আগতে নিজৰ বৃত্তি যিয়েই নাথাকক, কোনো ব্যক্তি যেতিয়া ৰাজহুৱা জীৱনত প্ৰৱেশ কৰি নেতা হৈ পৰে তেতিয়া নিজৰ আচাৰ-আচৰণত সংস্কাৰ অনাটো জৰুৰী। ৰাজনৈতিক নেতাসকলৰ বিশেষকৈ সকলোৰে প্ৰতি সন্মান জনোৱাটো সাধাৰণ শিষ্টাচাৰৰ কথা। কিন্তু ক্ষমতাৰে খকে ‘নষ্ট বুদ্ধি’ৰ নেতাৰ মনত সংস্কাৰ আনিব পাৰেনে?
ৰাজ্যৰ এগৰাকী বহুবল্কী মন্ত্ৰী অশোক সিংহৰ ক্ষেত্ৰতো কথাটো খাটে। যোগ্যতাতকৈ অধিক ক্ষমতা লাভ কৰা বুলি চৰ্চা লাভ কৰা মন্ত্ৰীগৰাকীয়ে নিজৰ আচাৰ-আচৰণ তথা কথা-বাৰ্তাৰে দৰাচলতে নিজৰ পৰিচয় ইতিমধ্যে প্ৰতিষ্ঠিত কৰিছে।
সোমবাৰে গুৱাহাটী প্ৰেছ ক্লাবৰ এটা দলে তেওঁলোকে আয়োজন কৰা ভাওনাত নিমন্ত্ৰণৰ বাবে মন্ত্ৰী অশোক সিংহলৰ ওচৰলৈ গৈছিল নিমন্ত্ৰণ দিবলৈ। কিন্তু মন্ত্ৰীগৰাকীৰ সঁহাৰিয়ে সকলোৰে চকু কপালত তুলিছে। তেওঁ আমন্ত্ৰণকাৰী দলটোক ক’লে, ‘এই ভাওনাৰ কাম নাই, এইবোৰ সময় নষ্ট‘। অৱশ্যে সাংবাদিকৰ দলটোৱে তেতিয়া কি প্ৰত্যুত্তৰ দিলে সেয়া জানিব পৰা হোৱা নাই।
পংকজ শৰ্মা নামৰ সাংবাদিকগৰাকীয়ে তেওঁৰ ফেচবুক প’ষ্টত লিখিছে, ‘’আজি গুৱাহাটী প্ৰেছ ক্লাবৰ team এ খুব challenge ৰ মাজত আয়োজন কৰা ভাওনাত নিমন্ত্ৰণৰ বাবে মন্ত্ৰী অশোক সিংহলৰ তালৈ গৈছিল,মন্ত্ৰীয়ে কৈছে এই ভাওনাৰ কাম নাই, এইবোৰ সময় নষ্ট ,মন্ত্ৰীৰ ক্ষমতা পোৱা মানেই এনে নহয় যে অসমীয়া সংস্কৃতিক অপমান কৰাৰ অধিকাৰ পাইছে, this is unacceptable,আমি অসমীয়া অনা অসমীয়াৰ পার্থক্য কৰিব নিবিচাৰোঁ, কিন্তু তাৰ মানে এইটো নহয় যে আমি দুর্বল, Wait n see,this is very very serious’’।
এতিয়া কথা হৈছে অসমৰ মাটি-পানী-বায়ু সেৱন কৰি কোনোবা সংস্কৃতিবান লোকে মহাপুৰুষজনাৰ সৃষ্টি সম্পৰ্কে এনে মন্তব্য কৰিব পাৰেনে? যদি পাৰে বুলি কোৱা হয় তেন্তে অশোক সিংহৰ দৰে ব্যক্তিয়েই হ’ব যি কোনোপধ্যে বেপাৰতকৈ সংস্থৃতিক অগ্ৰাধিকাৰ দিব নোৱাৰে।
এতিয়া প্ৰশ্ন হৈছে অসমীয়া বিদ্বৎ সমাজে তেওঁৰ এই স্পৰ্ধাক কেনেদৰে গ্ৰহণ কৰে। নে সকলোতে বাণিজ্য আৰু মুনাফাৰ হিচাপ ৰখা নেতাৰ হাতত অসমৰ সভ্যতা আৰু সংস্কৃতিকো জলাঞ্জলি দিবলৈ সাজু!
