শনিবাৰে গুৱাহাটীত অসম বিধানসভা নিৰ্বাচনৰ প্ৰচাৰৰ সময়ত কংগ্ৰেছৰ দিছপুৰ সমষ্টিৰ প্ৰাৰ্থী মীৰা বৰঠাকুৰে মুখ্যমন্ত্ৰী হিমন্ত বিশ্ব শৰ্মাক ব্যক্তিগত আক্ৰমণৰ বিৰুদ্ধে সকীয়াই দি তীব্ৰ কটাক্ষ কৰে। তেওঁ উল্লেখ কৰে যে কংগ্ৰেছে প্ৰকাশ কৰিব পাৰে “নিশাৰ আন্ধাৰত কোনে কাক মাৰিছিল।”
বৰঠাকুৰে অভিযোগ কৰে যে কংগ্ৰেছৰ হাতত বিশ্বাসযোগ্য তথ্য আছে, যাৰ পৰা অনুমান কৰিব পাৰি যে ভাৰতীয় জনতা পাৰ্টিয়ে নিৰ্বাচনী সমাৱেশৰ সময়ত নিজৰ সদস্যসকলৰ ওপৰত ব্যক্তিগত আক্ৰমণৰ পৰিকল্পনা কৰিছে।
তেওঁ দাবী কৰে যে, ‘বিজেপিৰ ভিতৰত আমাৰো চোৰাংচোৱা আছে। তেওঁলোকে আমাক লৈ কাহিনী চলাই আছে। আমি জানো যে তেওঁলোকে আমাক ব্যক্তিগতভাৱে লক্ষ্য কৰি লোৱাৰ পৰিকল্পনা কৰিছে। অৱশ্যে আমি ব্যক্তিগত আক্ৰমণৰ প্ৰত্যুত্তৰ নিদিওঁ, কিয়নো সেয়া আমাৰ অভ্যাস নহয়।”
কংগ্ৰেছ নেত্ৰীগৰাকীয়ে মুখ্যমন্ত্ৰী শৰ্মাই নিৰ্বাচনত ধন আৰু পেশী শক্তি ব্যৱহাৰ কৰাৰ অভিযোগ উত্থাপন কৰি তেওঁৰ দলে সততা আৰু নিষ্ঠাৰে প্ৰতিদ্বন্দ্বিতা কৰিব বুলি জোৰ দিয়ে। ‘মুখ্যমন্ত্ৰীয়ে ধন আৰু পেশী শক্তি ব্যৱহাৰ কৰিবলৈ আৰম্ভ কৰিছে, কিন্তু আমি সততা আৰু নিষ্ঠাৰে প্ৰতিদ্বন্দ্বিতা কৰিছোঁ, আমাৰ একতাৰ বাবে হিমন্ত বিশ্ব শৰ্মাই স্পষ্টভাৱে ভয় খাইছে।’
আগ নিশা গণেশ নগৰত সমাৱেশৰ সময়ত কংগ্রেছ কর্মী আৰু সমর্থকক লক্ষ্য কৰি সংঘটিত হোৱা শিলগুটি নিক্ষেপ কাণ্ডৰো প্ৰতিক্ৰিয়া প্ৰকাশ কৰে বৰঠাকুৰে৷ তেওঁ কয়,’শাৰীৰিক শক্তি ব্যৱহাৰ কৰা, শিলগুটি নিক্ষেপ কৰা, বাহন ভাঙি পেলোৱাৰ দৰে ঘটনাৰ অন্ত পৰিব লাগিব।
মুখ্যমন্ত্ৰী শৰ্মাক লক্ষ্য কৰি তেওঁ সকীয়াই দিয়ে, “তেওঁ মোৰ বিষয়ে কাহিনী বনোৱা উচিত নহয়। তেওঁৰ এই কাৰ্য্যৰ ওপৰত আমি মন্তব্য নকৰো, যদিও ক’বলগীয়া বহু কথা আছে। এইটো এনে পৰ্যায়লৈ অহা উচিত নহয় যে আমি নিশাৰ আন্ধাৰত কোনে কাক গাড়ীৰে খুন্দা মাৰিলে সেই কথা প্ৰকাশ কৰিব পাৰো। কোনেও ৰাজনৈতিক লাভালাভৰ বাবে ব্যক্তিগত আক্ৰমণৰ ব্যৱহাৰ কৰা উচিত নহয়।”
বৰঠাকুৰে লগতে তেওঁৰ দলৰ দাবীৰ বিশ্বাসযোগ্যতাৰ ওপৰত গুৰুত্ব আৰোপ কৰি কয়, “তেওঁ যি কয় সেয়া মনেসজা, কিন্তু আমি যি প্ৰকাশ কৰো সেয়া সকলো স্পষ্ট। মোক ভোট দিয়ক, আৰু মই আপোনালোকক আশ্বস্ত কৰিছো যে হিংসাক অধিক হিংসাৰে নহয়, কঠোৰ পৰিশ্ৰমৰ দ্বাৰাহে মোকাবিলা কৰা হ’ব।”
