মন্ত্ৰী জয়ন্ত মল্ল বৰুৱাৰ পত্নীৰ বিৰুদ্ধে উত্থাপন হৈছে ডাঙৰ অভিযোগ। মন্ত্ৰী পত্নী হোৱাৰ সুবাদত গো পালন কৰা ফাৰ্মৰ নামত ৫০ লাখ টকাৰ ৰাজসাহায্য লাভ কৰিছে জয়ন্ত মল্ল বৰুৱাৰ পত্নী জুলি ডেকা বৰুৱাই। জুলি ডেকা বৰুৱাক এই সাহায্য প্ৰদান কৰাৰ বাবেই সলাই দিয়া হৈছে ধন মোকলোৱা চৰকাৰী নীতি।
নলবাৰী সমষ্টিৰ প্ৰাক্তন বিধায়ক তথা জ্যেষ্ঠ কংগ্রেছ নেতা অশোক শর্মা আৰু অসম প্রদেশ কংগ্ৰেছৰ সংবাদ মাধ্যম আৰু যোগাযোগ বিভাগৰ সাধাৰণ সম্পাদক ৰূপক দাসে উত্থাপন কৰিছে এই বিস্ফোৰক অভিযোগ।
শুকুৰবাৰে এখন সংবাদমেল অনুষ্ঠিত কৰি অশোক শৰ্মাই এই ভয়ংকৰ অভিযোগ উত্থাপন কৰিছে। তেওঁ কয় যে চৰকাৰী নীতি-নিয়ম সলনি কৰি মন্ত্ৰী পত্নী নিজেই হিতাধিকাৰী হৈছে। গোপালক সকলৰ বাবে চৰকাৰে প্ৰদান কৰা ৫০ লাখ টকাৰ ৰাজসাহায্য লাভ কৰিছে মন্ত্ৰী জয়ন্ত মল্ল বৰুৱাৰ পত্নী জুলি ডেকা বৰুৱাই।
অভিযোগ অনুসৰি, নিজকে গোপালক তথা দুগ্ধ ব্যৱসায়ী বুলি প্ৰতিপ্ৰন্ন কৰি প্ৰকৃত গো-পালকক এই ৰাজসাহায্যৰ পৰা বঞ্চিত কৰিছে মন্ত্ৰী জয়ন্ত মল্ল বৰুৱাৰ পত্নীয়ে।
অশোক শৰ্মাই সংবাদ মেলত অভিযোগ কৰি কয় যে পূর্বতে এইধৰণৰ ৰাজসাহায্য ৰাজনৈতিক ব্যক্তিয়ে পোৱাৰ ব্যৱস্থা নাছিল। সেয়েহে এই ৰাজসাহায্যৰ নিয়মাৱলীৰ ২ আৰু ৩ নম্বৰ নিয়মকেইটা প্রত্যাহাৰ কৰি নিজৰ সুবিধামতে কৰি লৈছে মন্ত্ৰী জয়ন্ত মল্ল বৰুৱাই।
সংবাদমেলত প্রদেশ কংগ্ৰেছৰ সংবাদ মাধ্যম আৰু যোগাযোগ বিভাগৰ সাধাৰণ সম্পাদক ৰূপক দাসে কয়, “দুগ্ধ উন্নয়ন নিগমৰ সঞ্চালকে নিবিদা আহ্বান কৰিছিল। এই নিবিদাৰ আগতে নিয়ম আছিল যে ৰাজনৈতিক ব্যক্তিয়ে ৰাজসাহায্যৰ সুবিধা ল’ব নোৱাৰে। কিন্তু তেওঁলোকে ২, ৩ আৰু নম্বৰ নিয়ম আঁতৰাই ৰাজনৈতিক ব্যক্তিয়েও ৰাজসাহায্য পোৱাৰ ব্যৱস্থা কৰি লৈছে। এই তালিকাৰ ১৩ নম্বৰত এতিয়া জয়ন্ত মল্ল বৰুৱাৰ পত্নী জুলি ডেকা বৰুৱাৰ নাম আছে। জুলি ডেকা বৰুৱাই ৫০ লাখ টকাৰ ৰাজসাহায্য লাভ কৰিছে।”
লগতে অভিযোগ উত্থাপন হৈছে যে ৰাজসাহায্য লাভ কৰা ১৫ জনীয়া তালিকাখনত থকা ১০ টা নাম হৈছে দুগ্ধ উৎপাদনৰ সৈতে জড়িত ফার্ম। কিন্তু ইয়াৰ বিপৰীতে বাকী ৫টা স্থানত আছে ব্যক্তি বিশেষৰ নাম। এই ব্যক্তি বিশেষৰ নাম থকাসকল কেতিয়াৰে পৰা দুগ্ধ পালনৰ সৈতে জড়িত হৈ আছে সেই সম্পর্কে ক’তো উল্লেখ নাই। “
এতিয়া এইদৰে মন্ত্ৰী পত্নীয়ে নিৱনুৱা তথা প্ৰকৃত উদ্যোগীসকলক বঞ্চিত কৰি ৰাজসাহায্য লাভ কৰা কাণ্ডক তীব্ৰ গৰিহণা দিছে বিৰোধী দল সংগঠন আৰু সচেতন ৰাইজে।
