ক’ৰ’না ভাইৰাছত গোলাঘাট জিলাৰ ৯ গৰাকীকৈ লোক সংক্ৰমিত হোৱাৰ পাচত সমগ্ৰ জিলাখনতে আতংকময় পৰিস্থিতিৰ সৃষ্টি হয় ৷
জিলাখনৰ বোকাখাত মহকুমাত এতিয়ালৈকে কোনো লোক ক’ৰ’নাৰ দ্বাৰা সংক্ৰমিত হোৱা নাই যদিও ল’কডাউনৰ ক্ষেত্ৰত যথেষ্ট সতৰ্কতা অৱলম্বন কৰিছে মহকুমা প্ৰশাসনে ৷
শুকুৰবাৰে, গোলাঘাট অসামৰিক চিকিৎসালয়ৰ ঘটনা সংবাদ মাধ্যমত প্ৰচাৰ হোৱাৰ পাচত নিশা বোকাখাত মহকুমাৰ বিভিন্ন অঞ্চলত মানুহ সোমোৱাক কেন্দ্ৰ কৰি এক উৰা বাতৰি বিয়পি পৰে ৷
এই উৰা বাতৰি বিয়পি পৰাৰ পাছতে নিশাৰ ভাগত ঘৰৰ পৰা ওলায় আহে মানুহ ৷ মহকুমা প্ৰশাসন, আৰক্ষী, গাঁও ৰক্ষী বাহিনী আৰু সংবাদ মাধ্যমৰ প্ৰচেষ্টাত নিয়ন্ত্ৰিত হয় পৰিস্থিতি ৷
আনহাতে, বোকাখাতত এনে উৰা বাতৰি প্ৰচাৰ কৰাৰ বাবে বোকাখাত আৰক্ষীয়ে ম’হমাইকী গাঁৱৰ পৰা এজন যুৱকক আটক কৰে ৷
যুৱকজনে ফেইচবুকৰ জৰিয়তে ম’হমাইকী গাঁৱত অচিনাক্ত মানুহ সোমোৱা বুলি অপ্ৰচাৰ চলোৱাৰ লগতে সকলোকে ওলায় আহিবৰ বাবেও আহ্বান জনাইছিল ৷
সম্প্ৰতি বোকাখাত থানাত আৱদ্ধ হৈ থকা যুৱকজনৰ বিৰুদ্ধে এটা গোচৰ ৰজু কৰিছে বোকাখাত আৰক্ষীয়ে৷
ইফালে, ল’কডাউনৰ সময়ত অযথা মটৰ চাইকেল লৈ ল’কডাউন উলংঘা কৰা যুৱকৰ পৰা মুঠ ২০ খন মটৰ চাইকেল আৰু স্কুটিৰ লগতে ২ খন গাড়ীও জব্দ কৰিছে বোকাখাত আৰক্ষীৰ যান বাহন শাখাই ৷
শুকুৰবাৰৰ নিশাৰ ঘটনাৰ পাছত পৰিস্থিতি নিয়ন্ত্ৰনৰ বাবে মহকুমা প্ৰশাসনে সকলো ধৰ্মৰ মুখ্য ব্যক্তি সকলৰ উৰা বাতৰিক প্ৰশ্ৰয় নিদিবৰ বাবে আহ্বান জনায় ৷
