পশ্চিমবংগ বিধানসভাৰ নিৰ্বাচনৰ বাবে বিজেপি দলে প্ৰকাশ কৰিছে অন্তিমখন প্ৰাৰ্থী তালিকা।
ঘোষিত তেৰজনীয়া প্ৰাৰ্থী তালিকাৰ বাচনিত নুঠিল প্ৰধানমন্ত্ৰী নৰেন্দ্ৰ মোদীৰ বন্দনাত ব্যস্ত নবিজেপি মিঠুন চক্ৰৱৰ্তীৰ নাম।
উল্লেখ্য যে যোৱা ৭ মাৰ্চত কলকতাৰ প্ৰধানমন্ত্ৰীৰ নৰেন্দ্ৰ মোদীৰ এখন নিৰ্বাচনী জনসভাত মিঠুন চক্ৰৱৰ্তীয়ে বিজেপিত যোগদান কৰিয়ে ৰাজ্যৰ ৰাজ্যখনৰ ৰাজনীতিত সক্ৰিয় অংশগ্ৰহণৰ ইংগিত প্ৰদান কৰিছিল।
বিজেপিত যোগদান কৰিয়ে পশ্চিমবংগ চৰকাৰৰ লগতে মুখ্যমন্ত্ৰী মমতা বেনাৰ্জীক তীব্ৰ কটাক্ষ কৰি প্ৰধানমন্ত্ৰীৰ প্ৰশংসাত গদগদ হৈ পৰা মিঠুন চক্ৰৱৰ্তীয়ে ৰাসবেহাৰী বিধানসভা সমষ্টিত বিজেপিৰ প্ৰাৰ্থীত্ব লাভ কৰিব বুলি চৰ্চা চলিছিল।
কিন্তু বিজেপিয়ে উক্ত সমষ্টিত মিঠুন চক্ৰৱৰ্তীৰ পৰিৱৰ্তে অৱসৰপ্ৰাপ্ত লেফ্টেনেন্ট জেনেৰেল সুব্ৰত চাহাক প্ৰাৰ্থীত্ব প্ৰদান কৰিছে।
স্মৰ্তব্য যে বিজেপিৰ সূত্ৰই পূৰ্বে প্ৰকাশ কৰিছিল যে দক্ষিণ কলকতাৰ উক্ত সন্মানীয় সমষ্টিটোত মিঠুন চক্ৰৱৰ্তীক প্ৰাৰ্থীত্ব দিয়া হ’ব। কিন্তু প্ৰকাশিত তালিকা অনুসৰি সেই সমষ্টিত প্ৰাৰ্থীত্ব লাভ কৰিছে অৱসৰপ্ৰাপ্ত লেফ্টেনেন্ট জেনেৰেল চাহাই।
মিঠুন চক্ৰৱৰ্তীয়ে বিজেপিত যোগদানৰ পিছতে পশ্চিমবংগৰ ৰাজনীতিত মিঠুন চক্ৰৱৰ্তীৰ ৰাজনৈতিক ভৱিষ্যতকলৈ যথেষ্ট চৰ্চা লাভ কৰা দেখা গৈছিল।
সংবাদ মাধ্যমৰ লগতে ৰাজনৈতিক বিশ্লেষক আৰু বিজেপিৰ দলৰ মাজতো পশ্চিমবংগৰ পৰৱৰ্তী মুখ্যমন্ত্ৰী হিচাপে মিঠুন চক্ৰৱৰ্তী নাম উচ্চাৰিত হৈছিল।
কিন্তু বিজেপিৰ অন্তিমখন তালিকা প্ৰকাশৰ লগে লগে ৰাজনৈতিক মহলত চলি থকা এই উৎসুকমূলক চৰ্চা একপ্ৰকাৰে যেন যৱনিকাই পৰিল।
