অসম-মিজোৰাম সীমান্তত উত্তেজনা অব্যাহত থকাৰ সময়তে মিজো ছাত্ৰ সন্থাৰ সভাপতি জে লালমুৱানজুৱালাই অসমৰ মুখ্যমন্ত্ৰী হিমনৱ্ত বিশ্ব শৰ্মাক তীব্ৰ আক্ৰমণ কৰি এখন পত্ৰ লিখিছে।
পত্ৰ খনত ছাত্ৰ নেতাগৰাকীয়ে কৈছে—‘মিজোৰামৰ সাধাৰণ জনতাৰ বিৰুদ্ধে আপুনি হিংসাৰ সূচনা কৰিছে।যাৰ পৰিণতিত সাত জনকৈ লোকে প্ৰাণ বিসৰ্জন দিবলগীয়া হৈছে।আপুনি সৃষ্টি কৰা এনে পৰস্থিতিৰ আঁৰত আপোনাৰ এক গোপন পৰিকল্পনা আৰু ৰাজনৈতিক উদ্দেশ্য নিহিত হৈ আছে।সেই বিষয়ত আমি অজ্ঞ নহওঁ। ইনাৰ লাইন ৰিজাৰ্ভ ফৰেষ্ট এলেকাৰ ৫০৯ বৰ্গ মাইল অঞ্চলত বাংলাদেশৰ বহু প্ৰব্ৰজনকাৰীয়ে বাস কৰি আছে। আপুনি সেই মানুহ খিনিক স্বায়ত্ত্বশাসিত জিলা পৰিষদ দিব বিচাৰিছে আৰু ইয়াৰ জৰিয়তে আপুনি আপোনাৰ ৰাজনৈতিক অভীপ্সা পূৰণ কৰিব বিছাৰিছে।আপুনি এইবোৰ কথা সংবাদ মাধ্যম আৰু জনতাৰ পৰা লুকুৱাই ৰাখিছে যদিও প্ৰকৃত সত্য সকলোৱে বুজি পাইছে।আপুনি জনতাৰ যি তেজ এতিয়া ব্যৱহাৰ কৰি আছে সেই তেজ এদিন আপোনাৰ গাৰ পিনেই আহিব আৰু আপোনাকেই ধ্বংস কৰিব।
আপুনি ৰাজনীতিলৈ অহাৰ পূৰ্বে ‘সাত ভনী’ৰ ছাতিৰ তলত থাকি উত্তৰ-পূৰ্বাঞ্চলত শান্তিৰ পৰিবেশে বিৰাজ কৰিছিল।কিন্তু আপোনাৰ ৰাজনৈতিক আকাংক্ষাই সেই শান্তি বিঘ্নিত কৰিছে, আনকি সাত ভনীক হত্যাৰ পৰিবেশ সৃষ্টি হৈ শান্তি নাইকীয়া হৈ পৰিছে। এককথাত আপুনি চুবুৰীয়া উত্তৰ-পূৰ্বাঞ্চলৰ প্ৰতিখন ৰাজ্যৰ সৈতে শত্ৰুতা গঢ়ি তুলিছে।
মিজোসকলক সহজ ভাবে লৈ ভুল নকৰিব। যদি আপুনি ভাৰতীয় যুক্তৰাষ্ট্ৰত শান্তি বাহাল থকাটো নিবিচাৰে , তেন্তে জানি ৰাখক যে মিজোসকলে হাতত অস্ত্ৰ তুলি লোৱাৰো ইতিহাস আছে। যদি আপুনি বাধ্য কৰে তেন্তে সেয়া কৰিবলৈ আমি কুণ্ঠাবোধ নকৰিম।
শেষত এই কথা মনত ৰাখিব যে মিজোসকল শান্তিপ্ৰিয় লোক আৰু ভাৰত যুক্তৰাষ্ট্ৰৰ সৈতে তেওঁলোকে থাকিব বিচাৰে। কিন্তু যদি আপুনি আমাৰ বিৰুদ্ধে হিংসাৰ আশ্ৰয় লয় তেন্তে আমি আমাৰ পূৰ্বপুৰুষৰ ভূমিৰ পৰা এখোজো পিচুৱাই নাহো।আমি স্থিৰ হৈ ৰ’ম আৰু আমাৰ মতে কাম কৰিম’।
মিজো ছাত্ৰ নেতা গৰাকীৰ এই পত্ৰই এতিয়া জোকাৰি গৈছে দুয়ো খন ৰাজ্যৰে ৰাজনীতি।
