ভাৰতীয় মল্লযুঁজ ফেডাৰেচনৰ সভাপতি ব্রিজ ভূষণ চৰণ সিঙৰ বিৰুদ্ধে ব্যৱস্থা গ্ৰহণৰ দাবীত দীৰ্ঘদিন ধৰি আন্দোলনৰত ভাৰতৰ প্ৰতিবাদী তাৰকা মল্লযুঁজাৰুসকলক পুনৰ আলোচনাৰ বাবে আমন্ত্ৰণ জনাইছে কেন্দ্ৰই। এক টুইট যোগে কেন্দ্ৰৰ এই সিদ্ধান্তৰ কথা সদৰী কৰিছে কেন্দ্ৰীয় ক্ৰীড়া মন্ত্ৰী অনুৰাগ ঠাকুৰে।
শেহতীয়াকৈ শনিবাৰে মাজ নিশা মল্লযুঁজাৰুসকলে এই বিষয়ত কেন্দ্ৰীয় গৃহমন্ত্ৰী অমিত শ্বাহৰ সৈতেও বৈঠকত মিলিত হৈছিল। মল্লযুঁজাৰুসকলক পুনৰবাৰ আলোচনালৈ আমন্ত্ৰণ জনাই ক্ৰীড়া মন্ত্ৰী ঠাকুৰে চৰকাৰে মল্লযুঁজাৰুসকলৰ সৈতে তেওঁলোকে উত্থাপন কৰা বিষয়সমূহৰ ওপৰত আলোচনা কৰিবলৈ ইচ্ছুক বুলি উল্লেখ কৰে।
ইফালে, যিগৰাকী নাবালিকা মল্লযুঁজাৰুৰ বক্তব্যৰ ভিত্তিত ব্রিজ ভূষণ শৰণ সিঙৰ বিৰুদ্ধে যৌন অপৰাধৰ পৰা শিশু সুৰক্ষা আইন (POCSO)ৰ অধীনত গোচৰ ৰুজু হৈছিল, তেওঁ মঙলবাৰে দণ্ডাধীশৰ সন্মুখত এক নতুন বক্তব্য লিপিবদ্ধ কৰিছে বুলি দিল্লী আৰক্ষীয়ে জানিবলৈ দিছে।
দিল্লী আৰক্ষীৰ এগৰাকী জ্যেষ্ঠ বিষয়াই অৱশ্যে নাবালিকা মল্লযুঁজাৰুগৰাকীৰ বিবৃতিটোৰ বিষয়ে কোনো সবিশেষ প্ৰকাশ কৰিবলৈ অস্বীকাৰ কৰি ইয়াক অতি “স্পৰ্শকাতৰ” বিষয় বুলি অভিহিত কৰে। লক্ষণীয়ভাৱে কিছু সূত্ৰই মল্লযুঁজাৰুগৰাকীয়ে তেওঁৰ অভিযোগ প্ৰত্যাহাৰ কৰি নতুন বক্তব্য লিপিবদ্ধ কৰিছে বুলি দাবী কৰিছে।
অৱশ্যে মল্লযুঁজাৰু বজৰং পুনিয়াই এক সংবাদ মাধ্যমৰ সৈতে হোৱা সাক্ষাৎকাৰত নাবালিকা মল্লযুঁজাৰুগৰাকীৰ পিতৃৰ সৈতে এই বিষয়ত কথা পাতিছে আৰু তেওঁলোকে কোনো অভিযোগ প্ৰত্যাহাৰ কৰা নাই বুলি জানিবলৈ দিয়া বুলিহে উল্লেখ কৰে।
উল্লেখ্য যে, শনিবাৰে অমিত শ্বাহৰ সৈতে বৈঠকৰ পাছত প্ৰতিবাদৰ নেতৃত্ব বহন কৰা অলিম্পিক পদক বিজয়ী মল্লযুঁজাৰু বজৰং পুনিয়াই সংবাদ মাধ্যমৰ সৈতে হোৱা এক সাক্ষাৎকাৰত গৃহমন্ত্ৰী শ্বাহৰ সৈতে সম্পন্ন হোৱা বৈঠক সন্দৰ্ভত কোনো মন্তব্য নকৰিবলৈ প্ৰতিবাদী মল্লযুঁজাৰুসকলক আহ্বান কৰা বুলি মন্তব্য কৰিছিল।
অৱশ্যে বৈঠকত গৃহমন্ত্ৰীৰ সৈতে কোনো ধৰণৰ গোপন বুজাবুজি হোৱা বুলিও অস্বীকাৰ কৰি পুনিয়াই উল্লেখ কৰিছিল আৰু অমিত শ্বাহে তেওঁলোকৰ অভিযোগ সন্দৰ্ভত তদন্ত চলি থকাৰ কথা বৈঠকত জনাইছে বুলি সাক্ষাৎকাৰটোত সদৰী কৰিছিল।
পুনিয়াই লগতে মল্লযুঁজাৰুসকলৰ আন্দোলন সমাপ্তি হোৱা নাই বুলি উল্লেখ কৰি আন্দোলন চলি থাকিব বুলি স্পষ্ট কৰি দিছিল। “চৰকাৰৰ সঁহাৰিত খেলুৱৈসকল সন্তুষ্ট নহয়, চৰকাৰেও আমাৰ দাবীত সন্মতি দিয়া নাই।”- এই মন্তব্য কৰিছিল বজৰং পুনিয়াই।
ইফালে মঙলবাৰে ফেডাৰেচনৰ সভাপতি ব্রিজ ভূষণ চৰণ সিঙৰ দিল্লী আৰু উত্তৰ প্ৰদেশস্থিত বাসগৃহৰ একাংশ কৰ্মচাৰীক সোধা-পোচা কৰে আৰক্ষীয়ে। লগতে মল্লযুঁজ ফেডাৰেচনৰ তিনি-চাৰিগৰাকী সদস্যকো আৰক্ষীয়ে সোধা-পোছা কৰা বুলি জানিব পৰা গৈছে।
আনহাতে একেদিনাই ভাৰতীয় কিষাণ ইউনিয়নৰ নেতা ৰাকেশ টিকাইটে মল্লযুঁজাৰুসকলৰ প্ৰতি কৃষক সন্থাৰ সমৰ্থন অব্যাহত থকা বুলি উল্লেখ কৰি ব্ৰিজ ভূষণ চৰণ সিঙৰ বিৰুদ্ধে ৯ জুনত অনুষ্ঠিত হ’বলগীয়া বিক্ষোভ কাৰ্যসূচী মল্লযুঁজাৰুসকলৰ অনুৰোধত পিছুৱাই দিয়া হৈছে বুলি জানিবলৈ দিয়ে।
বিগত সপ্তাহত কুৰুক্ষেত্ৰৰ এখন ‘মহাপঞ্চায়ত’ত টিকাইটে ব্ৰিজ ভূষণক গ্ৰেপ্তাৰৰ দাবীত দিল্লীত প্ৰতিবাদ সাব্যস্ত কৰাৰ কথা ঘোষণা কৰিছিল। কৃষক নেতাগৰাকীয়ে মল্লযুঁজাৰু সংস্থাৰ মুৰব্বীগৰাকীৰ বিৰুদ্ধে চৰকাৰে ব্যৱস্থা গ্ৰহণ নকৰিলে আন্দোলন তীব্ৰতৰ কৰি দিল্লীৰ যন্তৰ মন্তৰলৈ ঘূৰাই অনাৰ হুংকাৰ দিছিল।
