শেহতীয়াকৈ যোৰহাট জিলাৰ মৰিয়নীৰ বিধায়ক ৰূপজ্যোতি কুৰ্মীক নিতৌ ন ন ৰূপত দেখা গৈছে। কেতিয়াবা যদি হাতত নগা দা লৈ সীমান্তত নগা খেদিছে আকৌ কেতিয়াবা বাহুবলী ৰূপ লৈ হাতেৰে পকী বেৰ বগৰাই দিছে।
এইবাৰ বিধায়ক ৰূপজ্যোতিক দেখা গ’ল গৃহ নিৰ্মানকাৰীৰ ৰূপত। বিধায়ক গৰাকীয়ে নিৰ্মাণ কৰিছে বিশেষ এটা গৃহ। গৃহটো নিৰ্মাণ কৰিবলৈ যোৰহাট জিলাৰ অসম নগালেণ্ড সীমান্তত চাইকেল চলাই গৈ উপস্থিত হ’ল বিধায়ক ৰূপজ্যোতি।
মূৰত গামোচাৰ পাগুৰি মাৰি একাংশ গঞাৰ লগত বিধায়ক গৰাকী নিজৰ কৰ্মত খুবেই ব্যস্ত। হাতত দা লৈ বাঁহ কাটিছে, জোখ মাখ কৰিছে। গৃহটোৰ চালত টিং তুলিছে। কাৰোবাক কিবা নিৰ্দেশো দিছে। মুঠতে ৰ’বলৈ সময় নাই।
বিভিন্ন সময়ত ন ন ৰূপ লৈ সংবাদ শিৰোনামা দখল কৰি অহা বিধায়ক ৰূপজ্যোতি এইবাৰ গৃহ নিৰ্মাণত ব্যস্ত হৈ পৰিছে মৰিয়নীৰ অসম নগালেণ্ড সীমান্তৰ ৰনখাম গাঁওত। ৰনখাম গাঁৱৰ সমীপত থকা অস্থায়ী সীমান্ত আৰক্ষী চকীৰ গৃহ ৰাইজৰ সহযোগত নিৰ্মাণ কাৰ্যত নামি পৰে বিধায়ক ৰূপজ্যোতি কুৰ্মী।
উল্লেখ্য যে, ২০১৫ চনত অসমৰ মাটীত নগাৰ আগ্ৰাসনৰ সময়ত হোৱা সংঘাতৰ পাছতে অসম চৰকাৰে ৰনখামত এটা অস্থায়ী সীমান্ত আৰক্ষী চকী স্থাপন কৰিছিল।
কিন্ত পাঁচ বছৰে অসম চৰকাৰে সীমান্ত আৰক্ষী চকীটো স্থায়ীকৈ নিৰ্মাণ কৰাটো দূৰেৰে কথা বাঁহৰ গৃহ কেইটাও মেৰামতি কৰাৰ প্ৰয়োজন বোধ নকৰিল।
ফলত জহি খহি যোৱা আৰক্ষী চকীটোৰ বাহঁৰ গৃহ কেইটা প্ৰতি বছৰে ৰনখাম গাঁও বাসীয়ে দান বৰঙনি সংগ্ৰহ কৰি নিৰ্মান কৰি আহিছে।
উল্লেখ্য যে, কিছু দিন পূৰ্বে গাঁওবাসীৰ সহযোগত যোৰহাট জিলা প্ৰশাসনে আৰক্ষী চকীটোৰ মুল গৃহটো মেৰামতি কৰি দিলে যদিও ৰান্ধনী শাল আৰু স্থায়ী শৌচালয়ৰ অভাৱত সমস্যাৰ সন্মুখীন হৈ আহিছিল আৰক্ষী চকীটোৰ বিষয়া জোৱান সকল।
আনহাতে বিধায়ক ৰূপজ্যোতি কুৰ্মীয়ে আজি চেলেং গাঁও পঞ্চায়তৰ সভাপতি ৰাজেন গগৈৰ সহযোগিতাত তথা ৰনখাম গাঁও বাসীৰ সৈতে লগ হৈ সীমান্ত আৰক্ষী চকীটোৰ জৰাজীৰ্ণ এটা বেৰেকৰ লগতে ৰান্ধনী শাল আৰু শৌচালায় গৃহটো বাঁহেৰে নিৰ্মাণ কৰি দিয়ে।
বিধায়ক গৰাকীয়ে চৰকাৰৰ গৃহ বিভাগক ৰনখাম সীমান্ত আৰক্ষী চকীটো স্থায়ীকৈ নিৰ্মান কৰিবৰ বাবে আবেদন নিবেদন কৰি ভাগৰি পৰা বুলি উল্লেখ কৰি সীমান্ত বাসীৰ প্ৰতি বিজেপি চৰকাৰৰ কোনো ধৰণৰ গুৰুত্ব নাই বুলি ক্ষোভ উজাৰে।