ঘৰত বহি ম’বাইলৰ জৰিয়তে কৰিব পাৰিব ভোটদান! বিহাৰত ছটা পৌৰসভাত পাইলট প্ৰকল্প ৰূপে ই-ভোটিং আৰম্ভ

বিহাৰ ৰাজ্যিক নিৰ্বাচন আয়োগে এক নতুন যুগৰ আৰম্ভণি কৰিছে। বিহাৰত ভোটাৰসকলে এতিয়া নিজৰ ঘৰত বহি ম’বাইল ফোনৰ জৰিয়তে ভোট দিব পাৰিব। ভোটদান প্ৰক্ৰিয়া সহজ আৰু সুৰক্ষিত কৰি তুলিবলৈ এই পদক্ষেপ গ্ৰহণ কৰা হৈছে।

২৮ জুনত পাটনাসহ তিনিখন জিলাৰ ছটা পৌৰসভাত অনুষ্ঠিত হোৱা নিৰ্বাচনত পাইলট প্ৰকল্প হিচাপে এই ই-ভোটিং ব্যৱস্থা পৰীক্ষামূলকভাৱে ব্যৱহাৰ কৰা হৈছে। এই প্ৰকল্পৰ অধীনত ১০ হাজাৰৰো অধিক ভোটাৰ ইতিমধ্যে পঞ্জীয়ন কৰিছে। গৰ্ভৱতী মহিলা, শাৰীৰিকভাৱে অক্ষম ব্যক্তি, প্ৰব্ৰজিত শ্ৰমিক আদি যিসকলে ভোটকেন্দ্ৰলৈ যাব নোৱাৰে, তেওঁলোকৰ বাবে এই ব্যৱস্থা বিশেষ সহায়ক হ’ব বুলি আশা কৰা হৈছে।

নতুন এপৰ জৰিয়তে সুৰক্ষিত ভোটদান

‘E-SCI BHR’ নামৰ এক নতুন ই-ভোটিং এপৰ জৰিয়তে ভোট গ্ৰহণ কৰা হৈছে। এই এপত জালিয়াতি ৰোধৰ বাবে উন্নত প্ৰযুক্তি ব্যৱহাৰ কৰা হৈছে। ব্লকচেইন প্ৰযুক্তিৰ মাধ্যমেৰে ভোট ৰেকৰ্ডিং আৰু সংৰক্ষণ এক অপৰিৱৰ্তনীয় আৰু সুৰক্ষিত পদ্ধতিত কৰা হয়।

এপত মুখমণ্ডল প্ৰমাণীকৰণ (Face Authentication) আৰু মিলন ব্যৱস্থা (Matching System)ৰ সহায়ত লগইন কৰা যাব। লগতে OCR (Optical Character Recognition) আৰু ডিজিটেল স্কেনিঙৰ মাধ্যমেৰে ভোটাৰ আইডিৰ সঠিকতা পৰীক্ষা কৰা হ’ব। মাত্ৰ দুজন ভোটাৰেহে এটা মোবাইল নম্বৰৰ জৰিয়তে লগইন কৰিব পাৰিব।

ইভিএম আৰু ভিভিপিএটি ব্যৱস্থাৰ সৈতে মিল থকা অডিট ট্ৰেইল ব্যৱস্থাও এপত সংযুক্ত আছে, যাৰ সহায়ত প্ৰত্যেক ভোটৰ বৈধতা নিশ্চিত হ’ব। ইভিএমসমূহ ডিজিটেলভাৱে “strong room”ত লক কৰিব পাৰি, যাতে ফলাফলত কোনো ধৰণৰ হস্তক্ষেপ সম্ভৱ নহয়।

বিহাৰ ৰাজ্যিক নির্বাচন আয়ুক্ত দীপক প্ৰসাদে জাননী দিয়ে যে এই পাইলট প্ৰকল্পৰ সফলতাৰ ভিত্তিত ভৱিষ্যতে বেছি স্থানত এই ব্যৱস্থা বিস্তাৰ কৰাৰ পৰিকল্পনা কৰা হ’ব। তেওঁ লগতে কয় যে, “এই এপটোত অত্যাধুনিক ছাইবাৰ সিকিউৰিটি চিষ্টেম সংযুক্ত কৰা হৈছে যাতে ভোটদানৰ গোপনীয়তা আৰু নিৰাপত্তা ৰক্ষা কৰিব পাৰি।”