পেহেলগাম সন্ত্ৰাসবাদী আক্ৰমণৰ পিছৰে পৰা ভাৰত আৰু পাকিস্তানৰ মাজত উত্তেজনা তুংগত উঠিছে। ইফালে পাকিস্তানী হেকাৰ গোটে ভাৰতীয় সামৰিক বিভাগৰ কেইবাটাও ৱেবছাইট হেক কৰা বুলি দাবী কৰিছে।
পাকিস্তান চাইবাৰ ফৰ্চ নামৰ হেকাৰ গোটটোৱে এক্স হেণ্ডেলত দাবী কৰিছে যে তেওঁলোকে দুটা ভাৰতীয় সামৰিক সংস্থাৰ পৰা স্পৰ্শকাতৰ তথ্য লাভ কৰিছে। এই গোটটোৱে ভাৰতৰ সামৰিক অভিযান্ত্ৰিক সেৱা আৰু মনোহৰ পাৰিকাৰ ইনষ্টিটিউট ফৰ ডিফেন্স ষ্টাডিজ এণ্ড এনালাইছিছৰ ৱেবছাইট হেক কৰা বুলি দাবী কৰিছে। গোটটোৱে তাৰ পৰা কেইবাটাও স্পৰ্শকাতৰ তথ্য লাভ কৰা বুলি দাবী কৰে। অৱশ্যে এই চাইবাৰ আক্ৰমণ সন্দৰ্ভত ভাৰতে এতিয়াও কোনো বিবৃতি প্ৰকাশ কৰা নাই।
সৰ্বভাৰতীয় সংবাদ সংস্থা এএনআইৰ এক প্ৰতিবেদন অনুসৰি প্ৰতিৰক্ষা বিষয়াৰ লগইনৰ সবিশেষ আৰু কিছু ব্যক্তিগত তথ্য ফাদিল হ’ব পাৰে। অৱশ্যে ৱেবছাইটটো হেক কৰা বুলি কৰা দাবীক অস্বীকাৰ কৰিছে মনোহৰ পাৰিকাৰ ইনষ্টিটিউট কৰ্তৃপক্ষই।
হেকিং গোটটোৱে দাবী কৰিছে যে তেওঁলোকে মনোহৰ পাৰিকাৰ ইনষ্টিটিউটত ১৬০০ লোকৰ পৰা ১০ জিবি ডাটা চুৰি কৰিছে। এক্স হেণ্ডলৰ এই দাবীৰ পিছতে বিভিন্ন চাইবাৰ সুৰক্ষা সংস্থাই জৰুৰী তদন্ত আৰম্ভ কৰিছে।ভাৰতীয় প্ৰতিৰক্ষা মন্ত্ৰালয়ৰ সহযোগী প্ৰতিষ্ঠান আৰ্মাৰ্ড ভেহিকেল নিগম লিমিটেডৰ ৱেবছাইট হেক কৰাৰ চেষ্টাও কৰা হৈছে বুলিও এএনআইয়ে প্ৰকাশ কৰিছে। পাকিস্তান চাইবাৰ ফৰ্চে ৱেবছাইটটো বিকৃত কৰি ছবিখন তেওঁলোকৰ এক্স হেণ্ডেলত পোষ্ট কৰিছিল। ৱেবছাইটটোত পাকিস্তানৰ পতাকা আৰু আল খালিদৰ টেংকৰ ছবি ব্যৱহাৰ কৰা হৈছে। ইয়াৰ পিছত সাৱধানতা হিচাপে আপাততঃ ৱেবছাইটটো অফলাইন কৰি দিয়া হয়। হেক কৰাৰ চেষ্টাৰ ফলত ৱেবছাইটটোৰ ক্ষতি হৈছে নে নাই সেইটো নিৰ্ণয়ৰ বাবে তদন্ত অব্যাহত আছে।
