ইতিবাচক! ৰাজনৈতিক সদিচ্ছা প্ৰকাশৰ বাবে আছুৰ শ্বহীদ ন্যাসত উপস্থিত মন্ত্ৰী অতুল বৰা

বৃহস্পতিবাৰে অৰ্থ্যাৎ ২০ মে’ৰ দিনা পুৱাই সদৌ অসম ছাত্ৰ সন্থাৰ উজানবজাৰস্থিত শ্বহীদ ন্যাসত উপস্থিত হয় অসম চুক্তি ৰূপায়ণ দপ্তৰৰ মন্ত্ৰী অতুল বৰা।

ৰাজনৈতিক ইতিহাসত পোন প্ৰথমবাৰলৈ এনেদৰে অসম চুক্তি ৰূপায়ণ দপ্তৰৰ মন্ত্ৰী অসম চুক্তি স্বাক্ষৰকাৰী অৰাজনৈতিক সংগঠনৰ মজিয়াত উপস্থিত হ’ল।

আছুৰ সভাপতি দীপাংক কুমাৰ নাথ, সাধাৰণ সম্পাদক শংকৰ বৰুৱা আৰু উপদেষ্টা সমুজ্জ্বল কুমাৰ ভট্টাচাৰ্য্যৰ উপস্থিতিত অসম চুক্তি সন্দৰ্ভত এক অনানুষ্ঠানিক আলোচনাত মিলিত হয় অতুল বৰা।

তাৰ পাছত সাংবাদিকক সম্বোধন কৰি মন্ত্ৰী অতুল বৰাই কয়, ‘ৰাজনৈতিক সদিচ্ছাৰ প্ৰকাশৰ বাবে আমি ইয়ালৈ আহিছোঁ। আমাৰ চৰকাৰৰ সৰ্বোচ্চ অগ্ৰাধিকাৰ দিয়াৰ ভিতৰত আছে অসম চুক্তি ৰূপায়ন{

এই অনানুষ্ঠানিক আলোচনাত বহুতো স্মৃতি ৰোমন্থন কৰা হয় বুলিও মন্ত্ৰী বৰাই উল্লেখ কৰে।

ইপিনে, অসম চুক্তি ৰূপায়নৰ বাবে আগন্তক দিনত আমি ছাত্ৰ সন্থাৰ লগত মিলি কাম কৰিম বুলি উল্লেখ কৰি বৰাই লগতে কয়, ‘বহু শ্বহীদ নির্য্যাতিত পৰিয়ালে এককালীন সাহায্য পোৱা নাই, সেইখিনি দিবলৈ আমি চেষ্টা কৰিম।‘

অসম চুক্তিৰ ৬ নং দফাৰ সম্পৰ্কত আছুৰ লগত আলোচনা কৰা হব বুলিও তেওঁ উল্লেখ কৰি লগতে কয়, ‘হিমন্ত বিশ্ব শৰ্মাই বহু আগ্ৰহেৰে লৈছে এই বিষয়টো। শ্বহীদ ন্যাসত বহু স্মৃতি জড়িত হৈ আছে মোৰ যিহেতু মই এইখন মজিয়াৰ পৰাই গৈছো। অসমৰ জনসাধাৰণৰ কেইবা দশকৰ আশা পূৰণৰ অৰ্থে আমি আগবাঢ়িছো।‘

আনহাতে, সংবাদ মাধ্যমৰ আগত মন্তব্য ৰাখি আছুৰ উপদেষ্টা ড০ সমুজ্জ্বল কুমাৰ ভট্টাচাৰ্যই কয়, ‘১৯৮৫ চনৰ পিছৰে পৰা কোনো অসম চুক্তি ৰূপায়নৰ মন্ত্ৰী এই শ্বহীদ ভৱনলৈ অহা নাছিল। ইয়াক আমি ইতিবাচক দৃষ্টি ভঙ্গিৰে বিষয়টো লৈছো।‘

তেওঁ লগতে কয়, ‘অসম চুক্তি,সীমান্ত ছিল কৰা,বিদেশী বহিস্কাৰ,শ্বহীদ আৰু নিৰ্য্যাতিতৰ বিষয়টো আলোচনা কৰা হৈছে, বিষয়টো ইতিবাচক হিচাপে লৈছে মন্ত্ৰীগৰাকীয়ে।‘

ইয়াৰ পিছত আছুক আনুষ্ঠানিক আলোচনালৈ আমন্ত্ৰণ জনোৱা হব বুলি ভট্টাচাৰ্য্যই জানিবলৈ দিয়ে।

ইপিনে, মন্ত্ৰী অতুল বৰাক এক প্ৰকাৰৰ সমৰ্থন জনাই ভট্টাচাৰ্য্যই কয়, ‘এসময়ত তেওঁৱে স্মাৰক পত্ৰ প্ৰেৰণ কৰিছিল আৰু আজি তেওঁ স্মাৰক পত্ৰ লব পৰা হ’ল।

ইপিনে, ১৯৮৫ চনৰ পাছৰ পৰা কোনো মন্ত্ৰীয়েই শ্বহীদ ন্যাসলৈ অহা নাছিল বুলি উল্লেখ কৰি তেওঁ লগতে কয়, ‘প্ৰথম বাৰৰ বাবে অসম চুক্তি ৰূপায়ন বিভাগৰ মন্ত্ৰী আহিছে। আমি আদৰণি জনাইছোঁ। অসম চুক্তি ৰূপায়ণ কৰাটোৱেই মূল বিষয়। আজিৰ আলোচনা অনানুষ্ঠানিক, ইয়াৰ পিছত অনুষ্ঠানিকতা দেখিবলৈ পাম বুলি আশা কৰিছোঁ।‘

বিষয়সমূহত ইতিবাচক সিদ্ধান্ত লোৱা হ’ব বুলি অতুল বৰাই কৈছে বুলি ভট্টাচাৰ্য্যই উল্লেখ কৰে আৰু লগতে কয়, ‘কিন্তু আমাক লাগে ফলাফল। ফলাফল পালেহে আশ্বস্ত হম। আছুৱে ফলাফল লাভৰ বাবেহে আন্দোলন কৰে।‘