শুকুৰবাৰৰ পৰা সন্ধানহীন হৈ থকা অৰুণাচল প্ৰদেশৰ বিজেপি সাংসদ তাপিৰ গাওৰ সম্পৰ্কীয় ভাতৃক অৱশেষত পানবজাৰৰ এখন হোটেলৰ পৰা উদ্ধাৰ কৰা হৈছে।
তাহাং গাও নামৰ যুৱকজন শুকুৰবাৰে গুৱাহাটীৰ পৰাই হঠাতে সন্ধানহীন হৈ পৰাৰ পিছত ব্যাপক চাঞ্চল্যৰ সৃষ্টি হৈছিল। অৱশেষত আৰক্ষীয়ে নিৰ্দিষ্ট তথ্যৰ ভিত্তিত আজি পাণবজাৰৰ এখন হোটেলৰ পৰা গাওক উদ্ধাৰ কৰে।
উদ্ধাৰৰ পিছতে তাহাং গাওক তেওঁৰ সৈতে হঠাতে কি ঘটিছিল, সেই বিষয়ে সোধা-পোছাৰ বাবে দিচপুৰ আৰক্ষী থানালৈ লৈ যোৱা হয়।
জানিব পৰা মতে গাও কিছু ব্যক্তিগত কামৰ বাবে গুৱাহাটীলৈ আহিছিল আৰু গণেশগুৰিত এজন বন্ধুক লগ কৰিবলৈ গৈছিল।
কিন্তু তেতিয়াৰ পৰা সন্ধানহীন হৈ আছিল গাও। তেওঁৰ ফোনটোও বন্ধ হৈ থকাৰ বাবে এই সমগ্ৰ বিষয়টো ৰহস্যৰ আৱৰ্তত সোমাই পৰিছিল।
গাওৰ কোনো ধৰণৰ যোগাযোগ নোহোৱাৰ পিছত এগৰাকী আত্মীয়ই আৰক্ষীৰ কাষ চাপিছিল।
আৰক্ষীয়ে ঘটনা সন্দৰ্ভত এজন কেব চালকক আটক কৰাৰ লগতে আন এজন লোকক গ্ৰেপ্তাৰ কৰিছিল। ইফালে গাওৰ পৰা প্ৰায় ৫ লাখ টকা দুৰ্বৃত্তই লুটি নিয়ে বুলিও বাতৰি প্ৰকাশ পাইছিল।
ইতিমধ্যে দিচপুৰ আৰক্ষীয়ে গোচৰটোৰ সন্দৰ্ভত গাওক সোধা-পোছা কৰি থকাৰ লগতে তদন্ত আৰম্ভ কৰিছে।
