বিজেপিৰ অপাৰেচন ল’টাছৰ ফলশ্ৰুতিত মহাৰাষ্ট্ৰৰ ক্ষমতা হেৰুওৱা শিৱসেনা মিত্ৰজোঁটৰ অন্যতম অংশীদাৰ নেচনেলিষ্ট কংগ্ৰেছ পাৰ্টিৰ (এনচিপি) সভাপতি শৰদ পাৱাৰে আজি কেন্দ্ৰৰ নৰেন্দ্ৰ মোডী নেতৃত্বাধীন বিজেপি চৰকাৰক কঠোৰ সমালোচনা কৰে।
মহাৰাষ্ট্ৰৰ থানেত সাংবাদিকৰ সৈতে বাৰ্তালাপত পাৱাৰে কয় যে বিজেপিৰ কাৰ্যসূচী হৈছে কেৱল সৰু সৰু দলবোৰক ক্ষমতাৰ পৰা আঁতৰাই ৰখা।
কিন্তু শাসনলৈ অহাৰ পূৰ্বে কৰা প্ৰতিশ্ৰুতি পূৰণৰ বাবে তেওঁলোকৰ কোনো কাৰ্যসূচী নাই বুলি পাৱাৰে অভিযোগ কৰে।
পাৱাৰে কয়, “২০১৪ চনৰ সাধাৰণ নিৰ্বাচনৰ পৰা কেন্দ্ৰৰ বিজেপি চৰকাৰে কেইবাটাও প্ৰতিশ্ৰুতি দিছিল, কিন্তু চৰকাৰে কেতিয়াও এটাও প্ৰতিশ্ৰুতি পূৰণ কৰা নাই।”
“প্ৰধানমন্ত্ৰীয়ে দেশৰ প্ৰতিজন ব্যক্তিকে ঘৰ দিয়াৰ প্ৰতিশ্ৰুতি দিছিল, কিন্তু চৰকাৰে এই প্ৰতিশ্ৰুতি পূৰণ কৰাতো ব্যৰ্থ হৈছে” বুলি পাৱাৰে অভিযোগ কৰে।
তেওঁ লগতে বিজেপিয়ে দেশৰ ৰাজ্যসমূহত ক্ষমতালৈ আহিবলৈ কেন্দ্ৰীয় তদন্ত সংস্থাসমূহক ব্যৱহাৰ কৰে বুলিও গুৰুতৰ অভিযোগ উত্থাপন কৰে।
উল্লেখ্য যে, চলিত বৰ্ষৰ জুন মাহত একনাথ সিন্ধে আৰু শিৱসেনাৰ আন ৩৯ জন বিধায়কে দলৰ নেতৃত্বৰ বিৰুদ্ধে বিদ্ৰোহ কৰাৰ ফলত শিৱসেনা, এনচিপি আৰু কংগ্ৰেছক লৈ গঠিত উদ্ধৱ ঠাকৰে নেতৃত্বাধীন চৰকাৰৰ পতন ঘটিছিল।
ইয়াৰ পিছতে একনাথ সিন্ধেই ৩০ জুনত বিজেপিৰ সমৰ্থনত ৰাজ্যখনৰ মুখ্যমন্ত্ৰী পদত অধিষ্ঠিত হৈছিল।