কালি ‘নিয়া’ৰ আদালতে চান্দমাৰী থানাৰ এটা গোচৰত দোষমুক্ত ঘোষণা কৰাৰ পিছতে অৱধাৰিত ভাবে শিৱসাগৰৰ বিধায়ক অখিল গগৈয়ে গুৱাহাটী চিকিৎসা মহাবিদ্যালয়ৰ পৰা বাহিৰলৈ ওলাই অহাৰ বাট প্ৰশস্ত হৈছিল।
কিন্তু গুৱাহাটী চিকিৎসা মহাবিদ্যালয়ে বিধায়ক অখিল গগৈক স্বাস্থ্য জনিত কাৰণতে চিকিৎসালয়ৰ পৰা অব্যাহতি দিবলৈ অস্বীকাৰ কৰে।ইয়াৰ পিছতে হাস্পতাল কৰ্তৃপক্ষৰ অনুমতি অবিহনে অখিলে নিজৰ দায়িত্বত দিচাৰ্জ লেটাৰত স্বাক্ষৰ কৰি চিকিৎসালয়ৰ পৰা ওলাই আহে।
এই ক্ষেত্ৰত হাস্পতাল কৰ্তৃপক্ষই গৃহবিভাগলৈ বিষয়টো উল্লেখ কৰি প্ৰেৰণ কৰিছে বিশেষ পত্ৰ৷
গৃহ বিভাগক পত্রৰ জৰিয়তে গুৱাহাটী চিকিৎসা মহাবিদ্যালয়ে জনাইছে যে চিকিৎসাৰ পৰমৰ্শৰ বিপৰীতে গৈ অখিল গগৈয়ে নিজৰ দায়িত্বত চিকিৎসালয় ত্যাগ কৰাৰ প্ৰ-পত্ৰ পূৰণ কৰি চিকিৎসালয়ৰ পৰা ওলাই গৈছে।
চিকিৎসকে হাস্পতালতে থকাৰ পৰামৰ্শ দিছিল অখিল গগৈক।
অখিল গগৈয়ে নিজে স্বাক্ষৰ কৰিছিল নিজৰ দায়িত্বত চিকিৎসালয় ত্যাগ কৰাৰ প্ৰ-পত্ৰ ।
আৰক্ষীকো বিষয়টো অৱগত কৰিছে হাস্পতাল কৰ্তৃপক্ষই।
শেহতীয়া খবৰ অনুসৰি বিধায়কগৰাকীয়ে তেওঁৰ নিজা সমষ্টি শিৱসাগৰত গৈ উপস্থিত হৈছে।