দিন হাজিৰা কৰি পৰিয়াল পোহপাল দিয়া লোকৰ মাজত আজি খাদ্য সামগ্ৰী বিতৰণ কৰে মন্ত্ৰী সিদ্ধাৰ্থ ভট্টাচাৰ্য্যই।
AT ৰোডস্থিত চানাবস্তিত ৩ শতাধিক দিন হাজিৰা কৰা লোকক চাউল, দাইল, আলু আৰু নিমখ বিতৰণ কৰে গুৱাহাটী উন্নয়ন দপ্তৰৰ মন্ত্ৰীগৰাকীয়ে।
এই লোকসকলে ফাঁচিবজাৰ, আঠগাঁও অঞ্চলত দিন হাজিৰা কৰি, থেলা ট্ৰাক চলাই পৰিয়াল পোহপাল দি অহা বুলি মন্ত্ৰীগৰাকীয়ে জানিবলৈ দিয়ে।
এইসকল লোকৰ কোনো স্থায়ী উপাৰ্জন নথকা বাবে এওঁলোকৰ লকডাউনৰ দিনকেইটা জীৱন নিৰ্বাহ কৰাত অসুবিধাৰ সন্মুখীন হৈছে। সেয়ে এওঁলোকক প্ৰাৰম্ভিক পৰ্যায়ত এনেদৰে ৭ দিনৰ বাবে খাদ্য সামগ্ৰী বিতৰণ কৰিছে মন্ত্ৰীগৰাকীয়ে।
মন্ত্ৰীগৰাকীয়ে এসপ্তাহ পাছত পুনৰ চানাবস্তিত খাদ্য সামগ্ৰী বিতৰণ কৰিব বুলি জনায়।
উল্লেখ্য যে সমগ্ৰ গুৱাহাটীতে এনেধৰণে দিন হাজিৰা কৰি পৰিয়াল পোহপাল দিয়া লোকৰ ঘৰে ঘৰে গৈ খাদ্য সামগ্ৰী বিতৰণ কৰিব বুলি জানিবলৈ দি মন্ত্ৰীগৰাকীয়ে নৰ্থ ইষ্ট নাওৰ আগত কয় “আমি বুথ পৰ্যায়ৰ পৰা এনেবোৰ পৰিয়াল চিনাক্ত কৰি এখন তালিকা প্ৰস্তুত কৰিছোঁ। প্ৰায় ১০০০০ এনে পৰিয়াল আছে। সেইসকলক ঘৰে ঘৰে আমাৰ কৰ্মী সকল গৈ খাদ্য সামগ্ৰী বিতৰণ কৰিব।”
ৰাজহুৱা স্থানত বিতৰণ কৰিলে মানুহৰ জুম বান্ধে বাবে ঘৰে ঘৰে গৈ খাদ্য সামগ্ৰী বিতৰণ কৰিব বুলি মন্ত্ৰীগৰাকীয়ে উল্লেখ কৰে।
