‘‘কংগ্ৰেছৰ বাবেই শক্তিশালী হৈ পৰিছে মোদী। দেশৰ স্বাৰ্থক কংগ্ৰেছে গুৰুত্ব দিয়া নাই। যদি কংগ্ৰেছে সঠিক সিদ্ধান্ত ল’ব নোৱাৰে, তেন্তে সমগ্ৰ দেশখনেই ভুক্তভোগী হ’বলগা হব।’’ কংগ্ৰেছৰ প্ৰতি এইবাৰ এইদৰে তীক্ষ্ণ বাক্যবাণ নিক্ষেপ কৰিছে মমতা বেনাৰ্জীয়ে।
গোৱাৰ এখন দলীয় সভাত আজি মমতাই এইদৰে মন্তব্য কৰে। মমতাই অভিযোগ কৰে যে বিজেপি বিৰোধী দলসমূহক কংগ্ৰেছে একত্ৰিত কৰিব পৰা নাই। তদুপৰি বিজেপিক প্ৰত্যাহ্বান জনাবলৈ দেশৰ আঞ্চলিক দলসমূহক কংগ্ৰেছে দিয়া নাই নাই।
মমতাই জনায় যে তেওঁ আঞ্চলিক দলসমূহ শক্তিশালী হোৱাটো আশা কৰে। ইয়াৰ দ্বাৰা ভাৰতৰ ফেডাৰেল গাঁঠনিও শক্তিশালী হ’ব বুলি তেওঁ কয়। দেশৰ প্ৰতিখন ৰাজ্য যদি শক্তিশালী হয়, তেন্তে কেন্দ্ৰও শক্তিশালী হ’ব- তেওঁ কয়।
সম্প্ৰতি অহা বছৰ গোৱাত অনুষ্ঠিত হ’ব লগা বিধানসভা নিৰ্বাচনলৈ লক্ষ্য ৰাখি তৃণমূল কংগ্ৰেছে ব্যাপক দলীয় কাম-কাজ চলাই আছে। তৃণমূলে গোৱাৰ প্ৰাক্তন উপমুখ্যমন্ত্ৰী বিজয় চৰদেচাইৰ আঞ্চলিক দল গোৱা ফৰৱাৰ্ড পাৰ্টিৰ স’তে মিত্ৰতাত অৱতীৰ্ণ হৈছে। বিজেপি শাসিত ৰাজ্য গোৱাত ৪০ টাকৈ বিধানসভা সমষ্টি আছে। জানিব পৰা মতে, গোৱাৰ আটাইকেইটা সমষ্টিতে তৃণমূল কংগ্ৰেছে প্ৰতিদ্বন্দ্বিতা কৰিব।
উল্লেখযোগ্য যে শেহতীয়া বংগ বিধানসভা নিৰ্বাচনত কংগ্ৰেছে বাওঁপন্থী দলসমূহৰ স’তে নিৰ্বাচনত অৱতীৰ্ণ হৈছিল। যাৰ ফলশ্ৰুতিত মমতা বেনাৰ্জীৰ তৃণমূল কংগ্ৰেছে অকলেই নিৰ্বাচন খেলিব লগা হৈছিল।
সাংবাদিকে প্ৰশ্ন কৰে যে গোৱা নিৰ্বাচনলৈ লক্ষ্য ৰাখি কংগ্ৰেছৰ স’তে পুনৰ মিত্ৰজোঁটলৈ আহিব নেকি? তাৰ উত্তৰত মমতাই কয় যে বংগ নিৰ্বাচনত কংগ্ৰেছে বিজেপিৰ সলনি তৃণমূলৰ বিৰুদ্ধে অৱতীৰ্ণ হৈছিল। তেনেস্থলত নিৰ্বাচনী মিত্ৰতাৰ কথা ভবা নাই।
কংগ্ৰেছৰ প্ৰতি মমতাই এইদৰে মন্তব্য কৰাৰ পূৰ্বে নিৰ্বাচনী কৌশলবিদ প্ৰশান্ত কিশোৰেও একেধৰণৰ মন্তব্য কৰিছিল। তেওঁ কৈছিল যে নৰেন্দ্ৰ মোদী নাথাকিলেও ভাৰতৰ ৰাজনীতিত অনাগত ভৱিষ্যতৰ বাবে বিজেপি এটা শক্তিশালী দল হৈ থাকিব। আৰু এই কথা কংগ্ৰেছে অনুধাৱন কৰা উচিত।
প্ৰশান্ত কিশোৰে মূলতঃ কংগ্ৰেছৰ ৰাহুল গান্ধীৰ প্ৰতি লক্ষ্য কৰিয়েই এইদৰে কৈছিল। প্ৰশান্ত কিশোৰৰ এই মন্তব্যই ৰাজনৈতিক বিশেষজ্ঞসকলৰ মাজত ব্যাপক চৰ্চা চলিছে। সঁচাকৈয়ে কংগ্ৰেছ আৰু তৃণমূল কংগ্ৰেছৰ মাজত এখন শীতল যুদ্ধ চলি আছে নেকি?
