিছে। উল্লেখ্য যে শেহতীয়াকৈ জম্মু-কাশ্মীৰত সন্ত্ৰাসবাদৰ সৈতে সম্পৰ্ক থকাৰ অভিযোগত বহু লোকক গ্ৰেপ্তাৰ কৰিছে।
যোৱা ১ আগষ্টত জম্মু-কাশ্মীৰ আৰক্ষীয়ে উপত্যকাটোত ইউৰোপৰ পৰা নিয়ন্ত্ৰিত এক সন্ত্ৰাসবাদী চক্ৰ উৎখাত কৰাৰ লগতে দুই সদস্যক গ্ৰেপ্তাৰ কৰিছিল। আনহাতে সোমবাৰে পশ্চিম বংগৰ এগৰাকী যুৱকক আল-কায়দাৰ সন্ত্ৰাসবাদী বুলি সন্দেহ কৰি গ্ৰেপ্তাৰ কৰা হৈছিল।