বোকাখাতৰ বিধায়ক তথা কেবিনেট মন্ত্ৰী অতুল বৰাই আজি আনুষ্ঠানিক ভাৱে বোকাখাতৰ নৱ নিৰ্মিত কোষাগাৰ গৃহটি উদ্বোধন কৰে।
বোকাখাতৰ নৱ নিৰ্মিত কোষাগাৰ উদ্বোধন কৰি মন্ত্ৰী অতুল বৰাই কাজিৰঙাক বুকুত লৈ বোকাখাত সমষ্টিৰ উন্নয়নৰ বাবে কাম কৰিব লাগিব বুলি কয়।
চৰকাৰী মাটিৰ অভাৱৰ বাবেই বোকাখাত সমষ্টিত বহু প্ৰকল্প আৰু আঁচনি ৰূপায়ণ কৰিব পৰা নাই বুলিও মন্ত্ৰী গৰাকীয়ে মন্তব্য কৰে ৷
মুখ্য মন্ত্ৰী সৰ্বানন্দ সোণোৱালৰ নেতৃত্বত কাজিৰঙাত এখন অৰ্কিড পাৰ্ক আৰু হেলিপেড নিৰ্মাণ কৰাৰ বাবে অভিলাষী আঁচনি প্ৰস্তুত কৰা বুলিও তেওঁ ঘোষণা কৰে ৷
প্ৰায় ৯৫ লাখ টকাৰে নিৰ্মাণ কৰি উলিওৱা কোষাগাৰটোৰ উদ্বোধনী অনুষ্ঠানত উদ্দেশ্য বাখ্যা কৰে কোষাগাৰ বিষয়া হিৰামনি বৰুৱাই। আদৰণী ভাষণ প্ৰদান কৰে বোকাখাতৰ মহকুমাধিপতি বিবেক শ্যামে।
অনুষ্ঠানত গোলাঘাটৰ উপায়ুক্ত ধীৰেণ হাজৰিকা, অসম বিধান সভাৰ প্ৰাক্তন উপাধ্যক্ষ বলোভদ্ৰ তামুলী, অসম গণ পৰিষদ দলৰ বোকাখাত জিলা সভাপতি জগত কলিতা, ভাৰতীয় জনতা পাৰ্টীৰ ৰাজ্যিক সম্পাদক দেৱ প্ৰদীপ বৰা, মণ্ডল সভাপতি জিতেন শৰ্মা, পৌৰপতি চিত্ৰা কাৰ্ডং আৰু অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱাও উপস্থিত থাকে।
ইফালে এই অনুষ্ঠানৰ পাছতেই আয়োজিত আন এক অনুষ্ঠানত মন্ত্ৰী বৰাই জিলা কল্যাণ বিভাগৰ অধীনত বোকাখাত সমষ্টিৰ অনুসূচীত জাতি, অনান্য পিছ পৰা জাতি আৰু মহকুমা কৃষি বিভাগৰ উদ্যোগত নিৰ্বাচন কৰা হিতাধিকাৰীৰ মাজত বিভিন্ন সামগ্ৰী বিতৰণ কৰে।
