এইবাৰ বিশ্বনাথত সংঘটিত হৈছে চিকিৎসকক আক্ৰমণৰ ঘটনা। বিশ্বনাথৰ মাজুলীগড় চাহ বাগিচাত যোৱা কালি বিয়লি সংঘটিত হৈছে এই ঘটনা। কৰোনাৰ সংক্ৰমণ ৰোধ কৰাৰ বাবে এছঅ’পিৰ অধীনত ৰাজ্যত বলবৎ কৰা হৈছে নতুন নীতি নিৰ্দেশনা।
এই নীতি-নিৰ্দেশনা অনুযায়ী দুপৰীয়া ১২ বজাৰ পৰা বন্ধ কৰিব লাগে ৰাজ্যৰ দোকান পোহাৰ সমূহ।
কিন্তু তাৰ মাজতে কিছুমান গ্ৰাম্য অঞ্চল বা চাহ বাগিচা অঞ্চলত একাংশ লোকে এই নীতি নিৰ্দেশনা অমান্য কৰি খোলা ৰাখে নিজৰ বানিজ্যিক প্ৰতিষ্ঠান।
ঠিক তেনেদৰেই বিশ্বনাথৰ মাজুলীগড় চাহ বাগিচাতো দুপৰীয়া ১২ বজাৰ পৰা দোকান পোহাৰ বন্ধ কৰিব লাগে যদিও বাগিচাখনৰ একাংশ ক্ষুদ্ৰ ব্যবসায়ীয়ে মনা নাছিল এই নিয়ম।
কিন্তু চাহ বাগিচা সমুহত অথবা মাজুলীগড় চাহ বাগিচাত গণ সংক্ৰমণ ভয়াবহভাবে বৃদ্ধি হোৱাৰ বাবে বিশ্বনাথ জিলা প্ৰশাসনে বাগিচা খনৰ কৰ্তৃপক্ষক SOP নীতি নিৰ্দেশনা মানি চলিবলৈ নিৰ্দেশ দিছে।
ইফালে দোকান সমুহ বন্ধ কৰিবলৈ বাগিচা কৰ্তৃপক্ষই চেষ্টা চলাই কালি বাগিচাখনৰ একাংশ লোকে যিহেতু ক’ভিডৰ কাৰনে দোকান সমূহ বন্ধ কৰাবলৈ দিছে গতিকে সেয়া চিকিৎসকৰ নিৰ্দেশতে হৈছে বুলি সন্দেহ কৰি চিকিৎসকৰ ওপৰত ক্ষোভিত হৈ পৰে।
বাগিচাখনৰ একাংশ লোকৰ ক্ষোভ হৈছে যে বাগিচাখনত চিকিৎসক অথবা বাগিচা কৰ্তৃপক্ষই কিয় দোকান সমূহ বন্ধ কৰাব। যাৰ বাবে একাংশ লোকে কালি বিয়লি বাগিচাখনৰ কাৰ্যালয়ত এই বিষয় সন্দৰ্ভত সোধা-পোছাৰ বাবে গৈছিল।
কিন্তু দুৰ্ভাগ্যক্ৰমে সেই সময়তে বাগিচাখনৰ চিকিৎসক গৰাকী ‘ইভিনিং ৱাক’ কৰিবলৈ গৈ মুখামুখি হ’ল এই দুস্কৃতিকাৰী সকলৰ সৈতে। লগে লগে দুস্কৃতিকাৰীৰ দলটোয়ে প্ৰহাৰ কৰিবলৈ আৰম্ভ কৰিছিল যদিও, চিকিৎসক গৰাকীৰ ঘৰত কৰ্মৰত কৰ্মচাৰীৰ তৎপৰতাত কথমপি প্ৰাণ ৰক্ষা পৰে চিকিৎসক গৰাকীৰ।
বয়োজেষ্ঠ (৮০) ভূক্তভোগী চিকিৎসক গৰাকীৰ নাম বসন্ত কুমাৰ গোস্বামী। ঘটনা সন্দৰ্ভত আজি বিশ্বনাথ আৰক্ষী থানাত এক গোচৰ তৰা হৈছে।