উত্তৰ পূবৰ সৰ্বপ্ৰথম উদ্যোগিক চহৰ লিডুক এখন পৰিষ্কাৰ-পৰিচ্ছন্ন চহৰ হিচাপে গঢ়ি তোলাৰ পৰিকল্পনা কৰিছে ১২৪ নং মাৰ্ঘেৰিটা বিধানসভা সমষ্টিৰ বিধায়ক ভাস্কৰ শৰ্মাই।
প্ৰধান মন্ত্ৰী নৰেন্দ্ৰ মোডীৰ ৬৯ সংখ্যক জন্ম দিৱস উপলক্ষে বিজেপি দলে উদযাপন কৰি থকা সেৱা সপ্তাহৰ সৈতে সংগতি ৰাখি মাৰ্ঘেৰিটা ব্লক্ মণ্ডল বিজেপিৰ উদ্যোগত আৰু লিডু পঞ্চায়ত তথা লিডু বজাৰৰ ব্যৱসায়ী-স্থানীয় ৰাইজৰ সহযোগত লিডু বজাৰ দুৰ্গাবাৰী প্ৰাংগণত আয়োজিত স্বচ্ছ ভাৰত অভিযানৰ অন্তৰ্গত চাফাই কাৰ্য্যসূচীত অংশ গ্ৰহণ কৰাৰ পাছত বিধায়কগৰাকীয়ে লিডুৰ বজাৰ অঞ্চল পৰিদৰ্শন কৰে৷
তেওঁক সংগ দিয়ে ভাস্কৰ শৰ্মা ফেনচ ক্লাৱৰ উপদেষ্টা জ্যোতিষ বৰা, ভৱেশ দত্ত ধীৰাজ সোণোৱালকে ধৰি কেইবাজনো নেতাই।
বিধায়কজনে লিডু বজাৰৰ নলা-নৰ্দমা সমূহৰ পৰিষ্কাৰ-পৰিচ্ছন্নতাৰ বাবে বিশেষ নিৰ্দেশ প্ৰদান কৰে। লগতে বিধায়ক শৰ্মাই স্থানীয় নাগৰিক আৰু ব্যৱসায়ী তথা ব্যৱসায়িক প্ৰতিষ্ঠানৰ গৰাকীৰ সৈতে এখন সভা অনুষ্ঠিত কৰি এখন সমিতি গঠন কৰি এই ক্ষেত্ৰত উদ্যোগ ল’বলৈ পৰামৰ্শ আগবঢ়াই।
আনহাতে মাৰ্ঘেৰিটা ক্ৰীড়া সন্থাৰ সভাপতিৰ দায়িত্বত থকা বিধায়কজনে বৰগোলাই বাঁহবাৰী খেলপথাৰত অহা ২২ ছেপ্তেম্বৰৰ পৰা আৰম্ভ হ’বলগীয়া বদৌচা কাপ আন্তঃৰাষ্ট্ৰীয় ফুটবল টুৰ্ণামেণ্টৰ বাবে আয়োজনৰ সন্দৰ্ভতো খেলপথাৰত উপস্থিত অগ্ৰগতিৰ বুজ লয়।
